ببكي لكن ما بعرف يشتكي !!

بالعربي الكسيح

محمد الطيب الأمين

ببكي لكن ما بعرف يشتكي !!

* ليس هنالك مستشفى في العالم توجد فيه (كدايس) إلا في السودان .
* في السودان (الكدايس) في المستشفى أكتر من الدكاترة .
* (كديس) قصاد كل (مريض) .
* الكديس بجيك في العنبر أكتر من الطبيب .
* لو الدكاترة بمروا على العنابر بنفس مرور الكدايس ما كان في زول مات بالإهمال.
* مرة بتذكر كنا في مستشفى أم درمان ، والطبيب المفروض يجي ماري ٩ صباحا ، قاعدين لحدي الساعة ٣ الطبيب ما جا .
* وكل شوية نمشي مكتب (المدير الطبي) نسأل عن مرور طبيب الهناء ده .
* المدير الطبي يقول لينا : الدكتور بجي ماري عليكم شوية كده .
* المهم .. في كديس لونو (أبيض جدا) ، الكديس ده في جسمو في (خط أسود) حوالين الرقبة .
* كل نص ساعة الكديس ده بجي ماري علينا في العنبر .
* وأنا كل ما اشوفو واشوف الخط الأسود في رقبتو أقول الدكتور جا بسماعتو.
* والله صحي.
* قلت يمكن المدير الطبي رسل لينا (الممرض ده) .
* اصلو كان كديس أنيق وواثق من روحو.
* في كدايس في مستشفى أم درمان عادي ممكن تشيل منك (عينة للدم) و(تركب ليك الفراشة) .
* داير تكره حياتك جرب إنك تكون مرافق وتنوم في المستشفى .
* ح تطلع (عيان) والله.
* تدخل (مرافق) لكن بتمرق (عيان).
* تنوم في الأرض ، تأكل مع الكديس في (طبق واحد) ويجي الباعوض يأكل منك الاكلتو انت قبل شوية .
* نوم الأرض معروف في المعسكرات العسكرية بالنسبة للمستجدين.
* ومعروف في المستشفيات السودانية بالنسبة للمرافقين .
* لكن نوم الأرض بالنسبة للمحترفين في كرة القدم .. ده جديد علينا .
* محترف المريخ الغاني رشيموند أخرج الهواء الساخن في حوار مع موقع (خبرك) نشرته صحيفة (قوون) .
* بكى وشكى المحترف الغاني من الظروف الكارثية التي يعيشها الآن.
* قال داير يفسخ عقدو ويرجع بلدو .
* ليه ؟
* قال بيعاني في التواصل مع أعضاء المجلس وادم سوداكال حظر رقمو .
* قال بيعاني في الأكل وموية ما في .
* والسكن ما فيهو (مولد كهربائي) والكهرباء اليوم كلو قاطعة .
* قال بينوم علي الأرض.
* الأخ (مرافق) ولا حاجة ؟
* انت محترف ولا (مرافق مريض) عشان تنوم في الأرض؟
* الحمد لله الزول ده ما قال : (والكدايس كتيرة) .
* الوضع العايش فيهو محترفكم ده اخير منو يمشي يسكن في حوادث أم درمان .
* ده وضع تنقصه (الكدايس فقط) .
* وتعال اناقشك .
* الجابرك شنو على ده كلو؟
* يعني خلاص المريخ من بطولاتو ولا من مشاركاتو الأفريقية؟
* الجابرك شنو على العيشة دي ؟
* ده محترف ما محترم بس ، لو محترم يفترض يمشي السفارة ويمشي الإتحاد العام ويقلع جوازو بالرجاله ويسافر .
* قاعد لشنو ؟
* الزول بتمسك بحاجة فيها فايدة .
* معقولة لا تأكل ولا تشرب وتنوم في الأرض ورقمك محظور!!
* لشنو وعشان منو يا اللخو؟
* عشان المريخ الشهير ب(الإصيفر) الوصيف البيشارك في الابطال (صحبة راكب) وبعد ده بيطير من التمهيدي ؟
* بالغت والله .
* محترف مسكين والله .
* لا بيعرف يشتكي ولا بيعرف أتصرف.
* خليك كده .. ارقد في الأرض لما تلقى سوداكال فات .
* الآن الفرصة كبيرة بالنسبة للهلال من أجل ضم المبرزين بكشف المريخ .
* إذا كان ده محترف تتم معاملته بهذه الطريقة يبقى المؤكد كل اللاعبين (بطونهم طامة من المريخ) .
* أول حاجة يفترض الهلال يمنح هذا الغاني رشيموند غرفة في فندق الجوهرة الزرقاء .
* خلوهو يجي يقعد لحدي ما الله يفرجها ليهو .
* لانو دي سمعة بلد في النهاية .
* ما ممكن الراجل جاكم محترف فجأة يلقى نفسو (مشرد) .
* لقى نفسو (مرافق) .
* اقيفوا مع هذا الغاني يا هلالاب .
* نقيف معاهو من باب الأخلاق بس .
* وندخل في مفاوضات مباشرة مع رمضان عجب ومحمد الرشيد .
* المريخ قاعد في السهلة الأيام دي .
* والله أنا لو كنت محل السوباط المريخ ده ما اخلي فيهو إلا صلاح نمر .
* اشيل البينفع مع الهلال والما بينفع بسجلهم لأندية تانية .
* ضر كده بس .
* افتحوا ملف رمضان عجب فهو (مهمل) .
* رمضان عجب سنعود لملفه في الأيام القادمة إن شاء الله .
* وغايتو جنس غايتو .
* و..و..
* ومنايا ليك ما وقف واتمنيت انا ……. (أسبوع بس مرافق عشان تعرف حاجة) .