* قناعتي أن أجمل ما كتب الشاعر الصادق الياس هي أغنية (مسكينة المحبة) التي غناها الطيب عبد الله بصوته السعيد.
* للصادق الياس عشرات الأغنيات الجياد غير أن (مسكينة المحبة) تعتبر من وجهة نظري هي (رأس مال) بالنسبة للصادق.
* أقول هذه رغم علمي بأن الشعب السوداني أحب عند الصادق الياس (من طرف الحبيب جات أغرب رسائل) و (أخت اللوم علي نفسي) وغيرها من الأغاني الحسان .
* يقول الصادق الياس عبر حنجرة الطيب عبد الله مخاطبا الحبيبة : (قبل ما تغيِّر دروبك كنا بنماسيك نصابحك .. رحت ترخص من مقامنا يلا بيعنا وشوف مصالحك) .
* قال: يلا بعينا وشوف مصالحك .
* قصد الصادق الياس (الحبيبة) بهذه الكلمات في ذلك الزمان ولكنه بطريقة غير مباشرة قصد (مجتمع الهلال) .
* في الهلال الآن يحدث (بيع ومصالح) بينما أصبح المقام العالي رخيص ورخيص جداً .
* الصادق الياس لم يقبل الإهمال والتهميش من الحبيبة .
* لم يقبل الإهمال والاستهبال لأنه كان يعطي ويهتم وهذا يظهر في قوله : (كنا بنماسيك نصابحك).
* يعني (بنتصل عليك صباح ومساء).
* أو بنقابلك صباح ومساء .
* طيب الحصل شنو يا الصادق الياس؟
* الحصل إنو الحبيبة فسَّرت هذا الاهتمام غلط هذا بخلاف إنها كانت مركزة في (حتات تانية) .
* (رحت ترخص من مقامنا) .
* يعني شايفنا دون المستوى .
* شايفنا ولا حاجة .
* (يلا بعينا وشوف مصالحك).
* الحاصل في مجتمع الهلال هو بالظبط ما ذكره الصادق الياس .
* نحن عندنا الهلال في مقام الحبيبة والحبيبة في مقام الهلال .
* هكذا يشعر جمهور الهلال في حضرة الهلال .
* حب مستوفي الشروط .
* لا فيهو شق ولا طق .
* ولكن للأسف هنالك فئة من مجتمع الهلال (أرخصت مقام الهلال وباعتنا وشافت مصالحها) .
* ولو نطق الهلال لقال لهم : (يلا بعينا وشوف مصالحك) .
* حتى وقت قريب كان الهلال (غاية)، عشان تثبت حبك ليهو لازم تكون في (وسيلة).
* وبكل أسف أصبح الهلال عند البعض (وسيلة) يصلون من خلالها لغايات تخصهم فقط .
* مصالح شخصية لا يراعون فيها الهلال .
* وهؤلاء خسارة الهلال بالنسبة لهم (ربح) .
* وهنالك فئة فوز الهلال بالنسبة ليها (خسارة) .
* وكل ذلك يتم من أجل المصالح الشخصية .
* فئة تتمنى فوز الهلال (عشان مصلحة) ولو كانت الخسارة تحقق لهم ذات المصلحة لتمنوها لأن (الغاية) هي (مصلحتهم) وليس (الهلال) .
* وهذه الفئة فيها زملاء صحفيين وكتاب وأقطاب صغار وحتى مشجعين تابعين.
* في نظرهم الهلال (مصلحة) .
* قد يصل بهم الحال مرحلة يضرون فيها الهلال فيكسبون .
* يظنون إنهم يكسبون وهم في الحقيقة يخسرون ويخسرون جداً .
* وللأسف لغة المصالح هذه أدخلها رجال المال الذين اقتحموا الوسط الرياضي وبالأخص (صلاح إدريس والكاردينال) وللأسف يسير على دربهما كوارتي والخندقاوي .
* ستظل معاناة الهلال قائمة طالما نحن نستغل الهلال وننظر له من منظور (الربح والخسارة) .
* صراعات وحروب ومشاكل بينما الهلال يتلاشى ويتواضع داخلياً ومحلياً .
* في ناس في الهلال ده أقسم بالله لما الهلال يتغلب ما بيطلعوا الشارع من شدة الخجل .
* في ناس أقسم بالله لما الهلال يكون (تعبان) هم ببقوا (عيانين) ..
* كم مريض دخل المستشفى بسبب الهلال .
* كم جائع قادر على الأكل في أفخم المطاعم ولكنه نام جائعاً بسبب خسارة الهلال .
* كم حالة طلاق في البيوت السودانية كان سببها الهلال؟
* كم حالة كومة سُكَّري؟
* كم حالة صدمة وغيبوبة وموت؟
* كم وكم وكم؟
* ده الحب.
* الحب غير المخلوط بالمصالح .
* ياخ جمهور الهلال ما قاعد يعاين في (جيب الكاردينال) ولا بعاين في (جزلان صلاح إدريس) ديل ناس بعاينوا في (السنتر وباص القون والهجمة المرتدة) .
* ناس بيهمهم هلال معافى ونظيف ومليان عافية.
* هلالاب عيونهم مليانة.
* ديل ناس الهلال الغبش والبحبو الهلال عشان هو الهلال.
* ما منتظرين حاجة من زول لكنهم منتظرين حاجات من الهلال.
* والهلال بهذه الطريقة سيسعد فئة معينة تهمها مصالحها على حساب ملايين تهمهم مصلحة معشوقهم.
* العندهم مصلحة وغرض بسيطين، يفرحون عند خسارة الهلال وديل (ضد الكاردينال)، وآخرين مع الكاردينال يجمِّلون له الغلط ويصفقِّون له عند الخسارة .
* جمهور الهلال مطالب بحماية الهلال مهما كلفهم ذلك من شتائم ومشاكل ومتاعب.
* ونركب صافنات ونجيبه (هلالابية) وأصلو الزول بيموت والذكرى تفضل حية.
* و..و..
* والله مسكينة المحبة البتمشي لناس ما بتقِّدر.
