الغربال وتيري ..ثنائية وردي واسماعيل حسن
صابنها
محمد عبد الماجد
الغربال وتيري ..ثنائية وردي واسماعيل حسن
• عندنا (حيطة) من غير سبب وبدون مناسبة لو جيت حايم جنبها ساكت بتقول ليك (الغربال).
• الحيطة دي (جنت)؟
• نحن عندنا (حيط) من غير مناسبة بتلقاها تتعارض ليك في الشارع.
• تشوبح ليك في وشيك.
• المشابحة ..شيء من الفرحة.
• وعندنا شجرة (ليمون) كل مرة بتقول (سيف تيري).
• أنا ما عارف المناسبة شنو؟
• لكن بتحصل!!
• لو عندكم (مروحة) ما شغالة …جيبوا ليها (تيري).
• لو تلاجة.
• او (مكيف) – كلموا ليه (الغربال).
• تيري حدو (مروحة).
• عشان الكلام يبقى ليكم واضح.
• يمين يشتغلوا زي الطلقة.
• عندنا طبق …كل ما الصورة تطش …بنجيب ليه صورة الغربال.
• الصورة تظبط زي الحلاوة.
• دخلوا لينا محمد عبدالرحمن – في مجلس السيادة.
• اقيفوا ما تستعجلوا.
• مشاكل البلد كلها بتتحل.
• الكهربة.
• الموية.
• الدولار.
• نحن فترنا من الكلام الكتير.
• قبل ما تدخلوا محمد عبدالرحمن لمجلس السيادة …شيلوا لينا الجماعة ديل برة.
• عشان ما تحصل لخبطة.
• وعشان الامور تكون واضحة.
• سيف تيري ودوه مجلس الوزراء.
• شيلوا ليه (حمدوك) ساكت.
• نحن شبعنا كلام.
• فترنا من (النقة) الكتيرة.
• والمؤتمرات الصحفية.
• وصفوف الرغيف.
• بلا (حرية وتغيير) – بلا (تجمع مهنيين) معاكم.
• عليكم الله هسع متل هذه (الفرحة) عيشتوها.
• نحن لينا زمن من (الفرحة).
• الكهربة قاطعة.
• الفرحة بقينا نحس بيها (رقراق).
• المطرة بتقفل لينا الشوارع.
• المواصلات مافي.
• الغربال وتيري.
• ثنائية زي ثنائية وردي واسماعيل حسن.
• حاجة ما بتطلع إلّا (ابداع).
• واغاني.
• وفن.
• وجمال.
• وثنائي العاصمة.
• الغربال وتيري …زي الشاي باللبن.
• القراصة بالسمنة.
• تفاهم عجيب.
• محمد عبدالرحمن يطلع هنا …الغربال ينزل هناك.
• شغالين بدون لاسلكي.
• دفاع منتخب جنوب افريقيا ما فهم أي شيء.
• بقوا يتخابطوا زي عصيدة البلح.
• اول عصيدة البلح …بتتخابط.
• عليكم الله ما تسألوني.
• الليلة خلوني اقول أي شيء.
• ما تقيفوا لي في حلقي.
• دا ما يوم يقيفوا فيه في (الحلق).
• الغربال وتيري.
• خلوني في الحتة دي.
• ما تخلوني اطلع من الموضوع.
• كل ما اطلع …الكزوني.
• قولوا لي اقيف.
• عشان لو فتحت ليكم في حتة تانية …ما بقيف.
• والله (سيل) ما يثبتني.
• وردي واسماعيل حسن التقوا في 1957 …في اغنية (الحب والورود) ، الاغنية المعروفة عند الناس بـ (يا طير يا طائر).
• اول عمل جمع بين وردي واسماعيل حسن لحنه الموسيقار خليل احمد.
• بعد ذلك قرر وردي يلحن اغنياته براهو.
• وردي عمل اضافات لحنية (الجن الاحمر) ما بقدر عليها.
• دي قدرات ….بشر ما بقدر عليها.
• لحن وردي لاسماعيل حسن (بعد ايه) والتى قدمها وردي في المسرح القومي في صيف 1957.
• تتخيلوا الوقت داك ما في كهربة كانت بتقطع.
• ولا في موية قاطعة.
• كتب اسماعيل حسن لوردي المستحيل وخاف من الله وسؤال وصدفة والوصية.
• اسماعيل حسن كتب لوردي اكثر من 22 عملا بدأت من (الحب والورود) وانتهن بـ (وا اسفاي) والتى عاد بها اسماعيل حسن لمحمد وردي بعد قطعية استمرت حوالي (13) سنة اتجه وردي فيها الى صلاح احمد ابراهيم ومحجوب شريف والتجاني سعيد وكمال محيسي وغيرهم من شعراء (الحداثة) في الاغنية السودانية.
• كل اغنيات وردي من تلحينه إلّا ثلاث اعمال …الاولى (الحب والورود) التى لحنها خليل احمد والثانية (الوصية) التى لحنها برعي احمد دفع الله والثالثة (حرمت الحب والريدة) التى كتبها ولحنها الطاهر ابراهيم.
• الطاهر ابراهيم طبعا بكتب وبلحن اغنياته …وهو احد شعراء الفنان ابراهيم عوض.
• مالكم عاوزين تمرقوني من الموضوع.
• أنا كنت بتكلم عن شنو؟
• اتذكرت.
• الغربال وتيري.
• ديل هم بتنسوا.
• والله ديل يجتمعوا في فريق واحد …ما (دفاع) في الدنيا تاني ما بيشكي من (القطيعة).
• ديل اتلموا كيف؟
• وطلعوا من وين؟
• اتخيلوا الجماعة ديل يظهر معاهم عيد مقدم.
• محترف شنو؟
• والله مانشستر سيتي بس.
• قدر ما ترفع رأسك …تلقى الكورة دخلت قون.
• مباراة امس ..تفصيلا ..قدم فيها سيف تيري مباراة كبيرة …جنوب افريقيا كلها قالوا طلعت تشكي من تيري ووجع الضهر.
• محمد عبدالرحمن لاعب كبير …لاعب محترف ..بتحس بانه مختلف في كل شيء.
• أي كورة بستلمها قون.
• ولا بكضب.
• لو استلمها في زقاف ميت.
• وفي شارع مقفول.
• وزواية مضلمة بختها في القون.
• بعملها كيف ما عارف.
• امير كمال …(خبرات) كبيرة ووعي تكتيكي عالي …انا ما عارف ليه ناس المريخ ما عارفين قيمة هذا اللاعب الكبير.
• ارنق تقول بيلعب في الخانة دي ليه 25 سنة.
• الزول داك كأنو بيلعب في المنتخب قبل ما يلدوه.
• ما شاءلله عليه.
• السمؤال ..في المباريات الكبيرة – لا غني عنه.
• فارس شارك في دقائق معدودة …وعرف الناس قيمته عندما خرج.
• عمر المصري ..هذا الشبل من ذاك الاسد.
• زول في حتتوا.
• الشغيل كان نجم المباراة الاول.
• الشغيل دا كل يوم بزيد بريق.
• قدم الشغيل مباراة كبيرة …وكان لوحده عبارة عن كونسلتو لاعبي ارتكاز.
• ترفع رأسك في أي حتة تلقى الشغيل.
• في الدفاع.
• في الوسط.
• في المدرجات.
• في المنطقة الفنية.
• مع الحكم.
• مع المهاجم.
• ما شاءالله.
• في أي حتة يتواجد الشغيل.
• بوغبا ..لاعب فنان ..بختلف عن أي لاعب تاني.
• لاعب حاجاتو براهو.
• اسلوبه.
• طبعه.
• ضياءالدين محجوب لعب مباراة كبيرة وكان (سد) حقيقي في وسط المنتخب.
• ضياء الدين شال الشيلة …واثبت انه ممكن يحترف في الدوري الانجليزي.
• الليلة قبل بكرة.
• اطهر الطاهر …الحاضر دائما في مثل هذه المواقف.
• اطهر الطاهر يستحق الاحتراف في دوري اعظم.
• امكانياته اكبر من الدوري المصري.
• شيبوب ….عندما شارك في الجزء الاخير من المباراة ..استطاع ان يكتل حماس منتخب جنوب افريقيا.
• دخل بي فهم.
• وعمل أي شيء.
• كرشوم …زي (الدواء) ادخله المدير الفني للمنتخب في وقتو.
• جاء في الموعد.
• اكرم الهادي سليم ..قائد حتى وهو لا يشارك.
• اكرم لاعب عظيم ..بصمته وروحه ظاهرة في الكنبة.
• اكرم يستحق حافز اكبر من حوافز العناصر التى شاركت.
• كل نجوم المنتخب كانوا كبارا.
• الجهاز الفني للمنتخب بقيادة الفرنسي فيلود ادار المباراة بعقلية ممكن تجعله يشيل كاس الامم الافريقية.
• خالد بخيت …فخر الصناعة السودانية.
• عيسي الهاشماب…كنز لا يفني.
• كلهم كانوا كبارا.
• التحية لاتحاد الكرة بقيادة الدكتور كمال شداد الذي نجح في ان يوصل المنتخب للنهائيات.
• شكرا حسن برقو.
• شكرا ابوبكر الماحي وبابكر عثمان.
• شكرا للجميع.
• تتخيلوا منتخب جنوب افريقيا في نهائيات بطولة الامم الافريقية اخرج المنتخب المصري من دور الـ 16 وهو منظم البطولة.
• جبنا للمصرين تارهم.
• منتخب مصر بمحمد صلاح والنني وكوكا ونجوم الدوري المصري وهم بيلعبوا في مصر اخرجهم منتخب جنوب افريقيا.
• ونحن اخرجنا منتخب جنوب افريقيا من مرحلة المجموعات.
• تاني في شنو؟
• ارجع واختم ليكم بي ابوعشرين.
• الزول دا جبتوه من وين؟
• يتخيل لي ابوعشرين دا لو لعب براهو امام منتخب جنوب افريقيا …ما استطاع منتخب جنوب افريقيا ان يسجل في مرماه.
• والله فرحة.
• وسعادة.
• وسودان.
• مبرووك.
• تأهل مفرح …وبعد مشوار صعب.
• نحن بعد كدا بنفكر في نهائيات كأس العالم في قطر.
• ناس ارنق ديل …الكاميرون ..ما بقيفوا فيها.
• …………….
متاريس
• نجم المباراة الاول الشغيل.
• ثم سيف تيري وارنق وابوعشرين.
• والله كلهم نجوم.
• الزول ذاتو ما عارف يقول شنو؟
• اكرم الهادي سليم ذاتو كان من نجوم المباراة.
• كل حاجة تمام.
• عاوز اقول ليكم شيء.
• وإلّا احسن اسكت.
• خشمي عندي.
• اصلو ما بتكلم.
• ولا بقول شيء.
• ……….
• ترس اخير : الف الف الف مبرووووك يا سودان.
ولدنا الرجع لي دياروا وولدنا الفي الطريق خلاص قطع الظلط
الحاجة دي لو قلتها يا ود عبد الماجد ولدنا العجوز صبي الكاهن الأعظم أليخماو بروح فيها، خليها شوية كدة نحنا محتاجين ليهو الأيامات الجاية دي، خليهو مع غمرة مخدر الكاهن الأعظم أليخماو والجمعية العمومية الضاربة 😆😆😆
مبروك للسودان لكن اخي محمد اللاعب السوداني هش اي نفخ بياثر فيه بالله كفاية نفخ في اللعيبة وشوف اللعيبة النفختهم ديل من الهلال شوفهم يوم الجمعة والله يكضب الشينة والكلام ده قلت ونفخت فيهم ايام التسجيلات مع زوران انعكس في التعادلات في الممتاز وعموما ما قصروا وفرحونا وفرحوا الشعب السوداني ومبروك والف مبروك للتاهل وعقبال الهلال ان شاء الله
هههههههههههههههههههههة
والله انت منقة ..
علي اليمين لو عندنا دستة مسؤولين مزاجهم رايق كدة زي مزاجك ده كان البلد اتصلحت
ياخ ده العمود البتقري من الصباح .مع كباية الشاي ..وصوت الاطفال ..
ينصر دينك يا سيدي….انت ياخي انسان متجرد من اي عصبية الا كونك سوداني…..
( انت و سلك ..بتجيبوا الصنف ده من وين)
التحية لابو عبد الماجد وللاخ صلاح حارق المستعارين. الليلة وين ابو المستعار الككو اليخماوي. الظاهر عليه لم يأخذ جرعة المخدر من شيخه المكلوم من تأهل منتخب الطاغية شداد. طبعا اي حاجة خارج مزاج اليخماو بتوجع الصبيان اكثر منه😹😹😹
اللهم اكثر لنا من الضربات الموجعة لليخماو وفلول الكيزان.
ما أجملك الأخ محمد عبدالماجد وانت تنضم عن جالبي الفرح المهاجر الذي كنا نبحث عنه ولا يفتأ يبعد عنا محلقاً في ديار غير ديارنا لكن اخيرا اصطدناه بنبلة الشفاته الود الأنيق جكسا والثورجي وايقونة الثوره سيف تيري
وبالغت وابدعت