الوزير والمرفعين والقش
في السلك
بابكر سلك
الوزير والمرفعين والقش
*ظروف سواء كانت مقنعة ام غير مقنعة
*أدت لتعطيل المدارس
*وضجت البيوت بالطلاب
*فاضت الشوارع تلاميذ
*ضاقت الأسر (برغم الضيق اليابا صديق)
*وغنت البيوت مع عقد الجلاد يلا يا أولاد المدارس
*وفتحت المدارس
*حبن غارز
*فتحت بعد زمن طويل وألم كثير
*بعد لبخة حلبة ومر حجازي
*فتحت
*ولكن هل فتحت بقرار مدروس
*أم فتحت خجلة من إعلان تجميد العام الدراسي؟؟؟
*ناس الأساس للصف التالت يمشوا سبعة يرجعوا حداشر
*ومن رابع لي تامن يجوا حداشر ونص ويرجعوا واحدة ونص
*الكلام ده كان ممكن يحصل زماااااان
*لما كان القبول بالذات بمدارس الأساس بكون جغرافي
*يعني أولاد الحلة بقروا في الحلة
*لكن هب أن لديك ولدين بس
*واحد في تاني وواحد في سابع
*وإنت ساكن امبدة وأولادك بقروا في الملازمين
*وهب إنو عربيتك مليانه بنزين
*لأنو لو اشركتهم في ترحيل بتكون داير ليك تلتين ألف شهريا للواحد
*الاتنين بي ستين
*وإنت ماهيتك طمنطاشر بي مية بشة
*أكيد حا تفتح للترحيل وترجع لخيار تنك عربيتك المليان
*تودي الصغير وترجاهو
*ترجعو حداشر ونص وتودي الكبير وترجاهو
*ترجع الكبير واحدة ونص تصل بيتك أربعة من فرط الشوارع الفي الحفر
*مش من فرط الحفر الفي الشوارع
*لما تصل البيت أربعة تغديهم شنو؟
*إنت ما مشيت الشغل يتغدوا كيفن عاد؟؟؟؟
*وإذا سقتهم سوا وخليت الكبير بره المدرسة والصغير دخل المدرسة
*وإنت مشيت شغلك
*على أساس الصغير يطلع ينتظر بره المدرسة والكبير يدخل المدرسة علي بال ما إنت تصل
*ومع ما نسمعه عن إجرام بالذات في حق الصغار
*بالتأكيد مافي داعي تجي راجع
*أنا ما عارف
*لكن الوزير عمل فينا غلوتية المرفعين والقش والخروف
*وداير تقطعهم النهر
*والمركب مابشيل معاك غير واحد منهن
*تشيل معاك القش
*ترجع تلقى المرفعين أكل الخروف
*تشيل المرفعين ترجع تلقى الخروف أكل القش
*ولو عملت فيها شاطر وفكرت تشيل معاك الخروف
*وترجع تشيل المرفعين
*ختيتو بهناك وتجيب معاك الخروف راجع
*تودي القش وترجع تشيل الخروف
*موضوعك برضو بايظ
*لأنو أول ما تودي الخروف بهناك
*ترجع تلقى بتاع موتر لفح المرفعين والقش وشتت
*لكن حلها كيف بس
*هكذا يكون سؤال الأسر
*علم مجهجه ولا جهل يوفر سلامة شفع ؟؟؟؟
*المهم
*أخبار الكورة شنو؟
*الكورة البتشبه الكورونا؟؟؟
*هل نحن مصرين لسه إنو عندنا أندية كبيرة
*ونحن نبحث عن من يستطيع أن يدفع تسييرا للنادي
*بصراحة
*أنديتنا خرفت لكن لسه ما كبرت
*أيها الناس
*إن تنصروا الله ينصركم
*أها
*نجي لي شمارات والي الخرتوم
*البقت بقت يا والينا
*والفيكم اتعرفت والفينا
سلك كهربا
ننساك كيف والكلب رقد وناااااام
وإلى لقاء