الهلال بقى لينا زي عرس الأهل

قزاز ورذاذ

محمد الطيب الأمين

الهلال بقى لينا (زي جميلة جديدها تم لما في الكتمان بتزغرد)!!

* أذكر في العام (٢٠٠٧) كنا بنضايق جداً لما يتم تأجيل مباراة للهلال.
* بنزعل.
* لأن الهلال وقتها كان بالنسبة لنا زي (شارع النيل).
* زي القهوة وصباح العيد وزواج الأهل.
* زي (عرس الجميلة الجديدها تم لما في الكتمان تزغرد).
* متنفس ومساحة للترفيه والسعادة واللقيا.
* أي هلالابي بتلاقيهو في المقبرة.
* لو ما قابلتو يوم المباراة وسط (٤٥) ألف مشجع بتقابلو في التمرين الرئيسي وسط (٢٥) ألف مشجع.
* وال(٢٥) ألف البيجوا التمرين الرئيسي في الغالب ما بجوا المباراة.
* ال(٤٥) ألف البيجوا المباراة هم غير ال(٢٥) ألف الكانوا في التمرين.
* عزة جد.
* كنا في حالة شوق طبيعي للهلال.
* ومن بعد ذلك مرت علي الهلال سنين عجاف.
* بدأ الهلال يتناقص إلا أن وصل مرحلة متأخرة من التواضع.
* الآن وبحمدلله يعود الهلال ويعيد فينا ذات الأحاسيس السمحة.
* إحساس إنك داير تشوف الهلال بيلعب يومي.
* وهذا الإحساس ما كان له أن يكون لولا الشكل المحترم والهيبة التي كست الهلال.
* هيبة ووقار.
* إحساس فريق ثابت على الملعب وشخصيته واضحة.
* الهلال في طريقه أن يصبح جوهرة بيضاء.
* جوهرة بيضاء بتلعب في الجوهرة الزرقاء.
* الملعب والفريق مكملين بعض.
* موضة وآخر موضة.
* صحية وآخر صحية.
* قيافة وفايت الناس مسافة.
* تعاين ليهو ما بتملأ ود عينك وهذا عكس ما قاله الراحل عوض جبريل : (لو تعاين ليها تملأ ود عينك ولو تعاين ليك ربنا يعينك).
* صحيح أن كرة القدم أهداف ونتائج ولكن صراحة أنا مبسوط جداً من الكاريزما والحضور.
* ما بقبل أشوف الهلال هزيل حتى وإن فاز بالخمسة.
* شوفنا حبيبي بنريدو غير علة.
* نتعثر في النتائج ولكن المستوى باهر وبإذن الله سنبلغ مرحلة الكمال قريباً وبعدها ح يكون الشكل متسق مع المضمون وعينك ما تشوف إلا النور.
* شوية انسجام وأضافة بعض العناصر ويكتمل الهلال بدر.
* شخصياً لا انتظر من الهلال لقب أفريقيا هذا العام ولكن لا أشك في أن الأزرق قادر على تحقيق هذا قريباً جداً.
* ولما نقول قريباً ربما يكون ذلك في العام القادم.
* ومؤكد أننا لن نرمي المنديل وسنتأهل هذا العام إلى ما بعد المجموعات.
* متأهلون بإذن الله.
* طبعاً ناس المريخ لما تسألهم بيقولوا ليك : الأهلي والمريخ متأهلين.
* بقدمو الأهلي على أنفسهم وهذا مفهوم بالنسبة لكل من (إنكسرت عينه).
* لكن نحن بنقول : التأهل من نصيبنا ولا نعرف من سيكون معانا.
* ثقة في الله متأهلين.
* أمامنا المريخ بالجمعة إن شاء الله نعود بالنقاط الثلاث.
* نثق في أنفسنا وفي لعيبتنا والجهاز الفني.
* وثقتنا أيضا في مجلس الإدارة الذي جعل كل هذا ممكناً.
* شكراً لجنة التطبيع ومزيد من العمل والتوفيق إن شاء الله.
* ونركب صافنات ونجيبة (هلالابية) واصلو الزول بيموت والذكرى تفضل حية.
* و.. و..
* وأهلاً بيهو.