الاشانتي لو حلقوا ليه بلوا رأسكم
صابنها
محمد عبد الماجد
الاشانتي لو حلقوا ليه بلوا رأسكم
• بعد هزيمة الاشانتي بالخمسة امس امام الهلال .. ناس المريخ ح يرجعوا تاني يتكلموا عن (تكافؤ الفرص).
• ونحن ما بنلعب.
• ونجيلة الهلال.
• والمطر.
• يا زول المطر الجابها شنو؟
• هسع البعمل فيه الهلال دا ما (مطر)؟
• المريخاب ح يقعدوا يتكسروا لينا في النتيجة دي .. عشان كدا نحن قلنا ليكم الاشانتي ما تغلبوه اكتر من اتنين.
• الجماعة ديل قلبوهم كعبة .. وما بيستحملو.
• الناس ديل ما عندهم (حيل) للكلام دا.
• كرشوم عندو باقي قروش في عقدو لسها ما استلمها من المريخ.
• وبكري المدنية عندو صالون بكمل فيه.
• ح نسمع شكية وبكاء … وثكلي وجعري من المريخاب .. ح يقولوا مفروض يشاركوا ثلاثة محترفين فقط في المباراة.. خمسة كتار … ناس صلاح نمر ديل (مشجع) محترف ممكن يجهجهم ليك.. مع خمسة لاعبين محترفين يعملوا شنو؟
• يا جماعة ديل (نجيلة) الهلال اعترضوا عليها … خمسة محترفين مرة واحدة في مباراة ح يعملوا معاهم شنو؟
• يقبلوا وين؟
• ويتصرفوا كيف؟
• الموضوع دا صعب عليهم.
• صلاح نمر قالوا شاف هدف ليليبو التاني في اليوتيوب مسك ركبتو .. وقعد يشكي من (الانكل).
• البشتنة بعد العمر دا ما حلوة.
• اقول ليكم شيء.
• ناس المريخ ديل (برد) بقطع قلبهم.
• مع (5) محترفين في مباراة واحدة يعملوا شنو؟
• مطرة بتقطع نفسهم.
• ليليبو كيف؟
• فريق الواحدات فاز على المريخ سبعة .. بسبب (المطر).
• اكرم الهادي سليم سألوه عن اسباب الهزيمة قال : (المطر).
• تقول واقف ليه تحت (راكوبة).
• والراكوبة ما بتشكر في الخريف.
• مرة حدثت عاصفة في الخرطوم المريخ طلع من البطولة الافريقية عندما كلان المريخ بيلعب امام كانون الكاميروني.
• عاصفة جابت خبرهم.
• اها يا ناس المريخ عشان اكون واضح معاكم … الهلال المرة دي جمع (البرد والمطر والعاصفة) في فد مرة.
• البرد والمطر والعاصفة اتلموا في تشكيلة واحدة.
• يعني وقت تلعبوا امام الهلال ح تلاقوا البرد والمطر والعاصفة.
• ح تقبلوا وين؟
• ألحقني يا اسامة.
• انجدني يا معتصم.
• امرقني يا حلفا.
• الجاكومي ح يتكسر ليكم في الاتحاد.
• وهيثم كابو ح يفرش في الاكاديمية.
• المريخاب اعترضوا على مشاركة خمسة محترفين في المباراة .. وما اعترضوا على وجود قوات الاتحاد الافريقي في دارفور.
• يعني بقت على محترفين الهلال.
• الكنغولي ليليبو … (مطر) نازلة من السماء .. بنزل على المدافع من الاتجاهات الاربعة.
• ما بتفهم اي شيء.
• شيء تشوف وشيء ما تشوف.
• المدافع فكتور …المدافع (العاصفة). بخش على المهاجم زي (الضلمة).
• يمكن قولة (كع) تسمع بيها برة.
• يعني في محترف في الهلال (مطر).. وفي محترف (عاصفة).
• في ناس هسع بيسمعوا كلامي دا.. بقوموا يشيلوا (اللحاف) ويدخلوا جوة.
• يا جماعة اصبروا خلوني اكمل ليكم الكلام.
• ما تقاطعوني.
• ما تلفحوا الكلام ساكت.
• نحن واقفين وين؟
• واقفين في (العاصفة).
• محترف الهلال النص سنغالي ونص غامبي لامين جارجو … اي لاعب بدخل عليه بيشعر بالبرد.
• دا بكلفت ليك (الباكات) في حركة واحدة.
• الباكات بيضاروا منو متل (كراسي المناسبة).
• شوف عيني امس باك الاشانتي كان برجف قدام جارجو متل (قالب الجلي).
• قالوا في صحفي سأل مدافع فريق الاشانتي عن اسباب الخسارة امام الهلال بالخمسة.. المدافع قال ليه والله انا وقت دخل علي لامين جارجو .. شعرت ليك (ركبي) ديل بتخابطوا .. و(عيونو) بقت في نص ضهري … وشعرت من غير ما اشعر بالبرد… ونخرينا جرن.
• الصحفي قال ليه انت بدل ما تجري انت .. تجري (نخريك)… عشان كدا اتغلبنا خمسة.
• ناس المريخ بعد (الخمسة) دي تاني ما بيلعبوا.
• يا جماعة الناس ديل بدون محترف شالوا الكورة وهربوا … مع خمسة محترفين يعملوا شنو؟
• ح يرجعوا تاني يتكلموا عن (تكافؤ الفرص).
• وعن (الحريات).
• والعدالة.
• والسلام.
• والسيول والامطار والفيضانات.
• يا جماعة …الخرطوم دي (مطرة) ساكت جهجهتها… كيف حال الخرطوم بتبقى وقت المطر والسيول والفيضانات يتلموا في فد مرة.
• ناس كرشوم يعملوا شنو؟
• الصيني فسخ.
• عاقل واعي.
• زول فاهم وعارف.
• ناس صلاح نمر القاعدين ليها شنو؟
• الجاكومي وجماعتوا قالوا ح يمشوا (كاس) بسبب قضية (الصيني).
• طيب الجماعة ديل وقت يشوفوا (ليليبو) ح يمشوا وين؟
• ح يمشوا (المحكمة الجنائية)!!
• امس شوف عيني .. حارس الاشانتي بعد المخالفة التى نفذها (ليليبو) وسجل منها الهدف الثاني خبط القائم.
• الحارس عاوز يروح فيها.
• الحارس طلع بعد الهدف طوالي محمول بالنقالة.
• كلام زي دا محمد مصطفى او منجد النيل او بيتر بقدروا عليه.
• وكان للامين جارجو … المدافع البدخل عليه .. بشرحوا في حتتو.
• المدافع ما بتعرف خشمو من نخرتو.
• انا اول مرة اشوف لي مهاجم بطلع (السمنة) من اللعبات المشتركة.
• شوف عيني امس مدافع الاشانتي بعد نهاية المباراة حايم في موقف جاكسون .. بيسأل من مقر البعثة.
• خمسة كتيرة يا ناس.
• خمسة وعلى الاشانتي كمان.
• والله دي ولا في الاحلام.
• نحن زمان اسم الاشانتي دا بنرجف منو.
• هسع نغلب الاشانتي خمسة.
• كتيرة.
• والمشكلة ما في الاشانتي.
• المشكلة في المريخ.
• والله الخمسة دي تكون وجعتهم اكتر من الاشانتي.
• نحن اولادنا ما شاءالله.
• يغربلوا .. برة وجوة.
• قالوا الغربال جاب ليه هدفين في منتخب جيبوتي.
• وياسر مزمل جاب ليه هدف.
• الغربلة شغالة هنا وهناك.
• ديل وقت يتلموا في تشكيلة واحدة يحصل شنو؟
• الموضوع دا صعب شديد على المريخاب.
• اقول ليكم شيء.
• شيلوا شريط مباراة الهلال والاشانتي .. وامشوا على حميدتي.
• يمكن حميدتي يلقى ليكم حل.
• اصلو ناس الدعم السريع قالوا بيصنوا في استاد المريخ.
• وعشان اكون واضح معاكم .. ليليبو دا .. كتيبة من الدعم السريع ما بثبتو.
• الزول بمشى على القون زي (القدر).
• لا بقيف.
• ولا بتلفت.
• ما شاءالله.
• الهلال رجع.
• باقى لينا (حمدوك).
• ونقفل على كدا.
• انا قلت حمدوك.
• يا زول الدخل حمدوك شنو؟
• والله ناس لامين جارجو ديل يمكن يعملوا اي شيء.
• اتوقع منهم اي حاجة.
• اصلو ما في حاجة غريبة.
• بالمناسبة … امس الوطنيين حاجة تانية كانوا في المباراة.
• صلاح عادل اي كورة قاطعها .. تقول شغال طيار حربي.
• الشيخ محمد …تقول بيلعب في شارع النيل.
• هدوء وروعة .. واحمد المصطفى.
• اقول ليكم حاجة .. باصات الشيخ زي اغاني احمد المصطفى.
• منتهى الهدوء.
• والروعة والجمال.
• امجد قلق .. من دربو دا مفروض يمشي يلعب في الدوري الانجليزي.
• مبارك عبدالله .. تطور بشكل عجيب.
• موقف صديق … قلب على تيري هنري.
اها دا الكلام الما بينفع؛ شيل الرحمن في قلبك وقول بسم الله؛ دي مباراة ودية اعدادية؛ و في احيان كثيرة الوديات لا تعطي صورة كاملة و المحك الحقيقي في التنافس الرسمي. اصبرو يا إعلاميين و اوزنو كتاباتكم و اتركو الفشخرة الما ليها لزوم حتى لا تدخلو الغرور على اللاعبين والادارة فيحدث زلزال يطمر كل شيئ.
و بعدين يا اخي سيب المريخ و عيب منك السخرية من لاعبين هم الآن عماد المنتخب الوطني. انتم لا تتعلمون الدرس ابدا؛ فخلال العامين الماضيين تتعمدون التقليل من شان المريخ و لاعبيه و معظم مباريات الديربي كسبها المريخ و بالنجوم الذين تسخر منهم. لا تكونوا كاعلام المريخ الذي يسوق صحفه بالاساءة للهلال و لاعبيه. دعو نتائج مباريات هي التي تحدد الأفضلية و ليست الانطباعات الشخصية. الشفقة التطوير.
حسبي الله و نعم الوكيل.
يا محمد عبدالماجد المشجع الهلالي مقالك دا حانحتفظ بيهو وحا نرفعو ليك يو تطيرو من الابطال نذكرك بمقالك دا يا مشجع الصفر
( o)
الدولي الكبير
الصفر الكبير ده انت عايش تحته في تصنيف الكاف حتي هذه اللحظة وبسببه لعبت كثيرا في الابطال بصحبة راكب وانت وصيف. غايتو دي سلاطة لسان وقلة احسان ودائمًا البراميل الفارغة تحدث ضجيجا اكثر.
الله يجازي اليخماو وكوراله الذي افلح في غسيل ادمغتكم بصابون تايد.
انت اقنعني في المباريات الرسمية. انا ما بقتنع في المباريات المدفوعة التمن.
هههه . الماشاف البحر تخلعو الترعة ..متلازمة الصفر الدولي محتاجة لى علاج وسريع جدا ..إسقاطاتكم الصفرية دائما تبين من خلال كتاباتكم يا اهلة .. لكن السنة ان شاء الله المريخ شامي ريحة مطار … الريحة دي انت مابتشموها اصلها انوفكم صفرية
علي ما يبدو نشوف هلال يهز الارض انا وقفت من متابعت الكرة السودانية من زمن ريتشارد جاستن و علاء الدين جبريل والمجموعة
ربنا يحيينا نشوف سنة 23 دي
سيدي الفاضل كيان الهلال والمريخ عظيم ولا يحتاج الي كلام فراغ كسبت مبروك لكم ومافى داعي للتقليل من شان النادي وانصحك انت تكون محايد أنت صحفي نحن الان فى كندا لا نري اي تقدم فى الكورة السودانيه ابدا بسبب الاعلام المتخلف نحن محتاجين منتخب وطني افضل يمثلنا أحسن تمثيل وكذلك الفرق وخليك محايد وأنسي التعصب الذي هو سبب تخلف الكورة فى السودان
جيبلك كأس بعداك قول كلامك ده .ولا فرحتكم فقط في المباريات الوديه والمهرجانات والاعتزالات هههههههه .
اللهم ٱتنا في الدنيا حسنه وفي الآخره حسنه وقنا عذاب النار.
اللهم إنك عفو تحب العفو فعفو عنا.
اللهم أعني على ذكر وشكرك وحسن عبادتك.
اللهم صل وسلم وبارك على نبينا وحبيبنا وسيدنا محمد.
لا إله إلا انت سبحانك إني كنت من الظالمين
لا إله إلا الله وحده لاشريك له له الملك وله الحمد وهو على كل شي قدير .
سبحان الله
والحمدالله
ولا إله إلا الله
والله أكبر
ولا حول ولا قوة إلا بالله
كلام محمد عبد الماجد فاضي لا معنى له يمكن أن يصدر من عدو للهلال يعمل على خداع لاعبيه و مدربه بإن كل شئ عال و الحقيقة غير ذلك كما شاهدناةفي مباراة سيمبا التنزاني التي فاز بها الهلال نتيجة و ليس لعبا.المريخ له حاليا خلطة من المحليين و الدوليين قد تتغلب على خلطة الهلال التي كلها تقريبا اجانب معظمهم من المستوى الثاني أو الثالث.تذكر ان ٨ من
أساسي الفريق الأهلي هم من المريخ و قد احرزوا نتائج مشرفة حتى الآن.حتى فريق الناشئين تفوق فيه لاعبي المريخ.
الهلال يحتاج إلى زمن ليتأقلم لاعبيه الأساسيين الذين بالفريق الأهلي مع زمرة الأجانب و حتى ذلك الحين لا أمل في نتائج مشرفة او حتى هزيمة الند التقليدي