إعلامي يتعرض لإغرب عملية سرقة واحتيال من شبكة (معاك قدام)…

الخرطوم – كورة سودانية

رصدت (كورة سودانية) قصة سرقة واحتيال اغرب من الخيال تعرض لها الإعلامي “مصعب خليل” المذيع بقناة النيل الازرق وتعود تفاصيل القصة حسب رواية الإعلامي “خليل” والتي بدأها بضرورة أخذ الحيطة والحذر و يقول : (حابي احكي ليكم عن قصة مؤسفة حصلت لي وانا ماشي الشغل التلات الفات الساعة 10:42 19/1/2021 ، عندي صحبي منتظرني في الشارع المتجة شمال الي الكبري الجديد وانت جاي من علي الجنوب متجة لي امدرمان بعد نفق جامعة السودان الغربي تحديدا المكان داك علي طول بتكون فيهو زحمة بتاعت ناس منتظرين المواصلات لاقيت صحبي ومن العربية ما نزلته سلمتو قروش من درج الطبلون اثناء ما فتحت الدرجة الظاهر كان في جماعة وافقين وشافوني اديتو قروش ورجعته الباقي ، ويواصل “مصعب في السرد” صحبي قالي هوي مع السلامة ي مصعب الوكت داك الظاهر في واحد سمع وحفظ اسمي واتصل بي المجرميين المعاهو في الشارع قدام ووراهم اسمي ، دورته مشيت وانا سايق اسمع ليك صوت واحد بقول ي مصعب اقيف اقيف ، فجاءة سمعته الصوت قلته ي ربي دا زول بعرفني احسن اقيف واوصلو لانو سمعته اسمي ، بعاين بالمراية عشان اعرفو دا منو قام اتحرك علي جاري وشايل شنطة بعديهو بي ثواني الناس المعاهو جو علي واتحركو بالدور عشان احسن انهم ما مع بعض ، وانا الزمن داك بتكلم بالتلفون فتح الباب وعاينته في الشخصية ما عرفتو لابس كمامة كمان سلم علي الناس المعاهو فتحو الباب وركبو بعد ما عرفتو قلته احتمال مصادفة ساي الصوت زول كورك لي زول في الشارع اسمو مصعب ، وانا بتكلم بالتلفون قلته ليهم ما واصل الكبري لافي مع المنحني بتاع بنك السودان المركزي قالو لي انحنا واصلين قبل الملف ، الظاهر الساعة ديك خته الشنطة وغطاني بيها علي رجلو الشمال وطوالي فتح الدرح وشال مبلغ خمسين الف جنية وقفل الدرج بي كل احترافية مع الملف قالو لي انحنا واصليين هنا محصلين الشركة نزلو كلهم وفاتو وانا واصلت ، وصلت الشغل افتح الدرج عشان اشيل القروش عشان اديها لي صاحبها عليم الله ما فضل لي الا افرتك العربية صامولة صامولة وبطمن في نفسي انها وقعت في العربية تحت الكراسي دي احتمال اكون فتشت خمسين مرة كل مرة بجيب زول بقول احتمال نظري كعب والظاهر فعلن نظرتي كانت كعبة لمن حسيت بيهم ناس كادحيين وطالعيين لي لقمة العيش الحلال .
سبحان الله الناس ديل بس شعورهم شنو يعني هسي القروش وبتكمل وبتخلص يعني في اكعب من انك تجازي الزول بي حسنه وانت بالسوء دا
انا حكيت القصة دي والله عشان تبقى عبره للناس وتعمل حسابها لانو بالجد البلد وصلت لي مرحلة خطرة من النهب والسرقة وغيرها من القصص الاجرامية الكل يوم بنسمع بيها وتفاصيل الاجرام الوصلت لي ابعد مراحل الذكاء في التكتيك
وصلته القسم وحكيت لي ناس مكتب المباحث مشكورين ، ووضحو لي انها شبكة اجرامية اسمها (معاك قدام) بتعمل في طرقات محددة وذكروها لي بالاسم ووضح لي ممكن كان يعملو فيك اي شي لو شفتهم في لحظتها وحاولته تقاوم وتحديدا القصص والبلاغات من النوع دا جاتهم كتير في الايام الفاتت وقبضو عدد منهم وان شاء الله ناسي يكونو من ضمنهم
وختم خليل حديثهة بأنه لا يدعو لي تلاشي المروءة في شعبنا الجميل لكن الناس تبقى حريصة وواعية للحاجات دي عشان ما تدقسو الدقسة الحصلت معاي اخوكم مصعب خليل لسة حارقاهو الخمسين مليون و ربنا يعوض ودي قسمتها ).

– يذكر أن الإعلامي مصعب خليل كان من ضمن الوفد الإعلامي السوداني الذي توجه نهاية العام الماضي لجمهورية مصر من خلال المنحة التدريبة لمذيعي ومقدمي البرامج والمراسلين بالمؤسسات الإعلامية والتي تكفلت بها جمهورية مصر واقيمت في مدنية الإنتاج الإعلامي هناك .