بجيب ليكم (قوميز والأخطر من قوميز) !!
بالعربي الكسيح
محمد الطيب الأمين
بجيب ليكم (قوميز والأخطر من قوميز) !!
* في العادة .. (التاجر لما يفلس بيرجع للدفاتر القديمة) .
* بيرجع للدفاتر القديمة (عسى ولعل) يقوم على حيلو بعد (الفلسة) .
* بيشوف الدفتر ، عايز من حاج أحمد (٦٠٠) ومن حاجة صفية (٢٧٠) ومن أستاذ عبد الله (٤٢٠) .
* ويبدأ يطارد الجماعة ديل .
* يلقط الديون القديمة و(ينعنش) من جديد .
* نظرية (الدفاتر القديمة) لا تصدق في أغلب الأحوال.
* وخاصة في الأيام دي .
* حاج أحمد لما شال من الدكان حاجات ب(٦٠٠) كانت ال(٦٠٠) بتجيب شوال سكر .
* ووقت رجع ال(٦٠٠) المسجلة في (الدفتر القديم) فقدت قيمتها ولم تعد تشتري حتي (ربع شوال سكر) .
* هذه النظرية تبدو فاشلة جدا في كرة القدم .
* نظرية (الدفاتر القديمة) نادر جدا تنجح في مجال كرة القدم .
* أي نادي (فلس ورجع للدفاتر القديمة) لم ينجح .
* قد لا يكون الفلس ماليا ، ربما يكون الإفلاس فكريا أيضا.
* غادر سادومبا الهلال بعد سنوات ذهبية قدم فيها (كل حاجة) .
* تمت إعادة ساسا مجددا ولكنه لم يقدم (ولا حاجة) .
* الآن لجنة تطبيع الهلال تدرس إمكانية إعادة المهاجم امبومبو.
* ومع احترامنا الكبير لأعضاء اللجنة واحترامنا الأكيد لكل من يطالب بهذا اللاعب إلا أننا لا نبارك هذه الخطوة .
* نعم امبومبو صاحب قدرات بدنية وفنية جيدة ولكنه ليس بالمهاجم السوبر الذي (نرجع ونبحث عنه في الدفاتر القديمة) .
* عندما طالبنا الكاردينال بحل مشكلة امبومبو وإعادته كان ذلك بسبب (خانته الفاضية) بعد أن (مشى وما جا) .
* شرد وقلنا للكاردينال رجعو بدل الخانة تكون فاضية .
* وكنا على ثقة بأن الكاردينال لا يستطيع التعاقد مع لاعب أفضل من وامبومبو.
* أما الآن فإن امبومبو لا يعتبر طموح بالنسبة لنا ونتمنى أن لا يكون هو طموح لجنة التطبيع.
* لازم طموحنا يكون أكبر يا سوباط .
* جيب لينا (قوميز والأخطر من قوميز) .
* نحن ما دايرين ننسخ (هلال الكاردينال ونعمل ليهو لصق في هلال السوباط) .
* دي فترة وعدت.
* لابد من اختيارات جديدة وأسماء كبيرة.
* وعشمنا في السوباط أكبر من إعادة امبومبو.
* نحن خاتنك لقوميز ومن هم في مقامه .
* وحتى لا نقع في التناقض ونحن نطالب بعودة مهند الطاهر ، أقول هنالك فرق واختلاف بين المطالبة بعودة الغزال والمطالبة بعودة امبومبو.
* مهند ولد الهلال وقال داير يختم حياتو في الهلال.
* عندو تاريخ ومواقف وعرق ودم مع الهلال.
* وللعلم مهند ما جاي عشان يلعب (٩٠) دقيقة ويبقى كابتن والكلام ده.
* مهند جاي يختم حياتو وبس.
* (٦) شهور إن شاء الله يقعد في الكنبة .
* الكشف فيهو (٣٠) لاعب .
* نرجع مهند ونعتبر الكشف فيهو (٢٩) لاعب .
* ما تقول لي نرجع امبومبو ونعتبر الكشف فيهو (٢٩) لاعب.
* قلت ليك في فرق بين مهند وامبومبو.
* ونحن ما بنبخل على مهند بخانة .
* وده ما كلام عاطفي.
* في ناس يقول ليك : وقت دايرين ترجعو مهند رجعو معاهو طارق أحمد آدم وعمار مرق وبسطاوي .
* يا اولاد الحلال مهند ما جاي يلعب ، جاي يختم حياتو وبس .
* اليلعبوا ال(٢٩) لاعب الباقين ونخلي مهند للتمارين.
* نخلي مهند يلعب (٧) دقايق في كل مباراة.
* كان لعب كتر خيرو وكان ما قدر يلعب برضو كتر خيرو .
* أخلاق مهند ومحبة مهند للهلال بتستاهل الستة شهور .
* وموضوع مهند سنعود له في عمود أخر .
* المهم.
* القروش في ، وأفريقيا مليانة نجوم ، طيب ليه نرجع لامبومبو وموكورو؟
* مش ممكن نجيب زول أفضل من امبومبو؟
* ممكن ولا ما ممكن ؟
* الطموح لابد منه .
* لا أعرف هل محاولة إعادة امبومبو لها علاقة بحقوقه طرف الهلال أم لأ ولكن في كل الأحوال نحن قادرين نجيب أفضل منو .
* نبحث ونتابع ونرصد .
* بنلقى إن شاء الله.
* الجيش الرواندي فيهو مهاجم بيلبس (١٠) زي (السيل) ماشاء الله .
* الاشانتي أيضا فيهو مهاجم وبرضو بلبس (١٠) زي نار الضلع .
* بالإضافة للنجم (جسي) الذي كتبنا عنه أمس.
* عشان نمشي قدام حقو ما نعاين ورا كتير .
* يا تجيب محترف أجنبي (سوبر) يا كمان بلاش .
* أجنبي نص كم ما بينفع .
* ضياع قروش في الفاضي .
* و..و..
* والله في .