الإنسحاب من كأس السودان من مصلحة الهلال !!

قزاز ورذاذ

محمد الطيب الأمين

الإنسحاب من كأس السودان من مصلحة الهلال !!

* أعلنت اللجنة المنظمة عن برمجة مباريات كأس السودان.
* وقد حددت الرابع من الشهر الجاري موعداً لمباراة الهلال.
* وده طبعاً كلام فارغ.
* البرمجة دي (يبلوها ويشربوا مويتها).
* بالنسبة للهلال الدوري انتهى.
* الإتحاد العام يتصرف بطريقتو.
* يأجل كأس السودان أو يتلغي كأس السودان أو يترحل للموسم الجديد.
* هو كأس السودان طعمو شنو؟
* بطولة قاعدة تتفصل على مقاس المريخ.
* كأس السودان (حلاوة قطن) يضعها الإتحاد في فم المريخ بعد كل موسم يظفر فيه الهلال بكأس الدوري.
* بطولة لا عندها طعم ولا لون ولا رائحة.
* ولذلك لا اسف عليه.
* المهم.
* إذا صح أن الهلال قد إنسحب من كأس السودان فذلك أمر سيجد منا كامل الدعم والترحاب.
* مشكلة الإتحاد العام الناس الفيهو معظمهم ما لعبوا كرة قدم ولا بعرفوها.
* والله صحي.
* الهلال ينسحب دون تردد.
* وما في اي عقوبات بيقدر يصدرها الإتحاد.
* ولو بقت في فيها عقوبات من شاكلة غرامة 25 ألف جنيه والحرمان موسم.
* كلام ميت وبطولة شبعانة موت.
* واحدة من أهم أسباب تراجع مستوى الهلال هي الإرهاق.
* إرهاق ناتج من التغول الكبير الذي حدث للراحة السلبية.
* تلاتة مواسم تداخلت مع بعضها البعض.
* ما كان في راحة.
* الدوري ينتهي يبدأ المنتخب.
* المنتخب ينتهي يبدأ الدوري.
* نحن تاني ما بنسدد فواتير فشل إتحاد فاشل.
* لعب في زمن الراحة ما في.
* نسمع كلامكم ونلعب كأس السودان وندخل الموسم الجديد بنفس التعب والرفق.
* موسم كان ضاغط وقاسي.
* برمجة قاسية.
* ما صدقنا الدوري انتهى.
* والحمدلله الهلال تمكن من المحافظة على اللقب.
* الآن الفريق في الراحة.
* راحة أسبوعين.
* يجب أن يكون الهلال صاحب قرار في هذه المهزلة.
* لا تراجع.
* ولا استسلام.
* ومرحب بأي عقوبة.
* لو استجاب الهلال لنظريات الإتحاد الفاشل سيدفع ثمن عدم الراحة باهظا.
* كل تعب التسجيلات والمعسكر الخارجي سيروح شمار في مرقة.
* ولذلك يجب أن تكون لنا كلمة.
* وكلمة مسموعة.
* وبعد داك.
* إن شاء الله تمطر حصو.
* و.. و..
* وغايتو جنس غايتو.