بعتذر لأنني أكتب هذا العمود وأنا (نصف حفيان) !!
بالعربي الكسيح
محمد الطيب الأمين
بعتذر لأنني أكتب هذا العمود وأنا (نصف حفيان) !!
* في حياتنا الإجتماعية السودانية لما (تشكر زول) بيقولوا ليك : (كده رأسو بِكبر) .
* يقول ليك : كفاية خلاص فلان ده رأسو بضرب بعد كده .
* ولعل الشاعر الراحل عمر الطيب الدوش قد استفاد من هذا (القول) وقام بتوظيفه في (حتة تانية) وبذكاء مدهش .
* الدوش استفاد من وصف (الرأس البِكبر عند الشكر) وقال في تعبير جديد وفريد : (كِبرت كُراعي من الفرح نص في الأرض ونص في النعال) .
* هناك (الرأس بكبر من الشكر والمدح) وعند الدوش (الكُراع بتكبر من الفرح) .
* وبما أن ذلك كذلك فلا أتوقع أن تكون هنالك (كُراع زول هلالابي صغيرة في هذه الأيام) .
* كلنا في الهلال (كِرعينا كبرت من الفرح) .
* هسه أنا (كُراعي نص في الأرض ونص في النعال) .
* والله صحي.
* بكتب ليكم في العمود ده وأنا (نصف حفيان) .
* حفيان من الفرحة .
* من التسجيلات ومن الحاجات البيعمل فيها مجلس السوباط .
* أنا ما عارف السوباط ده كان وين من زمان ؟
* بالجد أنا مستغرب .
* الزول ده كان وين يا الطاهر يونس ؟
* معقولة الزول ده الزمن ده كلو كان قاعد ومخلينا نحن مع البشتنة بتاعت (واصل سيرك وما بندور رئيس غيرك) ؟
* إتأخرت كتييير يا سوباط .
* وبعد ده يجيك مريخابي تمهيدابي (داقي سستم) ويقول ليك السوباط مريخابي .
* حالتو مريخابي ؟
* طيب لو كان هلالابي كان عمل شنو يا ربي ؟
* هسه عليك الله المريخابي السوباط القلع منكم أبو عشرين والعجب ومحمد الرشيد ، ولا الهلالابي سوداكال الفرط في أبو عشرين والعجب والرشيد ؟
* كده ورونا المريخابي منو والهلالابي منو ؟
* المهم .
* تسجيلات الهلال السنة دي جات تحت شعار :(الزول بفتخر وبباهي بالعندو) ، تسجيلات تحت لافتة مكتوب عليها : (سمحة المقدرة) .
* وأجمل ما في هذه التسجيلات إنها (فنية بحتة) وحسب الخانة والحاجة .
* لأول مرة ومنذ سنوات بعيدة يسجل الهلال تسجيلات فنية .
* حتى العجب والرشيد لما وقعنا معاهم عقودات (ملزمة) كان ذلك للحاجة الفنية .
* لكن هسه لما تجي تشوف كشف الهلال بتلقى تسجيل عجب والرشيد ضربة إدارية.
* ونحن بنطلب من السوباط يتعاقد ويستجلب محامي أجنبي متخصص في حالات (الرشيد وعجب) .
* جيب ليك محامي واحجز ليهو جناح في برج الفاتح وخليهو يتفرغ لينا لموضوع العجب والرشيد .
* اصلا قضية هذا الثنائي ما محتاجة محامي لأنها قضية واضحة لكن القانون في السودان (أعرج) عشان كده للضمان جيب ليك محامي أجنبي.
* والله نحن بالمناسبة (عيونا بقت قوية والله) .
* قول لي كيف ؟
* قلعنا أبو عشرين رجااااله كده ولسه بنكابس في أتنين تانيين.
* قوة عين عجيبة .
* وقفنا (الإصيفر) برجل واحدة وخليناهم يفرحوا بحاجة هي في الأساس حقتهم .
* الفرحة الدخلت في (الصفيراب) لما عرفوا السستم ما طابق بيانات عجب ومحمد هي نفس فرحتنا بياسر مزمل وبوغبا .
* فرحان عشان رمضان عجب لسه ما جاء الهلال !!
* شوف مستوى طموحاتهم بقى كيف ؟
* كل طموحاتهم إنو العجب ما يمشي الهلال .
* سبحان الله .
* نحن نفرح بياسر وبوغبا وجيسي ووضاح والطيب عبد الرازق ومجاهد فاروق والكنغولي والعاجي وأبو عشرين وهو فرحان عشان محمد الرشيد ما مشى الهلال .
* لكن ليكم علي اصلو ما بنخليهم ليكم .
* ندفعك دم قلبك ونوقفهم من ممارسة النشاط ونعاقب المريخ ونحرمو من التسجيلات .
* والله نعمل فيكم عملية (نجار حلتنا ما عملها في خشب جارتنا) .
* وتبكو بس .. عين قطرة وعين مس .
* مجلس الهلال لم يكتفى بهذه التسجيلات المدهشة فقد تعاقد مع جهاز فني من طراز رفيع .
* مدرب ومساعد مدرب ومدرب لياقة ومدرب حراس وأخصائي علاج طبيعي .
* طقم أجنبي قادر على فعل الكثير إن شاء الله .
* تسجيلات وجهاز فني وجوهرة زرقاء .
* بنشكر الكاردينال على هذا الإستاد الذي وجد اخيراً (الفريق البستاهلو) .
* بنشكر الأرباب صلاح إدريس على هذه الروح الجميلة وهو يفتح صفحة جديدة مع الهلال .
* بنشكر محمد عثمان كوارتي وهو يتكفل بصفقة مؤيد عابدين .
* والشكر بعد الله للرئيس السوباط ولنائبه الطاهر يونس والفاضل التوم وسعادتو السر وباشمهندس رامي ونزار عوض مالك وإسماعيل والنجم عبد المهمين.
* شكراً على هذا العطاء والسخاء والكرم .
* شكراً على هذا الهلال وعلى هذه الروحة .
* والشكر من قبل لله .
* ونركب صافنات ونجيبة (هلالابية) واصلو الزول بيموت والذكرى تفضل حية.
* و..و..
* وكبرت كراعي من الفرح نص في الأرض ونص في ……. (إستاد الهلال) .
قال(وكبرت كراعي من الفرح نص في الأرض ونص في ……. (إستاد الهلال)) علي كدا انت حفيان بالكامل كرعينك الاتنين في الأرض مش نص يا فهمان.
قال (حتى العجب والرشيد لما وقعنا معاهم عقودات (ملزمة) كان ذلك للحاجة الفنية) كان للحاجة الفنية الهلال محتاج يتغير كلو وأي زول ممكن يلعب في الهلال بالمستوى الشايفنو ده وكان للعجب والرشيد نوم وأحلم تمت المطابقة للمريخ وفي انتظار عقودكم ان وجدت يلا قدموها.
قال (تسجيلات الهلال السنة دي جات تحت شعار :(الزول بفتخر وبباهي بالعندو) فصاحة ولداحة فارغة على فكرة المريخ خلص تسجبلاتو قبل اسبوعين وأخد الدايرو ودفع 120 مليار وخلى الفتات والرخيص يلا أمرحو وسجلو وأعملو من الفضلات هيلمانه،
قال (وبعد ده يجيك مريخابي تمهيدابي (داقي سستم) ويقول ليك السوباط مريخابي) طيب الهلالاب شنو مش مريخاب زعلانين ذيك كدا ولا ما قريت التاريخ .
قال (بنشكر الكاردينال على هذا الإستاد الذي وجد اخيراً (الفريق البستاهلو) دي بدون تعليق كلنا عارفين الحال المايل والما عندو التش بتخلع من عبدالرؤوف هههه قال روفا والله ما يشوفه.
قال (نحن نفرح بياسر وبوغبا وجيسي ووضاح والطيب عبد الرازق ومجاهد فاروق) وأحمد عبد العظيم وجمعة وحمدون وخميس وكرنقو وكردمان ووجدي وعلاء المصري والبوركيني وسيف الدمازين ومحمد عباس ديل منو مع اننا ما محتاجين ليهم وعلى فكرة العقرب رجع يعني 12 لاعب ممكن براهم يغلبوكم ,
قال (بنشكر الأرباب صلاح إدريس على هذه الروح الجميلة وهو يفتح صفحة جديدة مع الهلال) الأرباب المريخابي اللي حلف وقسم لو المريخ فاز بالدوري أنا أقلب وأشجع المريخ ولا واحد تاني .
قال (مدرب ومساعد مدرب ومدرب لياقة ومدرب حراس وأخصائي علاج طبيعي) يدربو منو ويعالجو منو والله ألا يلعبو ليكم هم ههه بح يخربكم ما عندكم شي دايرين يعملو من الفسيخ شربات.
يلا بلا لمة
أقر القانوني مدثر خيري أن لاعب المنتخب الوطني رمضان عجب سيخضع إلى عقوبة مغلظة من قبل الاتحاد العام لكرة القدم، وأضاف في تصريحات لقناة الملاعب أن العقوبة ستكون من شقين حسب نص القانون الأول عقوبة مالية والثانية عقوبة تأديبية تتراوح بين 4 أشهر إلى 6 أشهر حسب نص القانون المتعامل به، وأضاف مدثر خيرى أن من حق أس نادٍ انتهى عقدة في نادية وانقضت مدته من حقه أن يفاوض نادٍ آخر مع الاحتفاظ بحق ناديه الأصيل في حق تمديد عقده مع العلم أن السيستم الذي يحكم اللعبة دولياً في فيفا يمنح الأولوية للاعب وتجديد عقده في النادي مؤمناً أن اللاعب سيتم إيقافة وعقوبته وهذا مع احترامنا للاعبين الذين لا يعلمون بقانون كرة القدم والاحترافية التي لا يتعاملون بها كلاعبين محترفين في أنديتهم مشيراً إلى أن ما يحدث هنا لا يحدث إلا في السودان وهذه مشكلة حقيقية ستواجههم في مقبل الأيام
منقووول
تحية تقدير واعزاز ليك اخوي هجام. احب مداخلاتك وانتظرها دائما على احر من الجمر. صدقت وصدق مدثر خيري. المريخ يا هجام يا خوي في ورطة. تعرف الخطأ الوقعوا فيهو المريخاب انهم اعتقدوا بإنو بعدما ما مشى الكاردينال وقبلما يظهر الضعف على الفريق تحت قيادة المدرب الفقير فنيا النقر – اعتقدوا انو الهلال بعدة ما بتقوم ليهو قائمة – وحقيقة هم أساؤوا تقدير السوباط ولجنة التطبيع واعتبروها مجرد لجنة مؤقتة ستواجه ملفات شائكة ولن تفعل شىء لحدما يجى رئيس جديد. فإذا بالمريخاب يصابوا بصدمة كبيرة من الاشياء الرهيبة اللي قام بيها السوباط. يكفي فقط ان تقرأ ما كتبه خالد – فوق – وتشوف الجقلبة والهضربة والانكبة. الهلال سوف يظهر بثوب جديد بإذن الله ونهر السوباط اكتسح الجماعة “وبلاهم بلة عدوك: يا هجام عشان كدة الوساطات رقدت والجوديات بالكوم لكن زي ما بقول كتابنا الجميل محمد الطيب “تكبوا بس عين قطرة وعين مس” ولك تحياتي واحترامي.
اذا كان محمد الرشيد والعجب نشوفهم فى الحلم اذا لماذا ذهب وفد من المريخ لمكتب السوباط لحل المشكله قبل ان تصعد الى اعلى . ايها المريخاب التمهيداب لا يخدعوكم اعلامكم المضلل الحقيقه مريخكم يدار بى عشوائيه مثل تسجيلاتكم كلها عشوائيه وبالتالى الشطب سيكون عشوائي وسترون والايام بيننا . اين انتم واين السوباط ورفاقه هؤلاء حددو كل الخانات واللاعبين ونجحوا فى ضمهم جميعا” . يا تمهيداب بلو راسكم للعقوبات المغلظه المره دى . بالمناسبه اول شى ادفعوا باقى قروش تسجيل سيف تيرى لناس الخرطوم الوطنى لانو ما برحموكم فى تسجيل كردمان ههههه
انت من يومك حفيان من الصفر المعشعش من زمان وزاد الحفي مدفع السمان الله يستر ما تكون تمشي بدون سروال
كفرووتر/الخرطوم/ تقدم اللاعبان رمضان عجب ومحمد الرشيد، نجما المريخ والمنتخب الوطني بطلبين للجنة شئون اللاعبين بالاتحاد السوداني لكرة القدم، بغرض فسخ عقديهما مع نادي الهلال، وأخطرا اللجنة بأنهما يفضلان الاستمرار مع المريخ.