البايرات روابح
في السلك
بابكر سلك
البايرات روابح
*دولة القانون
*هكذا نصف دولتنا بعد الثورة
*الديمقرطية
*هكذا نختال في الشوارع زهوا
*كنت قبل الثورة أحلم بالثورة
*وأبصم بالعشرة أنها لن تسرق هذه المرة
*لأننا تعلمنا من تجاربنا
*وجاءت الثورة
*وسكب الشباب الدماء والأرواح فداءً لدولة القانون والديمقراطية
*وانسكبت من عيون الأمهات دموع الفراق على فلذات الأكباد وامتزجت بدموع الفرح عند نجاح الثورة وسالت على دموع الأسى عند فض الإعتصام
*دولة القانون
*هكذا نطلق على دولتنا الحبيبة
*ولا زال الناس في دولتنا يموتون في دهاليز التحقيق
*دولة القانون ولا زالت الإنسانية تنتهك آناء الليل أثناء التحريات
*كل ذلك يحدث في دولتنا
*ودولتنا دولة القانون والغانون
*نقدل فوق عديل الديمقراطية
*نظنها حقوق فقط وننسى أنها واجبات على العاتق قبل أن تكون حقوقا تُكتسب
*ديمقرطية
*والفوضى تطحن في السلوك
*أو قل ما تبقى لنا من سلوك محترم
*انظروا إلى الشارع
*موتر بدون لوحات يمتطيه تلاته هيبز يصرخون ويزغردون ويملؤون الطريق ترابا وكترابه وضجيجا
*ديمقراطية خلي بالك
*ركشة عاكسة الشارع على عينك يا تاجر
*وافتح خشمك كان راجل
*عربية تقطع الإشارة الحمراء مرغمة أصحاب الحق في المسير على تفاديها
*وجوّه عين بوليس الحركة
*بتاع مطعم أو كافتيريا يسكب المياه الكريهة بأخلاق كريهة على الزلط في قارعة الطريق لأن الديمقراطية حسب فهمو تسمح له بذلك
*أيها الناس
*كنت أحلم بالثورة وتحقق الحلم
*كنت أبصم بالعشرة على عدم سرقتها من شعب صنعها
*لأني كنت واثقاً من أن الرقيب الداخلي لأي مواطن هو من يحمي الثورة من السرقة
*فتمت سرقة الثورة بالسلوك العام في شوارعنا مننا برانا
*وبقينا حاميها حراميها
*تمت سرقة الثورة من القواعد قبل مخاصصات القمم التي لا زالت تأتمر من مصادر القرارات العميقة
*أيها الناس
*يقول علماء اللغة إن كل اللغات جميلة
*وما دخلها من قبح أدخله الساسة الذين استخدموا تعابير اللغة وكلماتها في غير معانيها الجميلة
*فهل آن الأوان لنا كشعوب أن نعيد للغة جمالها ونضارها
*ولا نعكس الشارع ونقطع الإستوب ونفحّط بالموتر زي ما دايرين تحت ستار دولة القانون والديمقراطية ؟؟؟؟؟؟
*أيها الناس
*وين لجنتنا الإقتصادية القالت يا أنا يا الدولار ؟؟؟؟
*شايفين الدولار
*لكن اللجنة ليها غيبة
*عل المانع خير ؟؟؟؟؟
*المهم
*ناس الأهلي القاهري الكبير
*مشكلتهم كانت شنو مع تركي آل الشيخ؟؟؟
*والهلالاب حا يسكتوا ؟؟؟؟؟
*من أجمل تعليقات الأمس في هذا الخصوص
*تركي آل الشيخ محظوظ
*لقى ليهو فريق على الزيرو
*موديل سنة 30 لكن على الزيرو
*أيها الناس
*تمضي مبادرة الجار بثقة نحو هدفها النبيل
*في المرة الأولى اقترحنا الإبقاء عليها كلجنة دائمة مسؤولة عن الاستاد
*ونكرر الاقتراح في المرة التانية للمرة التانية
*ما يقوموا يقروا (للمرة التانية) بمعني للزوجة التانية يقوموا يزوغوا
*باقي ناس سعادة اللواء مأمون والحبيب منتصر النوش قالوا في الحتة دي رجافات
*وبمناسبة الحتة دي
*قالوا في واحد عرّس في السر
*يوم قابلو صاحبو في الشارع صدفة
*كانت معاهو المرة الأولى مجيهة شديد
*صاحبو افتكرها العروس
*قال ليهو عرس السر كيف ؟
*صاحبنا نطط عويناتو وقال لصاحبو والله عجبنا لكن السر ما عزمنا
*أيها الناس
*أبو عشرين رجع من مرقتو ديك ولا فات بي وشو ؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*المدارس مصرين تفتحوها لينا ؟؟؟؟
*كان مصرين خلونا نقرا على البعد يا أخينا
*نقعد في البيت وأهلنا يشرحوا لينا
*لا رحنا ورحنا
*لا مشينا وما جينا
سلك كهربا
ننساك كيف والكلب قال الرجال مواقف وبالشايفو ده البايرات روابح
وإلى لقاء
الملاحظ إنو كل كتاب المرخرخ بقيادة زعيمهم الكاهن الأعظم المقدس أليخماو ركبوا مكنة ثورجية وإستلموا الشغلانة، والغريبة ديل هم ذاتهم الكانوا بطبلوا ويمجدوا في كفيلة دلقونهم المرخرخ، وكان واليهم والي الجمال، وكانت ربيبتهم أمانة الشباب المقبورة والوزير المخلوع اليسع ملجأهم في تعيين لجان البص، وكان طمطم صاروخ الأمن هو بطلهم الإختطف ليهم سيما……!!
النفاق والعمل والتمسح بالحكومات الشمولية ماركة مسجلة بإسم الزلاقين……!!
تحياتنا من علي البعد لرئيسنا الشرفي تركي آل الشيخ (طااااااال عمره) وحفظه الله، حيا الله الربع وعلامكم تهرجون يا زلاقين 😆😆😆
عمك تنقو عقد النية
مركب ليه مكنة وطنية
زمان والينا العيشة هنية
ناكل باسطة وحلاوة طحنية
فريقنا حمام وكؤوسنا هدية
وجبنا كمان كاس الجعرانية
ما سائلين في كمندانية
طردنا الشرطة السودانية
بس اليوم عاوزين حنية
حياتنا بقت عذاب وأسية
والهلالاب زادونا أذية
جابوا رئيس من السعودية
يضربوا في الأسماك والشية
ونحنا بناكل في الطعمية
😁😄😅
والله انا شخصيا بستمتع يوميا بجقلبتك يا عمك تنقو. مشكلتك يا سلكلك انك كل يوم تصحى وقلبك في يدك ما عارف المفاجاة الجديدة شنو اللي اعدها ليك السوباط ورهطه. ولسه ارجى الراجيك وكتر من حبوب منع الاسهال.
إقتباس (ولا زال الناس في دولتنا يموتون في دهاليز التحقيق) التحية لك الأخ في المريخ العظيم المحامي الضليع والصحفي خفيف الظل والعباره بابكر سلك. أخي الصفوه السودان محتاج لثورة تشريعات في كافة المجالات ترتكز على أهمية صيانة كرامة الإنسان السوداني وجعلها من المقدسات التي لا يجوز لكائن من كان الإعتداء أو التعدي عليها، كما يحتاج إلى تشريعات تهتهم يتنظيم الحياة العامة للسودانيين لا تسمح بتدخل أية جهة أو شخص في أي تخصص لا يعنيه، فالسودان بوضعه الحالي يعج فالفوضى في كافة مناحي الحياة، وإلا من أين لجهة عسكرية أو أمنية الحق في التحقيق مع المدنيين وبأي قانون يتم هذا التحقيق الذي يسمح للمحقق إصدار أحكام بإعدام المحقق معهم، فالتحقيق مهمته جمع الإستدلالت وتحويل القضية إلى الجهة العدلية المختصة ، ولكن الأمر عندنا مختلف، ( والله بالوضع الشايفنو ده السودان ح يلحق أمات طه على قول الحبيب الصفوة حسن بسبوسه.