إفتتاح الجوهرة .. مليار لـ(فول الحاجات) ونص مليار لـ(الفشار) !!

بالعربي الكسيح
محمد الطيب الأمين
إفتتاح الجوهرة .. مليار لـ(فول الحاجات) ونص مليار لـ(الفشار) !!

* من عبقرية الشعب السوداني أن (ربع كيلو اللحمة) عندو (نص) ..
* في الجزارة هنالك (نص ربع) ..
* و(نص الربع) قديم ومعروف لكل الناس البسطاء في بلادي ..
* والخوف كل الخوف أن يتم بيع اللحم بـ(الوقية) مستقبلاً..
* وبما أن ذلك كذلك فنحن ننصح الناس بأن يوثقوا للحظات شراء اللحمة بواسطة كاميرا الموبايل ..
* الصورة (السيلفي) الأيام دي يا تأخدها مع (كيس النايلون) ويا كمان تأخدها مع (الجوهرة الزرقاء) ..
* سيلفي مع (كيس النايلون) للذكرى والتاريخ، وسيلفي مع (الجوهرة الزرقاء) للمغرزة والتحشيش ..
* قالوا الأيام دي طالبات جامعة الإحفاد (القيافة) بيمشن يتصورن سيلفي مع الجوهرة الزرقاء ..
* بمناسبة الأحفاد ..
* إنتو قاسم بدري ده هلالابي ولا هلالابي زعلان ؟؟
* لو هلالابي يبقى.. (كلنا قاسم بدري)، ولو كمان مريخابي يبقى (ما ليهو حق يضرب البت) ..
* وغايتو جنس غايتو ..
* يستهل منتخبنا الوطني اليوم مشواره في (الأمم المحلية) بالمغرب ..
* ورغم أن إعداد منتخبنا (مش ولابد) إلا أننا نرجو ظهوراً مشرفاً لصقور الجديان ..
* النتيجة مهمة ولكن العرض يحفظ ماء الوجه إذا (تعززت النتيجة) ..
* كل التوفيق لمنتخبنا الوطني ..
* (الفلس) وحده جعل المريخ المشهور بـ(الإصيفر) يلجأ للمدرب محمد عبد الله مازدا الشهير بـ(البلابل) ..
* مدفور ولاقى بلابل ..
* مازدا هو أكثر مدرب في التاريخ يحافظ على (الخسارة) ..
* البعجبني في مازدا إنو عندو إصرار عجيب على الخسارة بـ(3) ..
* ما بيحب يخسر بـ(2) ..
* ولا بيحب يخسر بـ(4) ..
* عندو غرام مع الـ(3) ..
* التعاقد مع مازدا يضمن لكل فريق الوصول إلى مرمى المريخ (3) مرات بغض النظر عن النتيجة النهائية التى ستنتهي عليها المباراة ..
* الخصم ح يجيب في المريخ (3) حتى ولو فاز المريخ بالخمسة .. في النهاية التلاتة واقعة ..
* وغايتو السنة دي بالذات يا متنا من الضحك ويا كمان الضحك كتلنا ..
* في هذه الأيام ما إجتمع (اثنين هلالاب إلا وكانت سيرة الجوهرة ثالثهما) ..
* وحقيقة نريد أن يكون الإفتتاح بروعة الإنجاز الذي تم ..
* تبقت أربعة أيام وهي كافية لتقديم دعوات عاجلة وإغراءات لكبار نجوم العالم والقارة الأفريقية والعربية بقيادة مارادونا والنيجيري أوكوشا والاماراتي عموري والمسيكني وموبوتو وساماتا ..
* ساماتا وكت ما جبناهو يلعب معانا خلوهو يجي يشاركنا فرحتنا ..
* والكاردينال لو داير يعزنا خلي يجيب لينا هيفاء وهبي فهي أخطر من ساماتا ..
* هيفاء وهبي أخطر من (الأخطر من ساماتا) ذاتو ..
* حفل إفتتاح الجوهرة الزرقاء لابد أن لا يغفل تكريم عدد من رموز الهلال وأعلامه نذكر منهم : (أسرة النجم الراحل ود الجنيد ، أسرة النجم الراحل والي الدين محمد عبد الله ، أسرة مشجع الهلال الراحل البلولة ، أسرة عمنا الراحل المؤرخ علي الفكي ، أسرة الراحل الأستاذ داوود مصطفى ، أسرة الراحل الأستاذ عبد المولى الصديق، أسرة الراحل إبراهيم طبيب نادي الهلال، بجانب تكريم نجوم هلال 87 وهلا 92 ، فضلاً عن تكريم كل رؤساء الهلال والعم شبشة) والقائمة طويلة ..
* المهم دايرين الإفتتاح يكون حدث ..
* ودايرين يوم الخميس يكون للبهجة والرقيص ..
* ودي دعوة مننا لكل المريخاب (عازمنكم لكن ما تجوا) ..
* عازمنكم لكن ما تجوا، إتفرجوا على الإفتتاح في قناة الهلال وأي مريخابي ما يقول (ماشاء الله) ما عافين ليهو ..
* يوم الخميس ما دايرين مريخابي يتقاطع بشارع العرضة ..
* الخميس خميس الهلالاب وبس ..
* لو ناس المريخ عندهم تمرين يوم الخميس لازم يتحول من أم درمان ..
* شوفوا ليكم أي محل تاني إتمرنوا فيهو ..
* الميادين راااااقدة ..
* شوفوا ميدان عقرب أو ميدان جامسكا في الثورة ..
* يوم الخميس ما فاضين ليكم ح يكون معانا الرئيس وح نكون مشغولين شوية ..
* وأنا شايف يكون أحسن لو المدرب مازدا منح لاعبي المريخ راحة من التدريبات يوم الخميس..
* يرتاحوا ويتفرجوا في حفل الإفتتاح ..
* أنا شايف كده وأي زول طبعاً حر في (شوفو) ..
* المهم..
* دائماً الزول لما يكون مفلس شديد وفجأة تجيهو قروش (رأسو بيضرب) ..
* والله صحي ..
* ما بيعرف يعمل شنو بالقروش ..
* تكون مفلس محتاج ليك مليون جنيه ..
* فجأة تجيك (10) مليون تقوم تجهجه باكاتك ..
* الحاجة دي حاصلة الآن مع ناس المريخ ..
* الناس ديل كانوا مفلسين لدرجة إنو ما قادرين يدفعوا لبكري المدية (20) مليون فقط ..
* وفجأة دخلت عليهم (200) ألف دولار وجهجهت باكاتهم ..
* قبضوا القروش دي وبقوا يتصرفوا تصرفات غريبة عديل ..
* مرة يجيبو مدرب برتغالي ومرة يقيلو محمد موسى ومرة يقولوا المعسكر في بورتسودان ومرة يقولو نجيب مازدا ..
* الناس ديل أنا ملاحظ ليهم مما قبضوا القروش دي تصرفاتهم بقت ما أوكي ..
* والله صحي ..
* والقروش كلها أربعة مليار أو قول خمسة مليار ..
* الخمسة مليار بتاعتكم الفرحانين بيها دي إحنا ح نجيب بيها (موية صحة وفول حاجات) على هامش إفتتاح الجوهرة الزرقاء ..
* قالوا الكاردينال رصد ميزانية مليار جنيه لـ(فول الحاجات) ومليار جنيه (مياه معدنية) ونص مليار لـ(فشار) ..
* قروشكم بتاعت السماني الصاوي دي بتروح عندنا ضيافة بس ..
* وأقول ليكم حاجة ..
* بعد ده كلو السماني الصاوي لما يرجع من ليبيا ح يكون لاعب الهلال ..
* وتبكو بس .. عين قطرة وعين مس ..
* ونركب صافنات ونجيبة (رباطابية) وأصلو الزول بيموت والذكرى تفضل حية ..
* و..و..
* والريد من قبلك ما كان ريد ولا بعدك شفنا …(زول بيقرض رغيف) ..

حمل تطبيق كورة سودانية لتصفح أسرع وأسهل

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملو التطبيق

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app