(الضهب) و(النحل) عيونهم قوية !!
بالعربي الكسيح*
محمد الطيب الأمين
* يعرف الناس وتحديداً الشباب مفردة : (الضهب) أو (النحل) ..
* وهي مفردة كانت رائجة جداً أيام (حفلات الأعراس) التي تقام داخل الأحياء قبل إنتشار (الصالات الباردة) ..
* زمان بيت المناسبة البتكون فيهو حفلة بتلقى (الأولاد) يتحاومون أمام بيت المناسبة منذ ساعات النهار ..
* بيستطلعوا الأمور ..
* بيشموا في الشمارات ..
* يقول ليك الليلة في (مزيكا) غرب السوق ..
* وفي واحدين يقول ليك في (كتمة) ورانا بيجاي ..
* وحتى (الوليمة) لا تسلم من ناس (الضهب) خصوصاً لو كان صاحب الوليمة من (مبسوطي الرزق) بالحي ..
* (الضهب) هم مجموعة أشخاص يظهرون عند المناسبات لأغراض معروفة ..
* ويطلقون عليهم إسم (النحل) أيضاً..
* وهم في الغالب مجموعة منتفعة تتحين المناسبات والمواسم لأهداف معينة ..
* وبما أن (الضهب) إنتهي في بيوت الأعراس فقد ظهر في نادي الهلال..
* وظاهرة (الضهب) في نادي الهلال هي ظاهرة قديمة غير أنها راجت بشكل أكبر إبان فترة الكاردينال ..
* (الضهب) أشخاص يظهرون في المشهد الهلالي قبل إنطلاقة فترة التسجيلات بـ(شهر) ثم يختفون عن المشهد بعد نهاية التسجيلات بـ(أسبوع) واحد ..
* لاحظ الآن ستجد مجموعة من الأشخاص قد ظهروا فجأة كده في مشهد الهلال دون سابق إنذار ..
* الأشخاص هؤلاء تهمهم مصالحهم في المقام الأول وهم ينشطون في هذه الفترة بغرض تقديم خدمات تتعلق بالتسجيلات ..
* على فكرة (الضهب) ديل ممكن جداً يكونوا هلالاب معروفين بالنسبة للجمهور، وهم مدربين سابقين أو قدامى لاعبين أو عاملين في قطاعات الشباب والرديف أو حتى إعلاميين ووكلاء لاعبين ..
* ديل مهمتهم الأساسية ترشيح وتقديم لاعبين للهلال (ضع خطين تحت كلمة لاعبين دي) ..
* وفي الغالب يكون هنالك إتفاق مسبق ما بين (الضهبان) و(اللاعب) ..
* ومرات كمان (حق الضهبان) في الصفقة بيكون أكتر من حق اللاعب ذاتو ..
* والمصيبة ان (زول الضهب) بيرشح لاعب أقل بكثير من قامة الهلال ..
* ممكن يرشح ليك لاعب عندو (رباط صليبي) أو لاعب (عندو مشكلة في الركبة) أو لاعب قبل كده إتقلبت بيهو أمجاد سبع مرات أو لاعب ما عندو علاقة باللعبة ..
* يعني مثلاً.. لاعب زي أحمد يحيى قام الهلال بتسجيله مطلع هذا العام ..
* أحمد يحيى ده قالوا بيحل مشاكل دفاع الهلال ..
* وبالفعل تم إدراج إسمه في الكشف الأفريقي على حساب عدد من النجوم على رأسهم صهيب الثعلب ..
* طيب الحصل شنو ؟؟
* الحصل إنو أحمد يحيى في أول تدريب للهلال الجمهور ضحك فيهو ولعيبة الهلال قربوا يموتوا من الضحك ..
* ضحكوا ليه ؟؟
* ضحكوا لأنو اللاعب ما بيعرف يثبت الكورة وما بيعرف يمرر الكورة ..
* لاعب زي ده دخل كشف الهلال كيف ؟؟
* أكيد دخل عن طريق واحد من ناس (الضهب) ..
* مشكلة (الضهب) إنهم بعد يقبضوا حق السمسرة تاني ما عندهم بيك شغلة ..
* بتخارجوا طوالي ..
* أحمد يحيى ده مسجل في كشف الهلال الأفريقي مع العلم إنه لم يلعب ولا حتى مباراة ودية للهلال ..
* طيب في سؤال كبير بيطرح نفسو .. لشنو الكاردينال بيسمع كلام الضهبانين في كل سنة مع إنو في كل مرة الهلال بتورط في صفقات مضحكة ؟؟
* الإجابة على السؤال ده بالذات صعبة جداً..
* صعبة لأنو فعلاً السبب ما معروف ..
* يعني زول شطب موكورو في نص الموسم، معناها قطع شك لما التسجيلات تجي ح يسجل زول أخطر من موكورو ..
* شئ طبيعي إنك شطبت موكورو معناها داير تجيب لينا الأفضل من ساماتا، أقصد الأفضل من موكورو ..
* طيب الحصل شنو ؟؟
* الحصل إنو جابوا تيتيه ..
* وشطبوا تيتيه في نص الموسم على طريقة موكورو ..
* يعني الريس ما إستفاد من الدرس..
* كرر نفس الخطأ..
* خطأ في التسجيل وخطأ في الشطب..
* للأسف الأخطاء دي بتكرر سنوياً لأن الريس قبلان يشرب من نفس الكأس سنوياً ..
* ودي طبعاً حاجة غريبة شوية والله ..
* لو السماسرة والمنتفعين ما عندهم ضمير حقو الكاردينال يكون إتعلم من الأيام..
* الكاردينال لما يقول كونا لجنة فنية وهو في الحقيقة الأمر ما في لجنة، لما يقول كده ما بغشنا إحنا وإنما يغش نفسه ..
* إحنا ما عندنا مشكلة بننتظر الموسم يبدأ وبعد داك (الفيهو طيب بنشم) ..
* ما في حاجة بتدسا..
* لكن بنزعل لما نشوفك صرفت الصرف ده كلو على الهلال وعملت جوهرة قمة في الروعة، بنزعل لما الناس يغشوك ويورطوك في صفقات مخجلة ومضحكة ولا تشبه الهلال ..
* والله بنزعل بالإنابة عنك..
* ما تستاهل تتورط في صفقات مخجلة ..
* تستاهل إنك تعمل فريق يوازي الجوهرة من حيث الجمال..
* ولكن كلمة تستاهل براها ما كفاية ..
* تستاهل دي عايزة شغل وإجتهاد وعايزة زول جد جد عندو لجنة فنية تختار التسجيلات وترصد اللاعبين ..
* لجنة بالجد مش بالكضب..
* لجنة من أولاد الهلال وشباب الهلال ..
* اللجنة دي خليها تكون من الشباب القلوبهم حارة ..
* شباب مواكبين وقادرين على الحركة والرصد والمتابعة ..
* هسه زي فوزي المرضي ده نشيلو فوق رأسنا لكن حتى لو كان في اللجنة ما ح يكون مفيد زي خالد جوليت أو صالح سنار أو حتى أي شاب من شباب الهلال ..
* لما تجيب زول زي صلاح الضي أو زاهر مركز أفضل من تجيب خالد النقر ..
* التسجيلات عايزة شفوت لا تهمهم مصلحتهم الخاصة وإنما تهمهم مصلحة الهلال الكيان ..
* أتقوا الله في الهلال ..
* خافوا الله في جمهور الهلال المكتوي بنيران الحزن والصبر ..
* غداً بإذن الله نختم سلسلة مقالاتنا عن واقع الحال في الهلال ونسأل الله أن يصلح الحال ..
*و..و..
* ونواصل ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
3,699 حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
13230 حملو التطبيق
على متجر mobogenie
http://www.mobogenie.com/download-net.koorasudan.app-3573651.html
5000+ حملوا التطبيق