تعويم المريخ

في السلك   

بابكر سلك

تعويم المريخ

*قبل ما نبلع تعويم الجنيه
*جانا تعويم المريخ
*زمان لو باقي دقيقة والمريخ مغلوب عشرة
*ما بهز ثقتنا شك في أن المريخ سيعود
*ولكن أمس أول مرة المريخ مغلوب أقول يا رب تنتهي كده
*كنا مغلوبين اتنين
*قلت إن شاء الله تنتهي كده
*أخدنا التالت
*قلت إن شاء الله الشمس تقطع وتنتهي على كده
*الرابع
*يدي في قلبي
*اللهم استرنا يا الله
*لما انتهت قربت أبوس الحكم
*معقولة المريخ عوموهو برضو؟؟؟
*الهزيمة أصلها ما مشكلة
*لكن الروح الإنهزامية والخرمجة والتواضع ما حبابهم
*وصدقوني هزيمة زي دي طبيعية جداً لفريق لا إعداد له ولا إستعداد
*لا إستقرار فني ولا براح زمني للجهاز الفني
*حتى المحترفين جايين متأخرين لأسباب غريبة
*أما المحليين
*حدث ولا حرج
*حراسة المرمى عندنا زي حراسة النظام العام زمان
*البصلها كلو بخش
*صناعة اللعب في المريخ زي صناعة القنبلة الذرية في السودان
*أما الأطراف
*فتشبه إلى حد كبير الأطراف الصناعية
*مجرد شكل بدون مهام
*أي شى في المريخ منتهي
*لن نتحدث عن المجلس
*لأنو الحديث عن المجلس
*بقودنا لسؤال
*ياتو مجلس
*المريخ فيهو عدة مجالس
*والعضوية على قفا من يشيل
*زي الشفع الشايلين كرتونة وكاتبين فيها سبعين
*وباليد التانية شايلين كم طماطمة كده
*عضوية المريخ بقت زي الطماطم
*بترخص في الشتاء
*أسد يقول بمية
*سودا يقول بخمسين
*وقد يخرج علينا الكندو بتلتين بس
*للأسف هذا هو الحال في المريخ
*والمؤسف أكتر من الهزيمة
*هو تعطيل العضوية عشان كورة أمس
*كان أخير نمشي عضويتنا نقضي زمنا فيها ونكسب وقتنا
*أيها الناس
*إنها نتيجة طبيعية بحسب الإعداد والاستعداد والتخطيط السليم للكورة في البلد دي
*زمان كان بخفف الأمر شويه الأرض والجمهور
*أسي سوداكال ودر الأرض (الاستاد) وكورونا ودرت الجمهور
*عشان كده لعبنا بدون أرض وبدون جمهور
*وانهزمنا بالأربعة على قدر الحضور
*بركة الما سمحوا لينا بالأربعة ألف
*أيها الناس
*ما يمر به المريخ ممكن ببساطة يودينا حيث أشار رضا عبد العال
*ووقتها لن ينفع لطم الخدود
*ولا شق الجيوب
*ولا الولولة ويمه ارحميني
*ولن ينفع اللوم
*ما كلمنتناش ليه يا عب العال!!!!!!
*لكن سؤال
*هل رضا عبد العال بعرف سوداكال؟؟؟
*الخلاصة
*عوموا المريخ في البرد ده
*وتعويم المريخ برجعنا لتعويم الجنيه
*يا ناس الحكومة
*لما تجي تعوّم سباح
*بتوفر ليهو سبل النجاة
*مش مجرد سنعبر وخلاص
*لما تجي تعوّم سباح
*بتديهو طوق نجاة
*وعوامة
*ومايوه
*وحكومتنا لما قررت تعويم جنيهنا
*لا وفرت ليهو طوق النجاة
*ولا أدتو مجرد مايوه يسبح بيهو
*جابوهو في القيفة
*وقالوا ليهو دق دايف
*وجنيهنا ملص
*وعصر هديماتو بحجر
*ومولاي كما خلقتني دق راس
*والغطسة الياها
*لا عرفناها مهارة غطس
*ولا عرفناها غرقة
*وبقينا راجين جنازة البحر
*لا سيطرة علي الكتلة النقدية
*لا غندلة عملة أجنبية
*ولا محاربة لإستيراد العواليق تخفيفاً على عبء الدولار والطلب عليه
*بس ملص وعوم وسنعبر
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*كلنا في القيفة راجين جنازة البحر تقلع لينا
*الصغار والكبار وأولاد ميكي والثوار
*ومليون كنداكة تزغرد لينا
*والخوف يا والينا
*تمساح يطلع لينا
*يطلع عينينا
*يختفنا ويغطس بينا

سلك كهربا

ننساك كيف والكلب قال كان حتل وووب وكان طفح بدون مايوه ووبين…دي مصيبة شنو دي
وإلى لقاء.