الامارات عندها وزير سعادة وعندنا وزير يبحث ليناعن التعاسة

تغريدة واتساب
معاذ ابومؤيد
الامارات عندها وزير سعادة
وعندنا وزير يبحث ليناعن التعاسة

ياسعادتك سامعنا؟؟
سالناك بالله سامعنا؟؟
بالله عليك بماذا تحكم ومن تستشير!!!
نبض المدرجات دا قاعد يصلك؟؟
في صحف قاعدة تصل مكتبك؟؟
المريخ يعاني وانت عايز تمدد تاني!!!
انت قايل الثلاثة اسابيع دي بسيطة ولاشنو!!!
يعني تحبط الجماهير والدنيا قبايل رمضان!!!
ماذا تستفيد من عذاب نصف الشعب السوداني؟؟
عندك رغبة في مسح المريخ من علي الخارطة الرياضية!!!
خليك واضح معانا بدل حراق الروح!!
من تمديد لتمديد عندك رغبة نوصل الليق؟؟؟
ناس قالو ماعندهم رغبة في الاستمرار واختاروا الرحيل!!
وانت عندك رغبة اكتر منهم في الانهيار والدمار!!!
••••••••••••••••••••••••••
انت بتتفرج مباريات عالمية
خليك من عالمية
عربية بتتفرج
شفت الدوري السعودي!!!
خليك من السعودي
مصر والعراق الماعندهم استقرار امني !!
بتحضر مبارياتهم ؟؟
شايف البيئة الرياضية
قاعد تتحسر مثلنا
ولا عادي الموضوع عندك
ولا مابهمك الرياضة السودانية!!!
انت شايف الرياضة دي من الاولويات !!!
عندك رغبة وخطة انو السودان يصل للمنصات !!
سؤال تاني بسيط اين ملاعب ابوهريرة حسين للناشئين !!!!!!!!!
عارف عدد اندية الخرطوم ومناشطها؟؟
الكلام الفوق دا بس عايز اصل انو عندك احساس ؟؟؟
لو متوفر عندك طيب ماتحس بشعب المريخ الغلبان دا !!
المريخ يعاني وانت لاتبالي وكل مرة تمدد تاني!!!
يسموه شنو بالله عليك
ناشدناك وطلبانك ولحياة لمن تنادي !!
ونشوف في الافق ضياع النادي!!!!
••••••••••••••••••••••••••
طيب كلام التلفزيون دا رح مع الهواء؟؟؟
صرحت وقلت رجال المريخ يجتمعوا
طيب رجال المريخ اجتمعوا واتفقوا !!!
اها مع البنزين الغالي وضيافة الوالي دا كلوا في الفشوش!!
ماشايف اجتماعهم دا بستاهل وتتنازل عن تمديداتك واقتراحاتك!!!
لو الموضوع فيه حاجة ونحن ماعارفناها ماتكلمنا كلم كبارنا ديل وخليهم مايجتمعوا ويتعبوا روحهم!!
لو الموضوع خارج عن ارادتك وفيه ترضيات برضوا كلم كبارنا يوصلوا لينا الرسالة!!!
الجمهور في حالة غليان
الجمهور واصل مرحلة غثيان !!
ماسمعت بوزيرة السعادة في الامارات الشقيقة !!
نحن ماعايزين وزارة للسعادة عايزين قرار منك يطلعنا من حالة التعاسة !!!
ثلاثة اسابيع يوم ورا يوم والمدرج حيعاني الامرين!!!
كان نفسي تكون مشجع وتعيش معانا الايام دي وتشوف معاناة الجماهير!!!!
••••••••••••••••••••••••••
مسك الختام
اخترت طريق قاسي وصعيب مابنحملوا ياسعادتك!!
احتكم الي صوت العقل وحس بملايين العاشقين !!
المريخ نادي كبير
والجمهور مابرضى في الكبير
خلينا في فراغ اداري ارحم لينا
خلي المريخ يعاني ارحم لينا
بس ابعدنا عن صراعاتكم السياسية والترضيات المؤتمرية!!!
••••••••••••••••••••••••••
ونحن علي المدرج ندعم ونشجع ونتفرج
علينا بالدعاء والالتقاء والتفاكر في ماهو آت !!!
نادي المريخ يسع من الحبايب الف
من بداية الموسم نستمع للتخدير
ونستمع للتمديد!!
ونقول باكر احلى!!
الحوبة حوباتنا ياجماهير المريخ والكرة في ملعبنا !!!!
••••••••••••••••••••••••••
همسة اخيرة
ثبت بما لايدع مجال للشك انه هناك اناس تستمتع بمعانتنا !!!
اثبت الايام صدق حديثنا ان المريخ في مفترق طرق!!!
نكون اولا نكون
من بداية الموسم نستمع للبيانات ونسمع للتمديد!!
ونستمع الي تصريحاتكم شي من الوزير وشي من لجنة التدمير ومرات تصريحات فردية ومرات صور جماعية !!!
طبعا نحن ناس بالنا طويل !!
لو ماطويل نصبر علي كريم الحسن ولجنة التدمير قرابة التسعة شهور!!!
لكن ان الاوان توصلكم بياناتنا وتوصلكم تصريحاتنا ممهورة بتوقيع جماهير نادي المريخ السوداني!!!
لجنة الشورى انتظرناكم كتير لحدى ما رجولنا نشفت !!
ويا اعلامنا وصحافتنا اقيفوا في صف الجماهير !!
سخروا اعلامكم وصحفكم وعناوينكم ومانشتاتكم لقضيتنا
قضيتنا
جماهير المريخ تطالب برحيل التسيير
وكف يد الوزير
جماهير المريخ تعاني وحزينة علي النادي
مرة في العمر سخروا صحفكم لنداءت الجماهير !!
اتجرعوا كاس الشجاعة من اجل المريخ الكيان ومن اجل الجمهور زبونكم الفعال !!!
••••••••••••••••••••••••••
خارج النص
كم رسالة للمهتمين بقضية المريخ
(الوزير) ****
جماهير المريخ وصلت مرحلة لايعلم بيها الا الله ابعد عننا التسيير وتذكر انو انت في موقع امانة مسؤل عنها امام الله
(لجنة التسيير)*****
شكر الله سعيكم ماقصرتوا بس الزمان ليس بزمانكم ولا المكان يسعكم ويسع الجماهير
ترجلتم نعم لكن نرجوا تمسكم بالرحيل المريخ يضيع بوجودكم!!!
(مجلس الشوري)****
اعتمدنا عليكم في كثير من الاوقات
هل مجلس الشورى منشق او مخترق او انكم لاحول ولاقوة لكم !!!
جماهير المريخ هي من دعمتكم في قضاياكم ادعموها في قضيتها،،،
(جمهور المريخ)****
الكرة في ملعبنا صوتنا لابد ان يصل الي اي مكان المريخ هو متنفسنا الوحيد هل نموت اختناقا ونحن لانستطيع فتح نافذه لاستنشاق الهواء
هل كلمة صفوة هي من اوصلتنا لمرحلة الخنوع والخضوع وانتظار المصير المؤلم!!!
(اعلام المريخ)****
جماهير المريخ هي ذادكم لصحفكم هي من تشتري وهي من صنعت منكم اسماء مشهورة
هي من كانت الرقم الصعب في نسب توزيع منتجكم
الا تستحق منكم الوقف بكل قوة في وجة من اراد سلب ارادتها وخلق من جماهير المريخ جمهور خانع ذليل!!!
الا يستحقون مانشيتات قوية تزلزل وترعب من اراد ذلك!!!!
••••••••••••••••••••••••••••••••••••••••••••••••••••
تغريدة مرورية
اتصالك مهم لكن حياتك اهم
لاتسرع فالموت اسرع
الطريق ملك للجميع فلاتفتكر انه ملكك وحدك وتقعد تشتم في خلق الله،،،
القيادة فن وزوق وادب
طولك بالك لاتنفعل
طول بالك من اجل عيالك
تزكر دائما
ان اسرتك وعيالك في انتظارك
••••••••••••••••••••••••••
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية……..
التغريدة لن تخرج خارج نطاق المجتمع المريخي نهائيا الا ماندر
نقد الذات يوصلنا الي الامام والي المنصات باذن الله ،،،،،
====================

حمل تطبيق كورة سودانية لتصفح اسهل

لزوارنا من السودان  على متجر 1موبايل

http://www.1mobile.com/net.koorasudan.app-2451076.html

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app

لزوارنا من الصين الشعبية

http://www.androidappstore.mobi/EN/displayproduct/112531/playstore