برغم الخمسة ترحل ونص وخمسة ومؤتمر ضعيف جاب لينا المغصة

تغريدة واتساب
بقلم : معاذ أبومؤيد
برغم الخمسة ترحل ونص وخمسة
ومؤتمر ضعيف جاب لينا المغصة

شكرا شفوت الميدان فقط
شكرا شفوت المدرجات فقط
شكرا الجهاز الفني فقط
والباقين ارحلوا الي اي مكان
فوز بمجهود لاعبين لاغير
(الحمد لله علي كل حال )
قالو المؤمن مصاب ونحن حاليا مصابين بوجودكم !!
شفتوا حال المدرجات بالله في اكتر من كده رسالة لرحولكم !!
شفتوا حال الميدان تاني الباقي شنو ويكون ميدان ترابي !!
شكلها مبارياتنا الجاية كلها غبار!!
شكرا التراس الاسود لتكريمكم مجدي وجمال
والالتراس عندهم يوم السبت كلام
بس عندي سؤال
منو الدفن مجدي عبداللطيف بالحياة
ومنو القتل رمضان في الطرف الايمن
سنعمل بحث قريبا!!
شكرا الالتراس مثنى وثلاث ورباع
وتحية خاصة لالتراس الاسود
السبت يوم حوبتكم،،،،
•••••••••••••••••••••••••
نجي لمؤتمركم ونمسكها معاكم نقطه نقطه
مقدمة قبل الدخول في النقاط
المؤتمر الصحفي بفندق كانون دا يسموه ذيادة منصرفات!!!
وقت النفرات تعملوها في النادي ومؤتمراتكم تودوها لي غادي !!!
ونمسك ملخص نقاطكم في المؤتمر
1/كل مايخص شكوى القروبات اشاعة مغرضة
طيب اشاعة طلعت من وين وكيف وبتين وهل قاضيتو الصحف الناشرة الكلام!!!!!
2/الاعلام يعمل ضد مصلحة المريخ
مش ياهو الاعلام الكان سند ليكم اول ايام وجزء كبير منهم شارك في النفرات وفي مباراتكم الفاتت عملو اعلانات ودعموكم بالدينارااات!!!
مصلحة الكيان دي كيف فهمونا؟؟
3/من يدعون اننا مكنكشين
فى شنو يكنكشو فيهو ؟؟
هي الكنكشه دي الي بصباع أمير ولاغراء كنكشه اكتر من رفضكم للاستقالات !!
كنكشه اكتر من طلبكم للتمديد !!
كنكشه اكتر من صوركم والتصريحات !!
قال في شنو يكنكشو فيه
طيب ماترحلوا اليوم قبل يوم سبعة وعشرين؟؟؟
4/لا يوجد تمرد وسط اللاعبين
التمرد دا الا يدخلوا الغابة ويشيلوا سلاح !!
اربعة عشر لاعب يسافروا والباقي ياربي كلو مصاب ؟؟
غايتو الا ينادوا نفسهم ياكمرد
ويارفيق عشان يكونوا متمردين،،،
5/لم نوقف تراوري
والله وقفتوا ولا خليتوه اصلا مرات كتير جايب لينا الضغط وصايم ليه مده من الاهداف !!
6/ لن نستقيل ابدا
يعني حتورثوا النادي للاحفاد ولا حتبيعوه في مزاد
حتستقيلوا حتستقيلوا وحترحلوا حترحلوا!!!
7/اللعيبه صرفوا المرتبات حتي شهر مارس!!!
لو صرفوا القلتوهم في باقي كلامكم في المؤتمر يكونوا لعيبة الجيران !!!
8/هل يريد منا الصحفيين ان نقوم بنشر ايصالات صرف مرتبات اللاعبين كل شهر؟؟
طيب طالما الاعلام طالب معناة مافي نار من غير دخان
وطالما صحيفتكم فاتحة للتجمع والمعارضة افتحوها للايصالات عشان تسكتونا والاعلام يشوف شغلة تاني!!!
9/يأسف نادي كبير مثل المريخ ان ينشر ايصالات استلام مرتبات للاعلام يجيب تكون المصداقية حاضرة
عمرو نادي المريخ ماحتاج لنشر خطابات ولاعادة عندنا الي في فترة تكليفكم !!!
صلحوا مصداقيتكم مع اللاعبين نحن تومتيكي بنصدقكم،،،،
10/كوفي لم يستلم مرتب مارس
فوق قلتوا كلهم استلموا الكلام بقروش مااي زول بيتكلم!!!
11/جمال سالم عنده مقدم عقد من شهر 5 سنه 2015
كل لعيبة العالم عندهم مقدمات عقود وتاريخكم يعني مديونية علي جمال الوالي
طيب ماكان في تسليم وتسلم
ولاماصدقتوا الوزير عينكم جريتوا جري للمناصب !!!
12/سالمون لديه متاخرات مقدم عقد من العام الماضي
ينطبق عليه نفس كلام جمال
13/مرتبات ابريل ستسلم للعيبه قبل المباراه الافريقيه
طيب منتظرين انتو قايلين المباراة الافريقيه بعد شهر كلها باقية ليها خمسة يوم !!!
14/راجي استلم 50%من مقدم العقد
راجي زاتو وينو ماخد اجازه سنوية لزواج بداية الموسم
واسة قال مصاب واجازة مدفوعة الراتب بس ياربي حيتعالج بتبرع احدى روابط الخارج ولا حتوده تبع التامين !!
15/عمال النادي نفسهم صرفوا حتي شهر مارس
عمال النادي ياتم ونجيلة الاستاد الليلة تقول زريعة بتاع ابري مشتتة شتيت !!!
16/المدرب مقدم عقده 50الف دولار استلم منها 45الف دولار
عشان كدى صابر علي الخمسة الف دولار بس نبرة الصوت عندو قلت بقى مابكورك ذي زمان!!!
17/تكلفه رحله الجزائر 7500دولار
انشاء الله سددتوها وماتكون مديونية وتظهر لينا في الميزانية!!!
18/تم التجهيز لرحله المغرب
بس ضامنين عدد اللعيبة المسافرين يعني العدد مكتمل متاكدين!!!
19/تكلفه رحله المغرب 14.5الف دولار
ربنا يقويكم رحلة المغرب ضرب اتنين من رحلة الجزائر شكلو كل دولة في قارة!!!!
20/وضعنا استراتيجيه شامله للتسجيلات
دي ماظنيت تقدروا عليها الى تصعدوا من شباب طارق المعتصم والايام بيننا الخوف تجيبوا لينا نسخ من كريم الحسن وتكون عندكم مكنة تصوير
21/على جعفر باقى بالمريخ ومتمسك بالمريخ حتى لو ما اخد قروش
لا ياشيخ دي البطيخة علي قول عادل إمام النقطة دي امسكوا فيها وماتنطوا بعدين!!!
22/الوك حيلعب للمريخ اذا اتحلت مشكلة الجنوبين !!
نقول الجنوبين مشكلتهم ماتحلت حننتظر كتير ونكون واقفين في نفس المحطة مش ممكن يتسجل اجنبي ولا دي فيها رقم وطني برضوا ولاشمار الفيفا طلع شمار في مرقة!!!
23/هزيمة المريخ لاتعني نهاية الدنيا
الهزيمة والفلس الاتنين مابتلموا لانوا الجري والطيران دا ماشبهنا
ننهزم ونحن مقتنعين بالاداء ونقول توفيق وعدم توفيق
لكن هزيمة عارفين اسبابها قصور اداري ماتنبلع!!!
دا كان ابرز نقاط حديثكم وفي نقطة اخيرة اجلنها لنهاية التغريدة،،،
••••••••••••••••••••••••••
مسك الختام والزبدة
طالما كلمة ارحل بتجيب ليكم القولون وتشتت افكاركم
نعيدها ليكم ولو عندي مكرفون كانت بقيت ذي عصاير السوق العربي
ارحل ارحل ارحل ارحل ارحل ارحل
••••••••••••••••••••••••••
ونحن علي المدرج ندعم ونشجع ونتفرج
بس عمرنا مافوتنا صلاة ونحن في المدرج بنصلي العشاء في المدرجات
ونصلي مرات المغرب جنب البوابات،،
ولو المباراة مهم نصلي في جامع
الاستاد!!
يعني مابنأخر الاوقات
لكن قصة والله وحكاية
المريخ شاغلكم ولا المناصب ولا الفلس ؟؟؟
ياشفوت المدرجات فرجتنا الجاية عشان شوفت الميدان فقط
ومن اجل الكيان
لكن ناس الكنكشة ديل عندنا ليهم لافتات
ارحل ارحل ارحل ارحل ارحل ارحل
عشان مصرنانكم يهيج
••••••••••••••••••••••••••
همسة اخيرة
نصيحة ليكم مؤتمراتكم الكتيرة دي معناها انتو مهزوزين ومفلسين!!
ارحلوا وماتكونوا مكنكشين
وماتنسوا تسوقوا الكتائب الالكترونية معاكم
جماعة تصدوا لهذه المهمة
وجماعة والله ماقصروا حين هرب الاخرون!!!
••••••••••••••••••••••••••
خارج النص
حقك علينا الصحفي والاستاذ ابوالعلا ماكتبنا قضيتك الليله
لكن باكر سنفتح ملفك مع صحيفة المريخ والمدير
ونحن كقروبات نتمني الشفاء العاجل لابنك محمد
ورواتبك عند الخالقني وخالقك مش عند ناس ماصدقت ترتقي من صفحات فيس الي مكاتب وادارات !!
ديل اتعودوا علي اللايك للمنشورات مامتعودين علي النقد ودفع الرواتب!!!
باكر بنجي للموضوع من كل الاطراف وحتي اعمدة بعض الكتاب اعمدة فحواها تحيات وشكر ومافيها اي صوت شجب او نقد!!!
••••••••••••••••••••••••••