تاني عايز يتلم الناموس حول الفانوس …… والمابشوفش من الغربال يلبس ليه نظاره
تغريده واتساب⭐?
بقلم : معاذ ابومؤيد
تاني عايز يتلم الناموس حول الفانوس ……
والمابشوفش من الغربال يلبس ليه نظاره
⭐⭐⭐
غايتو قدر ماحاولنا نبعد عن المشاكل والطلوع خارج النص اشخاص كده يجبروك علي الكتابه بشكل مختلف ويبعدونا عن القضيه الاساسيه للقضايا الهامشيه
⭐⭐⭐
تاني اطفال الانابيب عايزين يطلعو في الكفر ويظهرو في الصوره
اطفال الانابيب ديل المولودين خارج رحم المريخ
عايزين يستغلو فرحه الفوز ويفردو عضلاتهم ومفتكرين النادي تابع لممتلكاتهم الشخصيه ونسو او تناسو المريخ مريخ الشعب ونادي الجماهير والجماهير ديل هم الشفوت
⭐⭐⭐
العمل العام دا عمل تطوعي وماحكر علي شخص معين العايز يكون مع الجماعه خير وبركه والعايز يعمل ليه شله وعامل هو المارد وهو صاحب المكان وهو الكل في الكل احسن يلملم كرعيهو ويتخارج لانو ممكن نعريهم كلهم امام الراي العام اياك اعني فافهمي ياجاره
⭐⭐⭐
اسمو نادي المريخ السوداني لو هم عندهم مسمى تاني غير المسمى الفوق دا يطلعو لينا الاسم دا عشان نعرف نحن شايتين وين والكلام ليك يالمطير عينيك
شفوت المدرجات صحصو وعارفين الصالح من الطالح وعارفين ناس المصالح واحد واحد واسم اسم ولو مفتكرين ارضيه المريخ مرتع خصب لاسلوبكم الرخيص للارتزاق وامتلا جيوبكم من وراء ضهر الغلابه تكون سرحتو بعيد ونغني ليكم اغنيه الهادي حامد ودالجبل
سرحتي سرحتي
لحدى الان بنتكلم بالعموم عشان مبيضين النيه لكن لو الوضع استمر كدى حنكتب بالخصوص والحشاش يملا شبكتو
⭐⭐ ⭐
احتفاليه صحيفه المريخ
بالصدور
نبارك لانفسنا بصدور الصحيفه الناطق الرسمي للكيان ولكن…….!!
معقوله بس كل شي خاص بالمريخ بعيد عن النادي
مكتب تنفيذي في الخرطوم ٢
اجتماعات مجلس الاداره مرات في فنادق ومرات في مكتب الخرطوم٢
وتجي صحيفه المريخ تتعمل في وسط الخرطوم واحتفالهم يتعمل هناك
⭐⭐⭐
عندنا نادي كم طابق مؤجرين في الخرطوم لشنو وهدر الموارد الماليهو داعي دا فسروه لينا عيبو لينا النادي ومباني النادي عندنا ثلاث طوابق في شارع العرضه اعرق شارع وكل طابق فيه اكثر من عشره مكاتب والمكاتب جاهزه للعمل والشباب ماقصرو زبطوها ليكم والدفعتوه مقدم ايجار لمقر الخرطوم كان زبط ليكم مكاتب في النادي وانتو اصلا الاثاث عندكم لمقر الصحيفه الحكايه منظره ولاشنو ومكاتب الصحيفه لو اتعملت في النادي كان تكون اساس للمكتب الاعلامي للنادي وفيها تقدم الخدمه لزوار النادي من فرق وافراد
وحتي الاحتفال بدل يتعمل في مقر الصحيفه مايتعمل في النادي وتتم دعوه المجتمع المريخي عاملنو سرا ونهاريا تكون دي عرسه تانيه ولاشنو
⭐⭐⭐
معقوله مافي زول فيكم قادر يستغل الظروف لخدمه الكيان احتفال ذي دااستفيدو منو اعلاميا وجماهيريا مش تعملوه بالصباح وبعيد عن اعين الجماهير
الصحيفه دي حتبيعوها للمدعويين بالنهار ديل ولا للجماهير المامعزومين
⭐⭐⭐
اسه لو عملتو الاحتفال في النادي ماكان خليتو الضيوف يشوفو انجازات القروبات والعمل الجميل الانجز علي يدينهم
مش كان الناس فرحت بالمجهود دا
والاحتفال كان ممكن يبقى نفره لمباراه السبت من خلال التجمع وتكون نفره دعم ليكم
والله في ناس كدى ماعايزين شي يتم في النادي وفي ناس عايزه تظهر في الصور بي بدل وعارفين نفسهم مغضوب عليهم من المدرج المريخي
⭐⭐⭐
ختاما
عاينو لمصلحه الكيان وابعدو ناس المصالح والشلليات والكيمان
وبدل تسنو سكاكينكم علي المساكين العايزين حقوقهم سلوها علي المرتزقين واصحاب المصالح الشخصيه والعاملين لنفسهم شو في الفارغه
بدل تبترو رجل لاعب خدم وبيخدم في المريخ
ابترو يد المصلحجي المدخل يدو في جيب المريخ
⭐⭐⭐
ونحن علي المدرج ونتفرج ومنتظرين يوم السبت بفارق الصبر ونغني في سرنا نجمه نجمه الليل نعدو مامنتظرين غير اننا نشجع ولو جات كميره تصوير بجنبنا بنطردها مش نمسك لياقه القميص وعايزين نتمنظر علي ضهر الغلابه والمساكين
⭐⭐⭐
جمهور وشفوت ماعايزين وصيه ليوم السبت
معليش طلعنا خارج النفره الجماهيريه عشان ناس المصالح يمغسو ومفتكرين النادي دا ورثه تابعه لممتلكاتهم الخاصه وهدر الموارد الماليه رغم الفقر شي يحير
لنا عوده غدا للنفره………
