الموية الباردة..!!
صابنها
محمد عبد الماجد
الموية الباردة..!!
• عندنا قريبنا وقت تجيب ليه سيرة (التلج) في البرد بقعد يرجف زي القصبة .. وبقول ليك : عليك الله مالك علينا في البرد دا؟
• تقول جبت ليه خبر وفاة.
• مع ذلك سوف اتحدث عن (الموية الباردة) في البرد دا.
• الرجاء مراعاة فروق الوقت.
• مازلت كلما جاء فصل الشتاء .. اتذكر (البهدلة) التى كانت تحدث علينا في هذا الفصل.
• مشكلتنا كانت مع (البرد) في حفلات الزواج التى كانت تتم في ليالي باردة – درجة الحرارة فيها لا تتجاوز اصابع اليدين.
• برد الايامات دا لا برد ولا حاجة.
• زمان كنا بنحضر لينا حفلة بي (مصطفى مضوي) .. وكنا بنعتقد انها بـ (عقد الجلاد).
• مصطفى مضوي من البرد كنا بنشوفو سبعة .. سبعة.
• بنشوفو (عقد الجلاد).
• طبعا الما حضر ليه حفلة بمصطفى مضوي مفروض ما يطلعوا ليها شهادة ثانوي.
• هكذا نحن نزعم.
• ما عارف (نزعم) دي جاتني من وين في البرد دا ؟ حسيت فجأة كدا انو يجب ان ادخلها في جملة مفيدة.
• والله الجملة المفيدة دي زمان كان بتتعبنا جنس تعب.
• حمار الشيخ يقف في العقبة .. عندما يقول ليك الاستاذ ادخل هذه الكلمة في جملة مفيدة.
• الكلام يطير من رأسك.
• وتقعد تعاين برة الفصل.
• وتعاين للمروحة.
• عشان تلقى ليك (جملة مفيدة) .. ما بتلقى.
• تعال شوف هسع (الجمل المفيدة) كتيرة قدر شنو؟
• يمكن عشان طلاب الزمن دا اتوفر ليهم حاجات فيها مليون جملة مفيدة.
• المهم ما عاوز اشغل بالكم بالحتة دي.
• انا كنت بقول في شنو؟
• يتخيل لي الزول اذا طموحاته بقت كبيرة شديدة .. بتعب ساكت .. ما تخلي طموحاتك غير ممكنة.
• مع ذلك اذا كنت شخص بدون (طموح) بتكون زول ساي .. ما عندك قيمة ولا هدف.
• هسع الكلام دا لزومو شنو؟
• ممكن تستغرب لو قلت ليك أي زول من الزمن الماضي .. كان اقصى طموحاته تتمثل في (الموية الباردة).
• الواحد فيهم بحلم بموية التلج.
• ما اكتر من كدا.
• ممكن تضحك من الكلام دا.. وتستغرب وتقول معقولة .. الناس وصلت القمر ورونالدو بيلعب في النصر السعودي .. وانت طموحك (موية باردة).
• طبعا الكلام دا بكون في الصيف.
• اقول ليكم.. الناس ديل كان عندهم حكمة .. ونظرة بعيدة.
• انت لمن يكون عندك رغبة وطموحك كله في كباية موية باردة .. فان ذلك يدل على ان صحتك حديد.
• ما في زول بكون نفسي في (الموية الباردة) اذا كان عنده مشكلة في صحتو.
• الموية الباردة دليل صحة وعافية.
• ما سمعتوا اعمامكم الكبار .. الواحد وقت يقوم من المصلاية .. كل ما يطلبه من المولى عز وجل هو (الموية الباردة).
• في ناس كدا.
• ما عاوزين اكتر من (الموية الباردة).
• يقولوا ليك نحن لو لقينا (الموية الباردة) ما عاوزين شيء تاني.
• لا ارض ولا عربية.
• والموية الباردة بتعني حاجات كتيرة .. بتعني ان صحتك حديد وعافيتك مية المية.
• وما في اغلى من الصحة والعافية.
• لمن تقيف من (الموية الباردة) .. وتخليها فان ذلك يعني انك عندك مشكلة.
• عشان كدا قولوا الله لا يحرمنا من (الموية الباردة).
• طيب انتوا عاوزين بعد كلامي دا كلو تعرفوا المناسبة شنو؟
• الواحد إلّا يشرح ليكم.
• كسرات جارجو دي عندي زي (الموية الباردة).
• طبعا نجاح جارجو لا يقلل من ليليبو .. لأن ليليبو .. مهاجم يمكن ان تجده في المباريات الافريقية التى تعتمد على القوة البدنية والالتحامات.
• الناس مع جارجو ما تنسى ليليبو .. واعتقد ان التشكيلة المثالية لأي فريق يجب ان تجمع بين مواصفات جارجو ومواصفات ليليبو.
• ليليبو مهاجم كان يبحث عنه الهلال كثيرا.
• غير كدا .. أي محترف يجب ان لا نقيمه من خلال مباراة اذا احسن او اذا اخفق.
• لسه في حاجات تانية ح تظهر في المباريات القادمة .. اذا كان هنالك صبر واستمرارية.
• عجبنا في فلوران انه صبر على المحترف بانغا ..وهذا الصبر يمكن ان يمكنه من ان يطلع شيء من بانغا.
• نظرة المدرب يجب ان تحترم.
• صبر فلوران على بانغا امر يحسب له وليس عليه.
• اصبر على اللاعب اذا اخطأ .. وما تحكم عليه من خلال مباريات معدودة.
• الصبر على اللاعب اذا اخطأ افضل من ان تحكم على لاعب بالنهاية.
• صبر فلوران على بانغا .. يمنح الاخرين الثقة في انهم يمكن ان يأتوا بعد ذلك.
• مع ذلك .. اختلف مع فلوران في بعض الامور .. مثلما منح بانغا كل هذه الفرص .. كان يجب ان يمنح اخرين فرص كافية قبل الحكم عليهم.
• اكثر لاعب ظلم في من فلوران هو اللاعب عيد مقدم .. الذي كان اساسيا مع معظم الذين اشرفوا على الهلال قبل فلوران.
• عيد مقدم تعرض لهجمة قوية من مواقع التواصل الاجتماعي .. ومن الاعلام بسبب اخطاء عادية وقع فيها اللاعب وهي اخطاء بقع فيها معظم اللاعبين.
• كانت هنالك هجمة شرسة على الطيب عبدالرازق الذي تجاوز ذلك بثبات وقوة.
• الطيب تعرض لهجوم من الاعلام ومن الجمهور والفنيين ذاتهم قعدوا ينظروا فيه .. استطاع الطيب عبدالرازق ان يرد عليها بثبات وتألق.
• كذلك انتقد صلاح عادل .. الذي قلل من امكانياته عندما انتقل للهلال .. وكذا الحال بالنسبة للشغيل الذي كان مرفوض من الغالبية العظمي في الهلال عندما انتقل للهلال.
• ما اريد ان اقوله هنا .. ان الجمهور والإعلام في احيان كثيرة يكون ظالما ويحكم على لاعبين بانطباعات (شخصية) وأراء خاصة ينجح صاحبها ان يجعلها (رأي عام) ليواجه اللاعب بانتقادات قوية ويرفض من الجميع.
• فلوران لم يعرف كيف يستفيد من عيد مقدم وهو قوة هجومية لا يستهان بها .. اتمنى ان لا يفرط فيه الهلال في التسجيلات القادمة .. لأن التفريط في عيد مقدم يعني ان الهلال يقدم لاعب جاهز لفريق المريخ.
• اذا انتقل عيد مقدم للمريخ سوف يحقق نجاحات كبيرة مع المريخ وسوف نندم عليه كثيرا.
• فلوران ايضا لم يمنح بعض العناصر التى تلعب للهلال أي فرصة .. فهو لم يشرك الشيخ محمد ولم يشرك كذلك احمد يحي الذي اعتقد انه بأية حال من الاحوال كان سوف يكون افضل من بانغا .. مع كامل تقديرنا واحترامنا لنظرة المدرب.
• في النهاية المدرب بحقق نظرته .. ونحن من باب الامانة الصحفية بنقول رأينا.
• اتمني ان اشاهد مع الهلال امجد قلق وياسر جوباك.
• الشيء الاخر الذي اريد ان اقوله .. هو ان أي فترة للهلال تألق فيها الهلال وأبدع ووصل فيها الهلال للقمة تحقق له ذلك بواسطة اجيال مختلفة من اللاعبين.
• الهلال 2007 وهلال 2010 .. جمع بين اجيال مختلفة من اللاعبين .. بداية من هيثم مصطفى وريتشارد وعلاءالدين جبيرل مرورا بمهند الطاهر وعلاءالدين يوسف .. حتي سيف مساوي واسحاق كرنقو الذي لم يكمل حينها العشرين.
• أي فريق في العالم بصل للقمة بأجيال مختلفة .. جيل واحد او جيلين لن تحقق بهم بطولة.
• لا بد من وجود ثلاث اجيال اذا اراد الفريق ان يحقق بطولة.
• الهلال الآن يبحث عن التجانس والتفاهم .. وننتظر تركيبة او تشكيلة تجمع بين اجيال ومدارس مختلفة في الهلال.
• المدارس المختلفة مقصود بها اساليب اللاعبين .. يعني اسلوب ليليبو بختلف من جارجو .. والاتنين لا بد من وجودهما في الهلال اذا اردنا للهلال ان يكتمل بدرا.
• اصبروا على الهلال .. نتمنى ان يصل الهلال الى التوليفة المناسبة خلال سنوات قصيرة .. الآن اعتقد اننا عبرنا ثلاث سنوات من صناعة هلال يهز افريقيا كما فعل في السابق .. في خلال موسم او ثلاث مواسم على الاكثر سوف نصل الى الكمال.
• يمكن ان يحقق الهلال الآن المطلوب .. لكن بعد ثلاث مواسم سوف يحقق الهلال اكثر مما نتوقع .. وأكثر مما هو مطلوب منه.
• فقط علينا ان نصبر .. وان نعرف ان المرحلة الحالية مازالت مرحلة بحث وتجريب وإجازة.
• ارجع للموية الباردة.
• وإلّا اقفل على كدا.
• يتخيل لي احسن اقفل على كدا في (البرد) دا.
• …………………..
متاريس
• ننتظر اليوم الكثير من الهلال وهو يلعب امام حي الوادي.
• الليلة ان شاءالله الفرق يبقى (5) نقاط.
• قولوا يا رب.
• فريق حي الوادي فريق خطير .. وهو من افضل اندية الممتاز في هذا الموسم.
• احسموا من بدري.
• ما عندنا صبر للشوط التاني.
• الله غالب.
• بالتوفيق ان شاءالله للهلال.
• …………
• ترس اخير : سامع لي خبر كدا!!
ده كلام كبير يا ود عبد الماجد والجماعة البي غادي ناس الرفس والدفس ما بيقدروا عليه، لأنه شغل خاص بمؤسسة الهلال التربوية !!
مقال موفق جدا، ونتمني الجماعة بتاعين التنظير يقفلوا قدومهم وما يملونا فقر…..!!
بالنسبة لعيد مقدم والطيب عبد الرازق أعتقد إنه فلوران لو قال ما عاوزهم يمشوا طوالي، وحكاية إنه عيد يمشي حلمبوش فما شايف الموضوع خطير، أسلوب عيد بتاع الجري ساكت بيناسب حلمبوش، وعندك بجري المدينة أفضل مثال، ومع ذلك حلمبوش حا يفضل وصيف لينا إلي قيام الساعة حتي لو أديناه كل تيم الهلال الحالي بما فيهم المحترفين !!
بعد ١٥ سنة ممكن الهلال سيد البلد يمنح حلمبوش مكرمة في شكل لاعبين يتم شطبهم من الهلال وتسجيلهم في حلمبوش حتي يستطيع العودة للممتاز 😆😆😆