الشفوت نجحوا في التنظيم والمدرجات….. وصانع العاب جنوا فاولات…..

تغريده واتساب
بقلم معاذ ابومؤيد

الشفوت نجحوا في التنظيم والمدرجات…..
وصانع العاب جنوا فاولات…..

نقول مبروووك لشفوت المدرجات النصر والصعود لدوري السته عشر
نصر اتى بهدير الجماهير فقط

غايتو ياشفوت كل يوم تثبتوا انكم مدرسة من غير استاذ
معقولة الروعة في الحضور والروعة في التنظيم
بسحروكم ياشفوتنا والله
قلنا ليكم يا إدارة سلموا الشفوت الراية وهديرهم جاب النصر والفرحة
كل شي معاهم تمام من صيانة النادي وانت ماشي لحدي المدرجات
وابدعوا في تنظيم البوابات …
والقون زاتو جاء من هذه الاصوات
ترفع لكن القبعات ياشفوت المدرجات….

???

مابحب التحليل الفني لكن لما تكون كابتن وصانع العاب ولعبك كله فاولات معناه واحد من اتنين
يا لياقتك تعبانة من السهر
ولا كمان المجاملات خلتك تلعب معانا الكفر
باص واحد ياصانع العبنا ماقادر تطلعه
مفروض بدل تطلع باص تطلع انت وتدي الفرصة لغيرك …..
لينا كم سنة نقول محتاجين صانع العاب لكن اضان المجالس طرشة..

???

وما زالت مشكلة النقل التلفزيوني قائمة رغم اجتهاد عزام الحاج في الاعادات
لكن يامخرجنا عندك مشكلة في توزيع الكاميرات
والكرين مابخلوه مشرور في اللقطات
والصورة واصلنا ناقصة ميغابايت جودة صورة حقت افراح ومناسبات ما جودة مباريات ….
معقولة الواحد ذي السايق عربية والمطرة صابة والقزاز جاتو رطوبة
لبسنا نظارة مانفع
قلعنا النظارة جانا وجع عيون…
اول مرة اشوف لي زول يضرس من عيونه
الليلة عيوني ضرستني

???
ختاما

نحمد الله ونشكر الله
الجاي تقيل ياشفوتنا وحوبتكم عايزنها لي قدام تكون هي السند
لانه لو اتكلنا علي ناس ابحلقوم وابجضوم واطتنا صبحت…..

???
ونحن علي المدرج وصافرات الاستهجان من مدربي المدرجات قدت اضانا الا ماقدت اضان البلجيكي ….
والبلجيكي جمبو واحد حلق نقول ليه نعيما يهمنا امره جدا نفسي اعرف الملف دا فيهو شنو مايكون ملف الجمعية العمومية يااااارب يكون هو ……
معقولة ود موسي بيحلل في القناة وبفهمه دا واحد بس مطيروا من الدكة والله الشكية لله

وقلنا ليهم وحدوا الزي مع الجمهور لكن مصرين يطلعوا خارج النص….
لكن بيني بينكم القميص جديد وشديد بس اللون ?

???
عفيت منكم يا ألتراس ليقاتكم دي مفروض توزعوها علي ناس كدة في الميدان الا كم واحد عافين منهم عارفنهم طبعا ناس الدفاع
ناس خميس و ودجعفر وامير كمال ورمضان عجب
انتو الليلة كيفتو كل المدرج

???
والنصيحة يالله فقدناك يا ودسعيد …
معقولة خانتك شايفين لينا فيها حاجة لافه والله كان مالروح والنفس كنت عايز اقول في علم طار من الألتراس في نص الميدان وشايله الهواء
معقولة ما نشوفك الا وانت جاك شد عضلي وعرفنا في لاعب اصاب وعرفناك لاعب معانا ….
ويادكتور جار النبي ساعدنا حبه ولحقنا سلمون ….
غايتو اخونا الكاشف دا ذكرني النكتة بتاعة طلع بتاع النص دا بره
وهو يقول هيق….. مااااااطااالع
لحدي مالقيناه طالع بشد عضلي

???
لكن عندنا جماعة الليله ماقصروا ولاعبين بثقه والثقة دي اداها ليهم المدرج دا
والله مدرجنا دا يفتح النفس عدييل فيه جنس شفتنا
ولو مجلسنا الجاي دا شاف ليه خمسة شفوت ودخلوهم المجلس
تاني ماتجينا عوجة
لكن مدربي القروبات ديل ماعارفهم طلعوا الرخصه C متين لكن مرات تحليلهم فيه الصواب ….

???
مبروك لكل شفت مبروك الانتصار والصعود للدور التاني…..
الحقو النص يا إدارة عشان ماتبقى لينا قدام حااااااااارة …..