(بصلة) ونص دستة زراير

بالعربي الكسيح
محمد الطيب الأمين
(بصلة) ونص دستة زراير

* عندما كان الدولار يعادل (2) جنيه، كنا نحس بأن (الجيوب) الموجودة في (الجلابية) و(القميص) ما ذات قيمة ..
* الجلابية فيها (3) جيوب بخلاف (جيب الساعة) الموجود غرب (الصدر) وجنوب (البطن) ..
* وعندما (وقع الجنيه) وأصبحت القروش رخيصة أصبحنا نطالب بأن تصبح الجلابية (جيب كبير) ..
* في العادة الزول بيلبس جلابية فيها جيوب، والآن حقو نلبس جيوب فيها جلابية..
* نحن محتاجين للجيوب أكتر من الجلابية..
* تملأ جيوب جلابيتك التلاتة عشان تمشي تشتري ليك عدد (واحد) بصلة للملاح و(واحد) صباع معجون ..
* وإذا أردت من باب الفشخرة أن تشتري (ربع كيلو لحمة وكيلو بطاطس وكيس مكرونة وجرسلين ورطل لبن) فهذا يتطلب أن تلبس (جيب كبير فيهو جلابية)..
* ولذلك أتوقع الواحد لما يمشي يقول للترزي أعمل لي جيب طولو مترين وعرضو متر ونص وأعمل فيهو نص دستة زراير..
* بمناسبة الزراير ..
* في (جلابية) بيكون فيها (زراير) ما حقيقية، أو هي زراير مخيطة ساكت لا بتفتح ولا بتقفل..
* قاعدة منظر ساكت..
* زراير (كاذبة)..
* زي الموز الكاذب..
* وحقيقة الزراير الكاذبة والموز الكاذب كلاهما يذكرني بالمريخ الذي عندما شاهدناه أمام الاتحاد الجزائري افتكرناه (زراير جد جد) ..
* لما شفناهم أمام الجزائري افتكرناهم (موز جد جد) ..
* ولما جينا شفناهم أمام (فايبر اليوغندي) لقيناهم (زراير مخيطة ساكت) ..
* لقيناه (مدفور كاذب) ..
* المريخ أمام الجزائري كان نشيطاً وأمام اليوغندي لم يكن نشيطاً ..
* وغايتو جنس غايتو ..
* وجود نزار حامد وبشة الصغير في تشكيلة واحدة يشبه (مسرح في خشبته يغني وردي ومحمد الأمين) ..
* والله صحي ..
* ووجود الثعلب ونزار حامد في تشكيلة واحدة يشبه (صينية) في (صحانتها) توجد (شية جمر وشية صاج) ..
* وبما أن (هذا هو هذا) فإننا نعاني من (تخمة في الفرحة) ..
* نسأل الله أن يحمي نجوم الهلال من الإصابات والأمراض ..
* كسر الهلال (شوكة) أهلي شندي خلال الموسم الماضي وبالتالي (قعد) أهلي شندي في (علبو) ..
* اليوم نحترم أهلي شندي باعتباره خصماً جيِّداً ونحترم دوافعه باعتبار أن الفوز على الهلال شرف كبير ولذلك لا مجال للاستهتار .
* المباراة دورية ولها وزنها ولكنها تدخل في إطار الإعداد الإفريقي ..
* لا نريد للهلال أن يتراخى ويظهر بصورة مغايرة عن تلك التي ظهر بها في مباراته الإفريقية الأخيرة أمام الجيش ..
* ثبات المستوى هو عنوان الفرق الكبيرة ..
* وحقيقة أتمنى أن يغيب شيبوب عن مباراة اليوم أيضاً ..
* لا ننكر قيمة شيبوب الفنية وإمكانياته الكبيرة ولكن شيبوب يحتاج للكنبة ..
* الكنبة يمكن أن تعلم شيبوب (التواضع) وعدم الفلسفة..
* المهم ..
* إعلام المريخ (الحديث) قال إن جمال سالم زار بعثة (فايبر) اليوغندي قبل ساعات من مباراتهم أمام المريخ ..
* يعني سوء الأداء وضياع ركلة الجزاء وهدف اليوغندي كلها بسبب زيارة جمال سالم ؟
* دي زيارة غريبة وعجيبة عديل ..
* طيب والله حقو الهلال يمنح جمال سالم إذن لمعاودة والدته بيوغندا ..
* أدوهو إذن يمشي يشوف أمو ويزور معسكر فايبر ..
* عليك الله ده ما وهم ده ؟
* هسه جمال سالم لو عسكر عدييل مع فريق فايبر هل هذا يبرر تواضع وسوء أداء مدفور البلد؟
* عندي ليكم اقتراح ..
* قدموا شكوى للكاف واكتبوا في الشكوى إنو جمال سالم (زار) منافسنا ..
* هكذا اقترح ..
* وأي زول طبعاً حر في (مقترحاتو) ..
* هل تصدق عزيزي القارئ إن المريخ أول نادي في العالم (يشتكي غلط) ؟
* هل تعلم أن الشكوى صحيحة لكن المريخ اشتكى غلط ؟
* هل تعلم إن المريخ أول نادي في العالم يقدم شكوى بينما الجهة التي قدم لها الشكوى لم تعرف (المريخ بيشكي من شنو) ؟
* قالوا محكمة كاس ما عرفت المريخ بشكي من شنو بالضبط ؟
* والله صحي ..
* لا عرفوهو بشكي من ظلم ولا بشكي من صداع نصفي ولا بشكي من تعذيب ضمير ..
* شكلهم بيشكوا من تعذيب ضمير ..
* محكمة كاس استغربت في شاكي ما عارف يشكي ..
* ولذلك لن أستغرب إذا اشتكى المريخ فايبر اليوغندي في عدم قانونية (زيارة) جمال سالم لبلدياته عند زيارتهم الخرطوم ..
* وغايتو السنة دي بالذات يا متنا من الضحك ويا كمان الضحك كتلنا ..
* تعاقد الهلال مع اليماني (محلل فني للأداء) ضربة معلم ويمكن أن يخدم ذلك الهلال كثيراً وتحديداً في مشواره الإفريقي ..
* اليماني شاب صاحب نظرة وعمق وحضور مميَّز ..
* اليماني يجب أن يركز في تشريحه على البطولة الإفريقية باعتبار أن الهلال لا يعاني محلياً ..
* محلياً ما عندنا مشكلة ..
* نتغلب، نتعادل، الفيفا تخصم مننا ست نقاط، في النهاية الدوري قاعد يكون حقنا ..
* هسه زي المريخ ده ما عايز تشريح ..
* حالو مشروح ..
* أخطاء المريخ النشيط عندما فاز على الاتحاد الجزائري بالأربعة لأن الفرق الكبيرة عندما تنجرح من الفرق الصغيرة ستغضب وستثور ثورة يصعب إخمادها ..
* ما عارف لكن شامي لي ريحة شلباية بالدكوة ..
*شامي لي ريحة وحدات أردني بالحلزوني ..
* وتبكو بس .. عين قطرة وعين مس ..
* ونركب صافنات ونجيبة (يوغندية) وأصلو الزول بيموت والذكرى تفضل حية..
* و..و..
* وبي زيارتك بيتنا نور وكلو …. (جمال سالم).