الغربال : أسرتي مضايقة من شعر رأسي !!

قزاز ورذاذ

محمد الطيب الأمين

الغربال : أسرتي مضايقة من شعر رأسي !!

* الشعب السوداني بطبعه لا يخاف من شهر رمضان ولكنه يخاف من الناس البتستغل شهر رمضان.
* الصيام ما عندنا معاهو مشكلة.
* شهر، شهرين بنصوم وربنا يتقبل.
* لكن لما يقولوا رمضان قرب بنخاف نمشي السوق.
* بنخاف من (تجار رمضان) .
* تجار رمضان ديل (جوكية) بنتظروا شهر رمضان عشان يرفعوا أسعار احتياجات رمضان.
* جوكية بشتغلوا أي حاجة.
* في السعودية وكثير من الدول العربية بتتعمل تخفيضات بمناسبة رمضان.
* رحمة ومحنة.
* وفي السودان بتتعمل زيادات بسبب رمضان.
* عشان كده البلد دي مشكلتها مشكلة (ناس).
* والله صحي.
* المشكلة فينا نحن.
* الأزمة (ناس).
* بستثمروا حسب المواسم.
* وبما أن ذلك كذلك فإن نفس تجار رمضان هؤلاء تجدهم على قفا من يشيل في الهلال.
* في الهلال (تجار الأزمات) ينشطون مع كل مباراة مهمة للهلال.
* وهؤلاء بعد كل تعثر للهلال يشنون حرب تقضي على كل شئ جميل في الهلال.
* لا بخلوا مدرب ولا لاعب ولا إداري.
* ولذلك اقول والكلام لنجوم الهلال : فوزكم في مباراة الغد يمنع عنا كثير من الشرور.
* أول هذه الشرور (كيس المدرب) والشطب والتسجيل.
* التسجيلات على الأبواب والهلال في مرحلة بناء.
* ليس من المصلحة أن يكون الشطب بالكم وليس بالكيف.
* الفوز في مباراة الغد سيجعل رؤية التسجيلات واضحة.
* الهلال لا يحتاج لأكثر من ستة عناصر نوعية.
* ولو خسرنا لا قدر الهلال ممكن عدد المشاطيب يكون كبير.
* الفوز غداً هو النجاة.
* نجاة من حاجات كتيرة.
* هي مباراة لاعبين في المقام الأول.
* عليهم أن يمسحوا الصورة الباهتة التي ظهروا بها في اللقاء الأفريقي السابق أمام شباب بلوزداد.
* في تلك المباراة تواضع الهلال بصورة كبيرة.
* تعادلنا أمام بلوزداد ومازيمبي بملعبنا.
* كان بالإمكان أن نحسن التأهل منذ الجولة السابقة.
* ولكنها كرة القدم.
* ما راح شئ.
* الكرة في ملعبنا.
* نحترم صن داونز.
* إحترام وليس خوف.
* العندو الغربال ما بخاف.
* العندو أبو عشرين لازم قلبو يكون قوي.
* العندو إرنق والشغيل وأبو عاقلة.
* العندو بوغبا وروفا ونزار.
* العندو فارس وبوي واتارا وعيد وباقي النجوم.
* العندو ديل ما بخاف.
* نثق فيهم ونرجو أن يثقوا هم في أنفسهم.
* لابد للهلال ان يترقي للمرحلة القادمة.
* الهلال لا يقل عن صن داونز.
* بل الهلال اكبر.
* علينا أن نكون كبار غدا ان شاء.
* ملحوظة : أجريت حوارا مع نجم السودان محمد عبد الرحمن عبر قناتي على اليوتيوب يتم بثه اليوم الخميس الساعة الثانية عشر صباحا اتمنى المتابعة والمشاركة ودعم القناة.
* الغربال في الحوار تحدث في الخاص والعام.
* تدخل اليوتيوب تكتب (قناة دقايق) بتظهر ليك الحلقات وأكون شاكر.
* َ.. و..
* والكبير كبير.