بيستهلك (فنجان) بنزين !!
بالعربي الكسيح
محمد الطيب الأمين
* واحدة من أجمل مميزات (عرس البيت) هي (الونسات الجانبية) ..
* الونسة الجانبية التي تبدأ بعد نهاية حفل الزفاف وتستمر حتى مطلع الفجر ..
* ونسة في الخاص والعام والسياسة والكورة وتكاليف الزواج ، وتعليقات لا يسلم منها العريس وأخوات العروس وحتى (حِنة أم العروس) ..
* هذه (الونسات) التى تعتبر (ملح المناسبات) إختفت بسبب (الصالات) و(الأندية) البعيدة ..
* الصالات الباردة والبعيدة قامت على أنقاض عاداتنا السمحة وتقاليدنا الجميلة ..
* دائماً العرس القريب سمح ..
* تلقى العريس (جار) العروس والكوفير في (سوق الحي) ..
* المعازيم بيجوا الحفلة (كداري) ، لا باص والي ولا روزا ولا مواصلات ..
* ممكن أثناء الحفلة بين الفاصل والفاصل تمشي البيت (تسخن ليك سليقة وتغير لبستك وتجي تلحق باقي الحفلة) ..
* وممكن ترجع البيت وتتابع باقي الحفلة من (سريرك) ..
* وحتى العشاء بيصلك في بيتكم ..
* هذه التجربة المتعلقة بـ(عرس البيت) نقلها الآن الكاردينال إلى (بيت الهلال) ..
* الكاردينال إستفاد من الثقافة السودانية في (الزواج السوداني) وهو يحول نادي الهلال إلى مجمع كامل متكامل ..
* بل هو إستفاد من تجارب الأندية العالمية الكبيرة ..
* في الهلال الآن يوجد (الملعب والنادي والفندق والمشفى والصالة) كل ذلك في مساحة (بتتمشي بالرجلين) ..
* ولعل الحدث الأبرز بعد (الجوهرة) هو الفندق ..
* شخصياً لم أنال شرف دخول فندق الهلال ولكن من خلال الصور التى شاهدناها وشاهدها كل أهل السودان نقول إن ما تم إنجاز حقيقي ..
* إنجاز يضاف للإنجازات التي قدمها الكاردينال ..
* من حق أي هلالابي أن ينتقد ويقول رأيه في الكاردينال رئيس الهلال ولكن من الواجب أن نقف عند الحسنات ونشيد بها ..
* فندق الهلال وكما هو واضح لا يقل عن الفنادق (5 نجوم) المتناثرة في العاصمة الخرطوم ..
* فندق بخلاف إنه سيمزق فاتورة الفنادق فهو قد منح الهلال كثيراً من (البريستيج) ..
* قليلة جداً الأندية في أفريقيا التي تمتلك (ملعب ونادي وفندق ومستشفى) ..
* قليلة جدا ..
* ونحن لنا الشرف بأن يكون الهلال من ضمن هذه الأندية الغنية والثرية والقليلة في أفريقيا ..
* الهلال لم يكتفي بتفوقه على الأندية السودانية فيما يتعلق بالبنيات التحتية بل هو تفوق حتى عل الأندية الكبيرة في أفريقيا والوطن العربي ..
* في وقت (يتقلب) فيه المريخ في أحضان الحكومة ذات الشمال وذات اليمين يدشن الهلال إنجازات كبيرة ومهمة ستبقى ما بقيت الدنيا ..
* وفندق الهلال الآن يشبه (عرس البيت) ..
* نجوم الهلال ممكن من الفندق يمشوا (كداري) للملعب ..
* على الأقل تبقى ليهم (تسخينة) ..
* من فندقنا وإلى ملعبنا مسافة بتاعت (تلاتة دقائق وسبعة ثواني) ..
* والسبعة ثواني ما بيناتنا ..
* يعني قول تلاتة دقائق ..
* التلاتة دقائق دي لو مشينا بالبص حقنا بتكون (19) ثانية ..
* والـ(19) ثانية بالحسابات بتستهلك (فنجان جاز) ..
* ولو ماشين من الفندق إلى الملعب بعربية صالون ممكن تستهلك ليها (ملعقة بنزين) ..
* نجوم الهلال ممكن بين الشوطين يرجعوا الفندق ينوموا حبة ويمشوا الملعب تاني ..
* لو في لاعب طلعوهو بين الشوطين عادي ممكن يمشي يكمل المباراة داخل الفندق من على شاشة قناة الهلال ..
* كلو هلال في هلال ماشاء الله تبارك الله ..
* الملعب ملعب الهلال، الفندق فندق الهلال، القناة قناة الهلال، المستشفى مستشفى الهلال ..
* زيتنا في بيتنا ..
* لا عندنا محمد الشيخ مدني ولا عندنا محمد جعفر قريش ولا عندنا محمد عبد الله مازدا ولا مغلوبين تلاتة ..
* نشكر ربنا ونزيد في شكرو ..
* من الفندق وإلى الملعب مسافة قريبة يا إنسان ..
* الملعب والفندق جيران بالحيطة ..
* ما في أجمل من كده ..
* وأنا صراحة لما قالوا فندق قلت يمكن يكون (لكوندا) أو (غرف ما شادة حيلا) ..
* لكن وبحسب الصور للأمانة الفندق تحفة يشبه الهلال وتاريخ الهلال ..
* وانا حقيقة أحسب أن إفتتاح الفندق الحقيقي يجب أن يكون غداً بعد مباراة الليبيري ..
* الإفتتاح الحقيقي نغلب الليبيري (تلاتة) وبعد ذلك كل الجماهير يعملوا (سيرة) لعريس أم درمان (من الملعب إلى الفندق) ..
* سيرة عديل بالدلوكة والرقيص والزغاريد ..
* ده الإفتتاح الحقيقي إن شاء الله ..
* صحيح أول أمس تم الإفتتاح في وجود (التورتة) ولكن ما تم هو (قيدومة) ..
* هذه الإنجازات الهلالية الكبيرة فيما يتعلق بالبنيات التحتية يجب أن توازيها إنجازات ومستويات كبيرة لفريق الكرة ..
* والكارينال يشكر على هذه الأعمال الكبيرة والمشرفة التي برهنت حبه الكبير للهلال ولكن ..
* ننتظر صناعة فريق مهاب يتماشى مع هذه الطفرة الكبيرة ..
* وننتظر (همة وإجتهاد) من نجوم الهلال حتى يكونوا على مستوى الحدث الهلالي ..
* فريق عندو جوهرة وقناة وفندق ومشفى وصالة ومسرح وأكايمية لابد أن يلعب (كورة قدم ممتعة) ..
* الآن فقط آن الأوان أن يصب الكاردينال كل جهده وتفكيره في صناعة فريق كرة بمواصفات عالمية ..
* وهذا لن يتحقق إلا بالتخطيط السليم والتسجيلات الممتازة وترك الخبز لخبازه ..
* ونركب صافنات ونجيبة (هلالابية) وأصلو الزول بيموت والذكرى تفضل حية ..
* و..و..
* ولو جارت عليك أيام تعال ….(بنديك غرفة ناصية في فندق الهلال) ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملوh التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
على متجر apkname
https://apkname.com/ar/net.koorasudan.app