أعراض (الكورونا) النخجي واللفحي والتنبلة والقرمعة والدفاع بالنظر!!

صابنها 

محمد عبدالماجد 

أعراض (الكورونا) النخجي واللفحي والتنبلة والقرمعة والدفاع بالنظر!!

• أعراض الكورونا (السياسية) 99 قطعة أرض ، وألف فدان زراعي وعلاوة للزوجة التانية (ولن نذل ولن نهان).
• وكضب كتير كدا.
• دُراب شديد.
• أنا حصل قبل كدا كذبت عليكم!!!!.
• نحن بنتكلم عن كورونا (سياسية)…الكورونا (العادية) دي ما عندنا معاها قضية…ربنا يشفي الجميع منها ويحفظ البلاد والعبّاد..
• بنتكلم عن (الفيروس) في عضمو.
• بنتكلم عن كورونا (التانية).
• ما عندنا مشكلة مع المرضي في حد ذاتهم.
• المرض ما عيب ..وهو إبتلاء (اجر وعافية) ان شاءالله.
• تطيروا في (عيونكم) ، وتبلعوا في (ريقكم) متل يوم توزيع أوراق إمتحان (الرياضيات).
• بعض البحوث الطبيبة الى جانب تلك الأعراض التى ذكرناها عن الكورونا (السياسية) اضافت شعار ( ما لدنيا قد عملنا).
• كضب بس!!.
• الواحد عندو (133) قطعة ارض ، وعمارة من (35) طابق ، وجواز بريطاني ، و(4) زوجات ، و(19) سكرتيرة ، وأكل حق السد ، وأكل الزلط ذاتو ويقول ليك : (ما لدنيا قد عملنا).
• الاسفلت الأكلتوه دا كان جبنة (لباشكري)؟.
• نحن الواحد لو عمل ليه (3) فردات (حمام) بكون ما قصر – يمد رقبتو متل (ابو السعن)!!.
• عندنا زول في الحلة اسمو (الخمجان) عندو حافلة (مكعوجة) زي الطالب الما حافظ جدول 2 …(الخجمان) دا كان وقت يعمل ليه (فردتين) بي حافلتو ما بصدق.
• بيجي راجع البيت شايل ليه ربع كيلو (باسطة) ونص رطل (لبن)!!.
• الشفع بقابلوه في الباب – بي سفنجات (خدر) ، متل باقى (الملوخية) في الصحن!!.
• خالنا (السر ود كجر) – عندو (سكري) لو شم ليه ريحة (باسطة) ساكت بيدخل في (كومة) سكري.
• خالنا كاتلاهو (الشفقة) – ما كاتلو (السكري).
• ساكت نحن بنعملها في (السكري).
• جارنا في الحلة (كوز) – زمان كان بيجي راجع البيت من الساعة 12 ..شايل ليه (كراع) خروف – و(5) بطيخات كبيرة ، و (7) كيلو باسطة وبدلة جديدة… (وما لدنيا قد عملنا)!!.
• ما عارف (البدلة الجديدة) علاقتها شنو بالموضوع؟.
• المهم…خلونا في (ما لدنيا قد عملنا).
• هسع جارنا (الكوز) دا بقي يجي راجع البيت لابس ليه (كمامة).
• ما اكتر من كدا.
• وزنو نقص النص.
• قلنا ليه أفحص (السكري) – قال لينا خائف ناس (لجنة ازلة التمكين) يلقوا (السكري) مرتفع وزايد يقوموا يصادروه…ويدخلوه في سين وجيم!!.
• وما لدنيا قد عملنا.
• هي لله ..هي لله …لا للسلطة ولا للجاه.
• انتوا يا (الكيزان) لو عملتوا للدنيا لو اشتغلتوا ليها – (نضارة القراية) ما كان خلتوها لينا.
• كديسة ما كان بتمرق منكم.
• هسع (الكديسة) ذنبها شنو؟.
• حالتكم دي كنتوا بتعملوا للآخرة.
• يمين (الكمونية) ما كان بنطلع بيها من (الضحية).
• تلملوا أي شيء – بما في ذلك (الضلوف).
• زمان نحن في الحي ناس (اللجنة الشعبية) في عيد الضحية بقولوا عاوزين (جلود الضحية).
• ما قلنا شيء.
• اتعصروا شوية – بقوا مع (جلود الضحية) بشيلوا (الرأس).
• سكتنا.
• اتعصروا زيادة بقوا يشيلوا من الخروف (الجلد والرأس والضلوف).
• تقول عندهم فيه نص.
• الاوضاع اتعقدت عليهم شالوا مع الجلد والرأس والضلوف (البطن).
• يشيلوا بطن الخروف بي حالها.
• الموضوع بقى صعب علينا شوية!!.
• عندنا (امهات) ما بستحملن حاجة في بطن الخروف.
• كلو شيء – ولا بطن الخروف.
• عندهن اهم شيء في الخروف (بطنو).
• ناس (اللجنة الشعبية) في اخر ايامهم بقوا بشيلوا (الخروف) كامل وبيسلموا سيد الخروف (الجلد).
• الضحية بقينا نتمها (فول).
• بتعرفوا (شية) الفول…و(شوربة) موية الفول!!.
• عكسوا الحكاية.
• الخروف حقك تطلع منو فقط بالجلد!!…وشوية (روائح).
• زمان كان عندنا عداد (بتاع كهرباء) …تنزل فيه رصيد للكهربة …شهر ما بكون عندك مشكلة.
• هسع عداد الكهربة …تنزل فيه حق الكهربة وحق الموية وحق النفايات ، وحق العرس الجماعي وزاد المجاهد ودمغة الجريح وكشك الشهيد وحق اللجنة العليا ، وحق اعادة تأهيل وتخطيط السكة الحديد وحق الكبري و الصندوق!!.
• عداد الكهربة بقى زي (السحّارة)…يبلع في القروش من طرف ، عشان تنور ليك (لمبة) وتشغل ليك (مروحة).
• ما اكتر من كدا.
• (عثمان ود حضلم) هو ذاتو لمن يكون عاوز منك قروش – بكون منتظرك قدام (العداد) – فاتح خشمو!!.
• أنا ما عارف ليه؟ – الزول وقت يكون عاوز منك قروش بكون فاتح خشمو!!.
• السر في كدا شنو؟.
• الكلام دا كلو من (الكيزان).
• الكلام دا شغل (كيزان).
• العملتوها رقدت.
• واحد قال لي انتوا (الكورونا) بتعرفوها كيف؟.
• قلت ليه بسيطة.
• نحن (الكورونا) بنعرفها من اعراضها – ما محتاجة ليها (فحص).
• الواحد من تلقاه قاعد (يتخنج) – يعني عندو رأي في زيادة (المرتبات)..وتلقاه (بيلفح) في الكلام عشان يوقع الناس، ويلخبط بينهم و(بتنبل) كدا بدون مناسبة ، و(بتقرمع) ،وبيدافع عن (الكيزان) – اعرف طوالي عندو (كورونا).
• نحن بنتكلم عن الكورونا (السياسة)…عشان ما تلخبطوا لينا ساكت.
• الكورونا (السياسية) ظاهرة.
• النخجي بعرفو.
• اللفحي بعرفو.
• والتنبلة بعرفها.
• لكن (القرمعة) دي اول مرة اسمع بيها.
• هسع في زول جاب سيرة (الدفاع بالنظر).
• براكم بتجيبوا الكلام لي روحكم!!.
• قالوا ليك زمان في حكومة الانقاذ في طائرة حربية اسرائيلية ضربت الخرطوم.
• الطائرة الاسرائيلية وقت رجعت (تل ابيب) اتضح ان هناك جندي (اسرائيلي) تعرض للإصابة من وزارة دفاع عبدالرحيم محمد حسين.
• عارفين الجندي الاسرائيلي اتصاب في الخرطوم كيف؟.
• الجيش بتاع الانقاذ طلع فيه (جندي) عينو (حارة)…اصاب الجندي الاسرائيلي (عين).
• طقاهو (عين)!!…جاب اجلو.
• انتوا موش قلتوا الدفاع بالنظر!!.
• بالمناسبة دي – في زول عندو (نضارة قراية) مفقودة؟.
• ما عارف الليلة مالي شابك في موضوع (نضارة القراية) دي ليه؟.
• الله يستر.
• المهم (التميح ود حسن) ، جاتو ليك اعراض (كورونا) – درجة حرارتو ارتفعت …ونفسو كتم ، وبقى يتكلم برة من رأسو.
• طبعا الوصفة الاخيرة دي زيادة مني ساكت.
• (التميح ود حسن) بقى يهضرب زي الموجة وقت تكون مشتركة في الاذاعة – مرة تجيب ليك اغنية ومرة نشرة اخبار.
• شلنا (التميح ود حسن) وجرينا بيه على المستشفى.
• ناس المستشفى رفضو يستلموه مننا.
• مشينا بيه (العزل).
• ناس العزل ما قصرو معانا …مسكوا (التميح ود حسن) ودخلوه في (كيس).
• وقالوا لينا نحن – اقيفوا بعيد.
• وقفنا!!.
• نحن طيرنا عيونا متل (الباكات) وقت يشوفوا (الكرت الاحمر).
• جينا في سبعة لواري مع (التميح ود حسن) للكشف عن (الكورونا)– اقل لوري فيه (71) نفر.
• اللابس ليه (سيوتر) في الحر دا.
• واللابس ليه (سفنجة) كل فردة من بلد.
• واللابس ليه عراقي وسروال بالقلبة.
• واللابس ليه (مريلة).
• جينا على المستشفى ونحن حالتنا صعبة.
• يا زول نحن لينا (3) شهور بنسمع في اعلانات (الكورونا) – الواحد فينا من (الكورونا) الكتيرة قرب يبقى (انبوبة غاز).
• ما عارف علاقة (انبوبة الغاز) بالكلام دا شنو؟.
• المهم (7) لواري جات مع (التميح ود حسن) عشان يفحص (الكورونا).
• اللواري واقفة برة تقول واقفين لصلاة العيد.
• أي واحد فينا عيونو في نص ضهرو.
• يا جماعة في زول عندو (رصيد) – عاوز اضرب تلفون.
• المهم بعد ساعة ونص طلعوا وقالوا لينا (التميح ود حسن) مات.
• نفسو كتم – والله افتكرو.
• يا زول وقت قالوا لينا كدا – كل واحد فينا قعد يفكر في روحو.
• نسينا (التميح ود حسن) المات – وبقينا في رقبتنا.
• يا جماعة في زول عندو رصيد؟.
• مشينا على اللواري السبعة وقلنا ليهم (التميح ود حسن) الله افتكرو.
• الناس الفي اللواري السبعة كلهم بي نفس واحد قالوا لينا مالو؟…عندو (كورونا)؟.
• أي واحد بقى في (رقبتو).
• في (نفسو).
• قلنا ليهم – والله ما عارفين الحاصل شنو؟..غايتو الحاجة الاكيدة …(التميح ود حسن) مات…والناس ديل حاجزين (الجثة) عندهم.
• يا جماعة في شنو؟.
• فهمونا الحاصل؟.
• جاء واحد من جوه قال لينا اتخارجوا ..لمتكم بالشكل دا فيها خطر عليكم.
• قلنا ليه يا زول نمشي وين؟…نحن لو ما طلعت نتيجة الفحص بتاعة (التميح ود حسن) ما بنطلع من هنا.
• قلنا للدكتور …يا دكتور شفت (اللواري السبعة) دي …فيها على الاقل 710 شخص …الجماعة ديل كلهم خالطوا (المرحوم).
• حاموا معاه ..واكلوا …وكانوا مبارينه من بيت لي بيت.
• عشان كدا نتيجة الفحص لو ما طلعت الناس ديل ما بتحركوا من هنا.
• طبعا أي واحد فينا كان مطيّر عيونو زي حارس المرمي البكون في زاوية والكورة في زاوية !! – كلنا منتظرين نتيجة الفحص.
• نتيجة كورونا.
• واي زول فينا خاتي ايدو في قلبو.
• الله يستر.
• بالله شوف الواحد بقى بعد ما يموت ..تقعد تنتظر نتيجة الفحص حقتو.
• هو زول مات …عاوزين بنتيجة فحصو شنو؟.
• الدكتور قال لينا ممكن نديكم (التميح ود حسن) تدفنوه..وتتخارجوا من هنا…الدكتور فاكرنا عاوزين الجثمان.
• قلنا ليه (التميح ود حسن) نعمل بيه شنو بعد ما مات واصبح جثة!!؟ – نحن عاوزين نتيجة الفحص.
• عاوزين شهادة البحث !!.
• لو نتيجة الفحص ما طلعت – نحن ما بنتزحزح من هنا.
• اللواري القدامك دي يا دكتور اتجاهن بتحددو نتيجة فحص الكورونا.
• غير كدا ما عندنا طريقة.
• عشان لو طلعت (كورونا) تشوفوا ليكم مناطق عزل لي 710 شخص.
• المهم نحن 48 ساعة قدام المستشفى ..لا بنأكل ولا بنشرب.
• ولا بندخل فيس.
• وقت النتيجة ظهرت بعد 48 ساعة، والنتيجة طلعت (سلبية)…والتميح ود حسن طلع ما عندو (كورونا) – شلنا الجثمان زي (العريس) ورجعنا الحلة …ونحن نهتف ونغني وننطط.
• تقول راجعين بيه حي.
• ناس الحلة قالوا لينا في شنو؟…(التميح ود حسن) ما مات؟.
• قلنا ليهم ابدا ..(التميح ود حسن) مات وشبع موت، لكن (التميح ود حسن) طلع ما عندو (كورونا).
• الله شافنا.
• مشينا (دفناهو) – الحلة ما فضل فيها زول – أي واحد فينا كان ما مصدق…التميح ود حسن ما عندو (كورونا)!!.
• يا زول (الكورونا) قطعت قلبنا.
• والله عروقنا (نشفت).
• نحن من الكيزان للكورونا!!.
• والله (الكورونا) دي لو ما شفتوا ليها (لجنة ازالة التمكين) ما بتقدروا عليها!!.
• ………
• ترس اخير /
• مرة عندنا زول طقتو (عقرب)…قبل ما نصل به المستشفى (مات)… وصلنا المستشفى قالوا لينا (كورونا).
• قلنا ليهم الشيء شنو؟…الزول دا طقتو (عقرب) نحن شفناها…الكلام دا حصل قدام عيونا.
• قالوا لينا فعلا طقتو (عقرب) ، ما في زول قال حاجة – لكن العقرب دا كانت (مخالطة) ليها (دبيب) عندو (كورونا).
• سكتنا ما قدرنا نقول حاجة.
• نقول شنو تاني بعد ما قالوا لينا (العقرب) كانت مخالطة ليها (دبيب positive ).
• لكن الحاجة البتغيظ …العقرب الجابها للدبيب شنو؟…لو ما شقاوة لينا!!.

ريمونتادا الرياضية