الغداء جابوهو ليهو بين الشوطين !!
بالعربي الكسيح
محمد الطيب الأمين
الغداء جابوهو ليهو بين الشوطين !!
* من النكات التي تجدني استمتع بها كثيرا نكتة طالب الشهادة السودانية.
* وفي النكتة الطالب بعد الإمتحان حصل على نسبة (٥١) .
* يعني (النص) زايد واحد .
* وصاحبك فرحان بهذا النجاح .
* جا داخل البيت لقى ابوهو في (وشو) قال ليهو : أها جبت كم يا ولد ؟ قال ليهو : ٥١ يا أبوي.
* الابو دنقر رأسو ومشى زعلان.
* الولد داير يتراشق قال ليهو : النسبة دي بتدخلني ياتو كلية يا حاج ؟
* قال ليهو دي بتدخلك كلية الموسيقى والدراما ، وفي الموسيقى والدراما قسم الزغاريد .
* وحقيقة عدد من الأسماء المطروحة لرئاسة نادي الهلال امكانياتهم (بالنسبة) بتدخلهم كلية الموسيقى قسم الزغاريد .
* امكانياتكم يا خندقاوي بتدخلكم كلية الهلال قسم (التشجيع) .
* ما أكتر من كده .
* ولذلك من الأفضل أن تتوحد كل تنظيمات الهلال وتنصهر في تنظيم واحد وتقدم رئيس معتبر .
* رئيس يدخل كلية الهلال من أوسع الأبواب مش رئيس يدخل كلية الهلال قسم (الكواريك) .
* إذا كان الكاردينال بكل أمواله دخل (قسم الزغاريد) .
* رئيس الهلال لازم يكون كاريزما وهيبة.
* في المريخ ممكن أي زول يبقى رئيس لكن في الهلال ما أي زول ببقى رئيس .
* كرسي الهلال تقيل.
* كرسي جلس فيهو البابا والحكيم ومنصور من الصعب أن يجلس فيه شخص عادي .
* طبعا الكاردينال في حكاية الرئاسة دي ماسك العصا من النص .
* عادي ممكن تتوقع الكاردينال يواصل ويبلع كلام عدم نيته في المواصلة .
* عادي ممكن يترشح للانتخابات الجاية بعد الفترة الإنتقالية أو التمديد .
* ما مضمون .
* عشان كده أنصار الكاردينال عليهم أن لا يحزنوا شديد ، والناس الضد الكاردينال عليهم أن لا يفرحوا شديد .
* لازم تتوقعوا أي حاجة .
* المهم.
* من الأخبار السعيدة عودة العريس جمال سالم .
* جمال سالم وصل البلد وتابع أول تدريب للفريق بعد غياب أربعة أشهر.
* قمة الانضباط.
* جمال سالم لما كان في المريخ بيجي بعد الإعداد يبدأ ب٤٠ يوم.
* والعجب الحضري .
* أقسم بالله العملها الحضري في المريخ ما في حارس مرمى عملها في نادي .
* عصام الحضري كان بتمرن تمرين العصر وبسافر بعد المغرب، ببيت مع اولادو وبجي تاني يوم النهار .
* مرة الحضري سافر بعد التمرين الرئيسي والمريخ كان لاعب مع اهلي شندي في شندي .
* بعد التمرين الرئيسي المريخ سافر شندي والحضري سافر القاهرة .
* في نفس يوم المباراة الحضري جا ولقى عربة برادو منتظراهو في المطار.
* من المطار وإلي شندي .
* وشارك في المباراة كمان .
* أساسي.
* حتى الغداء جابوهو ليهو بين الشوطين .
* الحضري عمل عمايل في المريخ .
* وفي صحيفة مصرية عملت تقرير عن احتراف الحضري بالمريخ وكتبت بالخط العريض : (الحضري أكبر من كوكب المريخ) .
* الحضري كان ممكن عشان مسافر المغرب يقنع الجهاز الفني يعمل التمرين العصر .
* ذلة جد .
* ده غير إنو قال : (جمال الوالي ما كان بيحلم يسلم علي في يدي) .
* وتعال أناقشك.
* كل ما ازهج برجع للارشيف بشوف حكاوي الحضري مع المريخ .
* والله تموت من الضحك .
* المهم .
* وصول جمال سالم في هذا التوقيت والظرف يؤكد أنه منضبط .
* لو في زول في محل جمال سالم ما بيجي .
* الدنيا كورونا ورئيس الهلال بقول ماشي وهو أصلا عقدو ح ينتهي بنهاية الدوري .
* وبعد ده جا وفي المواعيد كمان .
* دي حاجة كويسة في حق جمال سالم وفي حق الكاردينال كمان .
* معناها رسلوا ليهو قروش عشان يجي .
* خطوة ممتازة من الكاردينال .
* عموما .. نتمنى أن لا يحدث طارئ يتم من خلاله تعطيل الدوري مجددا .
* نتمنى الحياة ترجع .
* وعلى الأقل نشوف فصاحة (الإصيفر) القال بينسحب.
* قال طريقة التجميع بتخدم الهلال قال .
* حاجة تكسف .
* و..و..
* ويا الله مطرة .
عدم موضوع ياخي بالله ما حرام عليك تكل اكل عيش بالفارغة دي