الجماعة مغشوشين!

*امبارح ما لحقنا كتبنا عن الجرسلين !

*الجماعة المغشوشين مسكوهم الدرب من عصراً بدري ,تقريبا من اليوم الطارو فيهو

*صديقي متوكل عبدالعزيز الوصيفابي من مكة زول نصيحة في أي حاجه ,في الدين تلقاهو يهابش ويقتنع ويقنع في الطب في أي حاجه ماعندو مشكلة

*مشكلتو الوحيدة الموجه والأسطوانة (الحفظوها) ليهم ديك .صفر محلي وصفر دولي وصفرية بطولات والقاب كده ماعارف جات من وين,,هي في افظع من انك تقول علي محمد ادم بيبو

*بيبو سيد الاسم لو عرف كان (طلق) الكورة بالثلاثة، المهم ما علينا الأسطوانة دي دخلت المواقع قلت اخد لي (جمة ) شوية واستعد لمتابعة الزعيم الأصلي سيد البلد وهو يستهدف العلامة الكاملة مع الوصيف الجديد اهلي الخرطوم الفريق المحترم

*لقيت قائمة طويلة قبل تأسيس نادي المريخ المحترم جدا يكون من العام ألف وتسعمائة كده من غير أي زيادة، الوقت داك زاتو ما عارفين الكورة ولا شافوها

*وقد يكون والله اعلم في كورة مصنوعة من الدوم او خلافو ! المهم لقيت قائمة من البطولات ومسميات علي شاكلة كأس (سوق القش) وكأس ( ود شريف) وكأس (دلدوم) و(عشوشه) ست الشاي!

*تخيلوا معي دي بطولات قالوا رصدوها وأرقام لا يمكن الوصول لها وبالتالي فإن الوصيف يحمل بطولات اكبر عدد في السودان ولا وجود لأي منافس له

*علي (التعترو) متوكل دا قام رسل لي القائمة دي ! غايتو اصدقكم القول قدر ما قلبتها وسألت عنها ماعرفته ليها مؤرخ ولا موثق يدينا إفادة ,حتي تكرم الأخ الحبيب هندي الزبير صديقي عبر مواقع التواصل وادانا الأكيدة فقال لي دكان ود شريف دا وعم دلدوم دي دكاكين في سوق العناقريب امدرمان منذ زمن الانجليز

*ماعلينا برضو لكن الدخلت في جمهور المريخ ما بتطلع! رأفة ومحبه كده فيهم قلنا نذكرهم ! لكن مافي داعي هو أساسا الزول لمن يكون (مغسول) في الكورة وفي اصدار الاحكام يبقي فائدة مافي

*كتبنا منذ فترة طويلة وراجعنا دار الوثائق السودانية التي اثبتت تاريخ تأسيس الهلال ولم يذكر تاريخ المريخ (الونسة ) المنقولة مرة 1908 ومرة 1927 غايتو حيرونا

*ياجماعة رسونا ! العملية دي زي عملية انتخاب سوداكال وحازم وأخيرا أبو جيبين وقبلهم واليهم الغالي

*جماعة (يستبشرون ) و (يغسلون) بشروا بسوداكال وكتبوا عنه مالم يكتب ,بل يكفي انه كان قابع خلف القضبان ونال الرئاسة ! ثم ما لبس ان انقلبوا عليه وبشروا بسعادة القنصل المحترم حازم والذي مكث ثم اردوه بالقاضية كما انتهوا من سوداكال حتي جاء ابوجيبين الحالي

*غايتو الشغل دا زي شغل الكاميرا الخفية التي ظهر فيها أبو جيبين ,زول خبرة ما اظن تقدروا عليهو

*عموما قصة انك تفشل في الوقت الحالي وامورك تكون ما مرتبة ! ما ممكن اطلع دفاتري القديمة زي التاجر واحاول اجد الاعذار ومن خلفي جمهور عاشق يمشي خلف التيار وبنفس الأسطوانة

*غايتو يا متوكل اخوي قائمتك دي ماعاوز أقول ليك بلها واشرب مويتها او أقول ليك بتغطي علي إخفاقاتك وسلبياتك الحالية

*ليك ولأي واحد من احبابنا اهل الوصيف انتو ناسنا وضلنا المرسوم

*كلام مثبت ماعاوز غلاط ! امبارح واحد هلالابي جاب قائمة حقيقية مازي قوائم المريخاب فيها كل المدربين الجابهم الهلال وانتقلوا للوصيف من قبل غارزيتو وحتي ريكاردو الأخير دا

*طبعا علي الهلالاب ان يعذرونا فاليوم نكتب العمود! ونسة كده لحبايبنا يمكن نقدر نزيل شويه من الكلام المحفوظ

* اخر كلمة حرة. الببغاء بتاعت جارنا طوالي تجي ماشي تقول ليك (احمر) ما حافظه كلمة غيرها, يوم عندنا مجنون قعد (جمبها) من الشارع وعندو (خلال) الخلال دا يا جماعة لغير الناطقين بها مشط لتسريح الشعر .علي التعترو فكا بيهو الببغاء واتعلق فوق ف البيت وبقي يكورك لسيد البيت يا سيد الخلال والببغاء بقي كلما المجنون يكورك يا سيد الببغاء يقول الهلال ..حفظ اخر كلمة

كلمات حرة

*كسب هلال السعد زعيم البلد اول كأس في عهد مجلس السوباط المنتخب وأول كأس معنوي للدفع بالاستمرار في المشروع

*من راهن علي المايسترو فلوران ما خسر! مبروك يا هلالاب

*كراسي ملعب الهلال التي تم تدميرها ابان مباراة المنتخب الجنوب سوداني مع يوغندا! تكفل بصيانتها اتحاد الجنوب!! لو انتظرتو اتحادنا الحالي لكان مصيرها مثل (قروش) الغرامة علي ثنائي المريخ لون الدم والتي كسبها الهلال

*طرحت جماهير الهلال في كثير من المنصات اراء عن غياب الثلاثي عثمان ميسي وشيخو وحسن متوكل بسبب غيابهم مع المايسترو في المباريات الماضية وعدم ظهورهم

*لكل مجتهد نصيب سادتي. ودون شك سيأتي اليوم الذي تتغني فيه الجماهير بميسي وشيخو فقط عليهم الاجتهاد اكثر

*اخر كلمة …اسعدوا يا هلالاب

حكاية

ظهور الجاكومي من جديد مقتحما الملعب! الله يعديها علي خير…القصة جابت ليها شواكيش واقتحامات بعد فضيحة الاهلي والبيعة الشهيرة..متعودة دائما

حكاية ثانية

ايمورو مكسب كبير للهلال من شاهد تنفيذ ركلة الترجيح يدرك قيمة هذا اللاعب ..نجم هذا الأسبوع دون منازع

اخر حكاية

ما تزعلو يا ناس الوصيف! طلعوا قائمة ثاني وثالث ورابع