المريخ ما بدفع قروش لكن بدفع نقاط!!

قزاز ورذاذ
محمد الطيب الأمين
المريخ ما بدفع قروش لكن بدفع نقاط!!

* والله يا جماعة وبعيداً عن المناكفات والمشاغلات أنا مستغرب جداً في المريخ.
* مستغرب وربما أكون غير مصدق.
* قدر ما اتخيلت وسرحت ما عرفت ليه المريخ عمل كده.
* ليه المريخ وضع نفسه في هذه الخانة الصغيرة؟
* كيف قبلت لهم (عزة النفس) بأن يكون متسولين؟
* كيف طاوعتهم الكرامة أن يلعبوا جميع مبارياتهم الأفريقية في ملعب الأهلي الذي هو ضمن فرق المجموعة؟
* كيف وافق المريخ أن يمنح الأهلي (ست نقاط) دون أن (يركب لها الأهلي طيارة)؟
* هل كل هذا لأن حازم ممنوع من دخول السودان؟
* هل حازم هو سعيد بهذه (الإنبراشة) غير المسبوقة؟
* أين أعضاء المجلس؟
* بل لماذا لا يحرك جمهور المريخ ساكناً؟
* والله أنا لا أنظر لهذه القضية بمنظار هلال مريخ.
* أنظر للمريخ نفسه الذي أصبح صغيراً بهذه المواقف التي يصر عليها حازم وهي بالضرورة مواقف تخصم من النادي ولا له أي شيء.
* أليس سوداكال أفضل من حازم؟
* سبحان الله.
* ياخ ما تلعب في إستاد الهلال هذا من حقك.
* لكن كمان ما تلعب مع الأهلي (جوة بيتو).
* الغريب في الأمر إنو أبو جريشة كان غاضب لأن مدرب الأهلي سحب قرعة المجموعات.
* قال كيف مدرب فريقو في المجموعات ويسحب القرعة.
* هسه الله يسألك يا أبو جريشة الحاجة البتزعل سحب القرعة ولا الإنبراش للأهلي؟
* حاجة تكسف والله.
* البعض ربما يقول نحن زعلانين عشان المريخ ما لعب في أستادنا بالقروش.
* أبداً والله.
* أستادنا بالقروش وحددنا ليك السعر نفع معاك حبابك ما نفع طوالي تشوف الحتة البتريحك.
* ح يقول ليك الحتة البتريحني ملعب السلام بالقاهرة.
* إستاد السلام ده بريحك أنت ولا بريح حازم؟
* عشان نكون عارفين بس.
* ياخ ما تأجر إستاد الهلال ما في مشكلة.
* لكن كمان ما تمشي القاهرة عشان تلعب مباراتين أمام الأهلي بملعبه.
* أمشي نيجيريا أو الكاميرون أو يوغندا.
* والله دي بالجد فضيحة.
* الأهلي بعد هذا لن يحترم المريخ.
* وبصراحة معاهم حق.
* ح يتعاملوا مع المريخ باعتباره فريق مطيع ومتسول.
* بكرة لما ناس رضا عبد العال يقولوا لعيبة المريخ ما مصدقين إنهم بيلعبوا في إستاد السلام لما يقولوا كده اوع تزعلوا.
* أنت ختيت نفسك في الحتة دي وعليك أن تستحمل.
* في العام قبل الماضي الإعلام المصري سخر من المريخ وقالوا إن اللاعبين فرحانين وما مصدقين انهم بيلعبوا مع الأهلي في إستاد القاهرة الدولي.
* أخشى أن يكون حديث الإعلام المصري صحيح.
* معقولة عشان حازم هو البدفع يقوم يعمل فيكم كده؟
* أين كبار المريخ من هذا العبث؟
* بالجد سبحان الله.
* و.. و..
* الله يدينا الفي مرادنا.