الأمن الغذائي

في السلك

بابكر سلك

الأمن الغذائي

*طبيعي جداً بعد أي ثورة يحدث انفلات اقتصادي قد يؤدي لزعزعة أمن الدولة
*ويعترف الناس للثورة بالنجاح لا لمجرد الإطاحة بنظام الحكم الذي ثار الناس لإزاحته
*ولكن مقياس نجاح الثورة يكمن في قدرتها على حسم وتحجيم التفلت والإنفلات الإقتصادي
*فتسعى لدرء ذلك الإنفلات بتحقيق الأمن وبسطه
*ليس الأمن العسكري بقدر ما هو الأمن الغذائي
*ولا الأمن داك
*لأن أي ثورة تخرج بكراهية مطلقة للأمن داك
*سيما وأن بطش الأمن داك وانتهاكه للحرمات يجعل منه هدف الثورة الأول في العداوة
*يبقى تحقيق الأمن بعد الثورات يحتاج لبسط الأمن
*طبعا ما الأمن العسكري
*ولكنه الأمن الغذائي
*فالأمن الغذائي يقطع الطريق أمام التفلتات (المقصودة) حال تقاعس أو إهمال أو نوم الأمن العسكري
*بصرف النظر عن أسباب ذلك إذا كانت ترجع لحسن نية أو ترتكز على سوء النية لا سمح الله
*فعلى حمدوك (التالت)
*أقول حمدوك التالت لأن حمدوك الأول كان مع ناس دكتور أكرم ودكتور البدوي
*وحمدوك التاني كان مع ناس دكتورة هبة الأنيقة
*أما حمدوك التالت فهو حمدوك الحالي فهو حمدوك ناس دكتور نجيب الرهيب ودكتور جبريل ودكتورة مريم
*القصد هو أن يعلم التلاتة حمدوكات
*وأن يعلموا أن أي بلد بعد الثورة بحتاج لأمن
*أمن غذائي من خلاله يتوفر الأمن بكل معانيه
*وسنعبر وقتها مرددين شكراً حمدوك
*ولتعلم يا حمدوك
*إننا نعلم بأن الفترة بعد الثورات
*هي فترة ولادة
*لا نريدها قيصرية بالبطن
*نريدها ولادة طبيعية
*نعاني فيها من ويلات الطلق
*كي نعرف قيمة المولود الوطن
*الوطن الديمقراطي
*بعد الثورة الأمة ستصبح أما
*تعاني الطلق
*وتطلق الآهات
*الله لييييييييا
*الله لي
*نريدها ولادة طبيعية بكل معانيها ومعاناتها
*كي نتنسم نسيم الحياة بعد خروج المولود المؤود فينا ردحاً من الزمان
*نتألم ونعاني الطلق
*ولكننا نؤمن بأن الولادة جات
*وسندعم بكل ما أوتينا من قوة
*عشان نلد طبيعي
*لا نريدها قيصرية تقوم على الدعومات الخارجية
*تلك الدعومات التي تشوش علينا طعم الوطن وقيمة الديمقراطية التي حبلنا بها شرعاً على فراش الثورة الصحيح
*والعمر فات
*وما أظن في ولادة بعد ده
*فلا تجهضوا حملاً يدغدغ الأرحام معلناً ميلاد وطن وسيم
*فاهمني يا حمدوك؟؟!!!
*المولود لا بت لا ولد
*المولود بلد
*بلد البنت والولد
*أها
*قال ليك مدرب صن داونز مما الكورة انتهت
*قال للاعبين خشوا جوه
*قدامي
*ودخلوا
*ووقع ليك فيهم جلد
*جايبين لي إتنين من عشرين؟؟؟
*ده نتيجة دي؟
*كورة زي دي مفروض تقفلوها عشرين من عشرين
*أسي الجماعة ديل فرقهم شنو من الناس القفلتوا كورتهم أربعة وعشرين من أربعة وعشرين؟؟؟
*ولفخ ليك اللاعب الجاب القون التاني
*إنت وكت بتعرف تخلي المدافع يفحط في مكانو
*مضيع ليك اطناشر قون في الشوط الأول ليه؟
*ناس يقفلوا كورة الأهلي القاهري خمسة من خمسة
*تجوا مع ناس، بطولة من بطولات الكاف ما عندهم
*تجيبوا ليكم إتنين من عشرين
*الليلة تعبتوا معاي
*قبلوا علي الحيطة وارفعوا إيدينكم فوق
*بلاء يخمكم
*قال ليك لي أسي مقبلين على الحيطة
*وليهو حق مدرب صن داونز
*ناديهو في رصيدو بطولة من بطولات الكاف
*عاد كيفن ما يفتري
*المهم
*كورة العشرين دي مفروض تكون كورة أبو عشرين
*لكن الجايات أكتر من الرايحات يا جمال سالم
*أيها الناس
*إن تنصروا الله ينصركم
*أها
*نجي لي شمارات والي الخرتوم
*أتانا الطلق يا والينا
*وأطلقنا واااايييينا
*يا
*يا مصانعنا ومزارعنا جينا
*أمن غذائي يحافظ على باقينا
*يا
*يا شوارعنا جينا

سلك كهربا

ننساك كيف والكلب قال الزلط ربط البلاد والزلط سلاح العباد
وإلى لقاء.