المريخاب فقدوا العشم في (تسجيلاتهم) قبلوا على (الرباط الصليبي) في الهلال
صابنها
محمد عبد الماجد
المريخاب فقدوا العشم في (تسجيلاتهم) قبلوا على (الرباط الصليبي) في الهلال
· حتى وقت قريب – ايام حكومات الانقاذ – كان اعلام المريخ يحدثنا عن (قنابل) التسجيلات وعن تفجير القنبلة.
· الحضري والنفطي ووارغو.
· ومعسكر في انطاليا.
· ومواجهة بايرن ميونيخ.
· ايام العز.
· والانقاذ.
· وسيكافا كل 15 يوم.
· كانت الطائرات تتخابط …المحترف قبل ما ينزل من الطيارة بستلم الجنسية السودانية.
· ولا كلمة.
· في نيجيريا في جالية سودانية بالتجنيس.
· كلهم كانوا بيلعبوا في المريخ.
· الجنسية السودانية كانت عندهم اسهل من (الشريحة).
· هل تعلموا ان الهلال هو النادي الوحيد الآن الذي يوجد فيه محترفين مجنسين.
· جمال سالم.
· واستيفن زوي.
· واحد من اصل يوغندي والتاني من اصل كنغولي.
· جاءت كدا.
· ولا عندنا فيها ايد.
· يعني هناك (5) لاعبين في الهلال من اصول اجنبية.
· سمحة المقدرة.
· انتهى عهد استلام الجنسية من تحت التربيزة.
· زمن كلتشي.
· وباسكال بيلعب موسم كامل وهو مسحوبة منه الجنسية السودانية.
· منتهى الفوضى.
· زمن (الجنسيات) بيستلموها في سلم الطائرة.
· الآن وحده الهلال الذي ينتفع من هذه الخاصية.
· المريخ عندهم الجنوب سوداني جمعة والذي قرروا صرف النظر عنه.
· عندنا حارس (اجنبي) نال الجنسية السودانية في المريخ.
· وعندنا استيفن زوي ايضا نال الجنسية السودانية بعيدا عن الهلال.
· من غير لف ودوران.
· اعلام المريخ كانت التسجيلات سوقه.
· القنابل.
· والمفاجآت.
· والخطف.
· والجنسيات.
· يطلعوها من رئيس الجمهورية مباشرة.
· يصدق.
· عمر البشير كان بصدق الجنسية في الجامع.
· او في عقد.
· هسع اقصى ما يمكن ان يحدث ان يتصور رئيس المريخ مع المجنس السوداني جمعة جينارو الذي لعب في الهلال على ما اعتقد سنة 2010م.
· ايام صلاح ادريس.
· المريخاب الآن بقوا يفرحوا بي سيف الدمازين ومصعب كردمان.
· حليل الانقاذ.
· وحليل جمال الوالي.
· سوداكال بتصور مع جمعة الذي لعب في الهلال قبل 10 سنوات.
· بتصور مع كرنقو الذي لعب في المريخ قبل 10 سنوات ايضا.
· في مثل هذه الايام – كانت طائرات تقوم وطائرات تنزل.
· اقلاع…وهبوط.
· زمن والله.
· حليل زمن (الانقاذ).
· زمن الجنسية تمنح في سلم الطيارة.
· هسع المريخاب قعنوا من تسجيلاتهم – ناس محمد عباس وتمبش وكرنقو وقبلوا يفتشوا في (الرباط الصليبي) في تسجيلات الهلال.
· مزمل ابوالقاسم قام على (التخدير) مرة تانية.
· تتخيلوا املهم بقى في (الرباط الصليبي).
· رهانهم بقى على الرباط الصليبي.
· الامور وصلت عندهم حد ان يفرحوا ويهللوا لاصابة لاعب بالرباط الصليبي.
· هي وصلت كدا.
· هي حصلت؟؟
· شوفوا تسجيلاتكم.
· هسع محمد الرشيد لو دخل معسكر الهلال بقولوا ليك عندو (رباط صليبي).
· خلوه الرباط الصليبي – الموضوع دا ما بخصكم في حاجة.
· ألحقوا اعدادكم.
· شوفوا تسجيلاتكم.
· اقرعوا التش.
· الجفلوا خلوهم ..ناس رمضان عجب ومحمد الرشيد.
· اقرعوا التش.
· انتوا التش دا برضو عندو رباط صليبي.
· عليكم الله شوفوا لينا الموضوع دا.
· الهلال يغادر اليوم برعاية الله وحفظه الى قاهرة المعز لاقامة معسكر لمدة اسبوعين.
· وهم معلقين في الرباط الصليبي.
· المريخ لغاية الآن عدد اللاعبين في التمارين لا يتجاوز 12 لاعبا.
· انتوا النصيحين …وينها تمارينكم؟
· والله حالتكم صعبة.
· الانقاذ فرقت معاكم.
· عشان كدا تبكوا عليها.
· حليل صلاح قوش.
· وعلي كرتي.
· وعوض الجاز.
· وصدّق لي يا البشير صدّق.
· المريخ الآن ما عندو (مدرب) …تتخيلوا.
· وبتكلموا عن الرباط الصليبي.
· المريخ محتاج لـ (الانقاذ).
· المريخ ما عندو (رئيس).
· وبتحدثوا عن الرباط الصليبي.
· الشكلة في الرئيس وصلت السماء.
· الاتحاد يهدد.
· والفيفا تهدد.
· ما معروف ادم سوداكال يستمر وإلّا يجيهم القنصل حازم.
· ما معروف يبقوا على خشارم.
· ام يتعاقدوا مع ابراهومة.
· علما ان مباريات التمهيدي سوف تنطلق يوم 27 نوفمبر.
· والله يا حليل الانقاذ.
· ايام العز انتهت.
· المريخاب الآن ما عندهم ولا (محترف)…الكلام البنسمع بيه في الجرايد والمواقع عن محترف مصري ومحترف بوركيني .كلام ساكت.
· يطرشنا ما شفنا.
· اعلام المريخ الذي يتحدث عن (رباط صليبي) ويهلل مزمل ابوالقاسم لذلك ويفاخر كأنه اكتشف الذرة مصير افضل لاعب عندهم رمضان عجب ما معروف.
· المريخ ما قادر يعيد قيد لاعبه محمد الرشيد.
· ومزمل ابوالقاسم بتكلم عن اصابة ياسر مزمل بي رباط صليبي.
· كدي حلوا مشكلة محمد الرشيد.
· شوفوا رمضان عجب.
· واقرعوا التش.
· انتوا الناس ديل ما بعرفوا يخجلوا.
· ما عندهم شيء اسمه (الخجل).
· رباط صليبي بحلكم.
· حليل ايام بتكلمونا عن عصام الحضري.
· وعن وارغو.
· وهيثم طمبل.
· وبكري المدينة.
· والغربال.
· هسع بقيتوا تتكلموا عن (الرباط الصليبي).
· عشمكم بقى في (الرباط الصليبي).
· الزول البشوف تسجيلات المريخ يقول ليهم حق يركزوا في (الرباط الصليبي).
· ح يتكلموا عن شنو؟
· ح يقولوا شنو؟
· ح يتكلموا يعني عن سيف الدمازين.
· يقولوا ايه؟
· يتكلموا عن وجدي.
· دا لاعب وإلّا غنية؟
· يتكلموا عن كرنقو الذي تحدثوا عنه قبل 10 سنوات.
· يقولوا شنو؟
· عشان كدا احسن ليهم يتكلموا عن الرباط الصليبي.
· مزمل ابوالقاسم اصلو دي عادته.
· في التسجيلات الماضية طلع يتحدث عن اغلاق السيستم.
· مزمل قطع بان عبدالرؤوف اتسجل في الهلال بعد اغلاق السيستم.
· مزمل بتكلم عن السيستم زي كأنو بتكلم عن دكان الحلة.
· كمان السيستم عاوز يجامل الهلال.
· عبدالرؤوف اتسجل.
· ولعب مع الهلال محلي وافريقي.
· وجاب هدف في اول مشاركة له في الاهلي المصري.
· ومزمل ابوالقاسم بتكلم عن عدم صحة تسجيل عبدالرؤوف في الهلال.
· هسع د. مزمل ابوالقاسم قال يشوف ليه حاجة جديدة.
· مزمل قبل على (الرباط الصليبي).
· خلى السيستم.
· وكرت سادومبا.
· ووكيل كلتشي.
· وقال يقبل على الرباط الصليبي.
· واي لاعب يقبل عليه مزمل ابوالقاسم ويستهدفه يحقق نجاح منقطع النظير في الهلال.
· يثبت ذلك والي الدين محمد عبدلله.
· وقابتو القاصر.
· وكلتشي والمحامي الفرنسي.
· وسادومبا والزول المسح الايميل.
· وجمال سالم الذي لم ينته عقده مع المريخ.
· وعبدالرؤوف واغلاق السيستم.
· هسع مزمل ابوالقاسم بتكلم عن الرباط الصليبي عند ياسر مزمل.
· وهذا يعني ان ياسر مزمل سوف يحقق نجاحا كبيرا في الهلال.
· ياسر مزمل سوف يفعل في الهلال ما لم يسبقه عليه احد.
· تذكروا هذا الكلام.
· طالما د. مزمل ابوالقاسم قبل على ياسر مزمل فذلك يعني نجاحه.
· دا براه دليل عافية.
· انت يا مزمل دكتور في (الرباط الصليبي)؟
· ……….
متاريس
· في رعاية الله وحفظه يغادر الهلال اليوم الى القاهرة.
· رحلة سعيدة ان شاء الله ومعسكر ناجح بإذن الله وتوفيقه.
· الإتحاد الأفريقي لكرة القدم ” الكاف ” قرر زيادة عدد اللاعبين في قوائم الأندية للموسم الجديد لـ 40 لاعبا بدلآ من 30 لاعبآ ..
· كما قرر مد فترة القيد للأندية المعفية من الدور التمهيدي ليوم 30 نوفمبر المقبل خاصة بعد تأجيل نهائي دوري ابطال افريقيا ليوم 27 نوفمبر.
· وقرر ايضا الكاف عدم تأجيل اي مباراة في البطولات الموسم المقبل مادام الفريق يتوفر به 11 لاعبا + 4 بدلاء جاهزين للعب والفريق الذي يتخلف عن السفر يعتبر مهزوما بنتيجة 2-0.
· تتخيلوا كيف كان سوف يكون الحال لو الاتحاد السوداني لم يقم بزيادة عدد اللاعبين في كشوفات الاندية الى 30 لاعبا.
· من سبب خسائرنا الخارجية اننا كنا بنلعب بـقائمة تتكون من 25 لاعبا فقط ، امام اندية بتلعب امامنا بـ 30 لاعبا.
· وهناك بعض الاندية كشوفاته فيها 35 لاعبا.
· الاتحاد الافريقي رفع سقف الكشوفات الى 40 لاعبا.
· اضافة ياسر مزمل للكشف الافريقي امر مهم …وابعاده جريمة في حق الهلال.
· ما تسمعوا لتلك الخزعبلات.
· ياسر مزمل هو نجم التسجيلات الحقيقي.
· ظروف الكورونا تحتم على الهلال الاحتفاظ باربعة حرّاس في كشوفات الفريق.
· يونس الطيب غادر مشكورا الى هلال الابيض.
· هلال الابيض قدم دعما كبيرا للهلال ولم يتأخر في يوم عن الهلال.
· عكس الامل عطبرة الذي ما ان يطلب منه الهلال لاعب إلّا ويطلب 7 مليار جنيه.
· تمبش الذي كان يطلب فيه الامل من الهلال في التسجيلات الماضية 7 مليار اطلق سراحه للمريخ بـ 3 مليار جنيه.
· مشكلة الاهلي شندي بحمد الله انتهت.
· نثق في ان الاهلي شندي سوف ينجز تسجيلاته بإجادة تامة.
· الاهلي قادر على التعويض.
· بالمناسبة جدو كومر وابوالقاسم لاعبي الامل …لم ينجحا في المريخ.
· ابوالقاسم عاد لقواعده.
· المريخ كان قد خطف جدو كومر في الفاشر بعد مباراة الامل هناك.
· اين جدو كومر الآن؟
· ولا اثر.
· الموضوع حتى لا يحتاج الى رباط صليبي.
· بدون رباط صليبي فشلوا في المريخ.
· اين رامي كركتيلا؟
· اما مهاجم الاهلي عطبرة الذي انتقل للمريخ الريح ..فهو لم يشاهده احد في المريخ.
· والله اسمه كامل ما عارفو منو؟
· هو اسمه الريح منو؟
· خسائر تقيلة.
· وكله ذلك بدون رباط صليبي.
· ركزوا في ورقكم.
· وانتظروا العقوبات التى سوف تأتي لكم من الفيفا.
· الفيفا سوف يرفع لها قضية رئيس المريخ ادم سوداكال.
· وقضية محمد الرشيد.
· وقضية رمضان عجب.
· وقضية بخيت خميس.
· وربما قضية مصعب كردمان.
· هي الفيفا دي ما عندها شغلة غير المريخ.
· ارجوا الراجيكم.
· كل هذه البلاوي في انتظار المريخ …وبتكلموا عن الرباط الصليبي.
· والله تاني موضوع الرباط الصليبي دا ما نفكو منكم.
· ابقوا اركزوا ليه.
· قال رباط صليبي قال.
· …..
· ترس اخير : عندك واحد (رباط صليبي) وصلحوووو.
يا أبو 17 ،، مين قالك المريخاب اصلا محتاجين تسجيلات ، الحمد لله الفريق مليان درر واذا عاوز تتاكد شوف الان احباب الصفر يطالبون بتسجيل مشاطيب المريخ مثل ريشموند ومستعدين يسجلوا اي لاعب في المريخ ما كلموك المريخ عالم جميل
طيب ليه تم استبعاد ياسر مزمل من الكشف الافريقى عنده ملاريا وله اسهال مش عشان الرباط الصليبى وتتكلم عن لعيبة الهلال وكانهم من كوكب تانى والله مواسيرك كترت وربنا يكضب الشينة بعد اول مباراة مع الزعيم بنسمع بالتشليع ونسميكم شلعوها المريخاب
انت صحفي اكتب في هلالك المواسير دا وخلي المريخ لاهله قادرين علي كل شي هو بحاله دا وانت عندك القوة المالية الضاربة ضربناك 3مرات اخرها المسمار الشطب 20منكم الانقاذ انتو ناسها من كردنه الي عبد الله البشير شقيق الرئىس الرقص في داركم
اسكتوا ساي ونومو قومو بصفركم الله يرحمكم
اعوذ بالله الدلاقين اليومين ديل مطلوقة فيهم نارية. غايتو االله يسامح السوباط سبب ليهم ارتجاج في المخيخ.
1/ بغيدا عن المناكفات نحن كمريخاب نتمنى من القلب عاجل الشفاء للكابتن الخلوق ياسر مزمل لاعب المنتخب الوطني أولا والهلال ثانيا
2/ نقدك فيه الكثير من الفائدة والمصلحة للمريخ تشكر عليها وبطريقة ذكية جدا للناس البتفهم أشرت الى المشاكل الادارية تأخر الاعداد وملف التدريب ومشكلة تسجيل جينارو وغيره
3/ أحييك وأنتت تحاول أن ترفع من روح لاعبي الهلال المعنوية جدد وقدامى حتى وانت تعلم بأن تسجيلات المريخ هي الافضل مائة مرة من الهلال ما عدا لاعب واحد ينافس وتم تسجيله أصلا من المريخ (أبو عشرين) وشيءا ما ياسر
4/ بالنشية للمريخ لا يحتاج محترفين فقد صار المريخ هو من يصدر المحترفين الى الخارج فكل لاعبي المريخ محترفين أصلا وتسعى للتعاقد معهم أندية الخارج وليس العكس وهذا هو المطلوب وما يطور الكرة عندنا والدليل أنكم تسعون وراْء اكثر من 10 منهم بل وأفضل من محترفي الكوته
5/ قضية العجب والرشيد محسومة للمريخ ويمكن أن يدخل الهلال بسببها في كثير من المشاكل خاصة في ظل عدم خبرة مجلس إدارته بالقوانين واللوائح ولن يجني الهلال غير السراب
6/ أعيد وأكرر احترامي لك لانك من كبار الصحفيين وليس من شاكلة إياهم … تحياتي
أردم الكاهن أليخماو ردمه الجن ……!!
زي ما قلنا ليكم قبييييل، حا يجي يوم وكل الناس بعد ما تكتشف حقيقة الكاهن الأعظم أليخماو حا تردمه ردم تقيل، وحا يبقي ذي الكلب البجي شاقي الحلة ويقوموا كل شفع الحلة يسكوهوا ويردموهوا حجارة، وشكلو الموضوع ماشي في الاتجاه ده، والكاهن أليخماو حا يصبح عما قريب ما عنده وجيع، ومع مرور الزمن سيرته حا تتلاشى بعد ما الجميع يهجروه، بس للزمن داك أريت أبو المستعار المندلاوي يحافظ على ولائه للكاهن أليخماو يمشي يونس وحشته !!
جميل أن هنالك العديد من الأقلام الشريفة قبلت على الكاهن أليخماو وإشتغلت فيه ردم !!
التحية لود عبد الماجد سيف الهلال المسلول وهارد فشفاش دلاقين السودان !!
بلبل يا متعب قلبك ومارض نفسك وشايل هموم الرعب الأحمر..هههه جاك جاك جاك الصاوي جاك …جاك المريخ سجل تمبش جاك المريخ حايسجل عزومي يكون بجانب التشتشه قالوا احتمال تنقلب تشتشه… انت طالع نازل زي الدرل وزي السوسه تنخر في الخشب وأعوذ بالله من شرك …جيت من وين من ياتو حته ياتو حله وياتو حاره…. المريخ لن تهزه عملية كبري المنتخب وعقود رمضان والرشيد الفريق كله نجوم ونتحداكم بالعجب والرشيد وابوعشرين وبطيخة سادومبا وترماي النمور ابو نص دستة ودقسة الوداد البيضاوي وجمال ظالم وباقي الرواكيب الكشفناها يوم الصاوي رمى ارض جو وعلق البياع بين السماء والأرض…اترك العبارات البلدي اوي اوي اوي وتعال قابلني في اول لقاء نوريك نجوم السماء نهارا.