بالعربي الكسيح
محمد الطيب الأمين
(جمعة الهلالاب) .. تحت شعار (حقك تكوسو) !!
* بعد (سكات) استمر خمس سنوات، الآن جماهير الهلال تبدأ (الكلام) ..
* والكلام هذه المرة ليس (طق حنك) ولا (ونسة واتساب) ولا (نقد في صحيفة ورقية) ..
* الكلام هذه المرة (دخل الحوش) ..
* وأهلنا لما يقول ليك الكلام دخل الحوش معناها الموضوع كبير ..
* الكلام قبل ما يدخل الحوش بيكون عادي (كلام واتساب) ، لكن الكلام بعد يدخل الحوش ببقى كلام تاني ..
* والجماهير الآن كلامها دخل الحوش ..
* غداً الجمعة، هي الوقفة الاحتجاجية (الأولى) بمقر النادي بأم درمان ..
* أقول الوقفة (الأولى) لأن الأمور في نادي الهلال تحتاج لوقفة ثانية وثالثة وعاشرة ..
* تقف جماهير الهلال العظيمة غداً احتجاجاً على إغلاق النادي لفترة تجاوزت الخمس سنوات، دون أسباب واضحة ..
* ونحن نشيد بهذا الفهم الراقي لجماهير الهلال المعلمة وهي تبدأ الآن خطوات تصحيح كثير من (الحاجات الغلط) داخل هذا النادي الكبير ..
* تبدأ التصحيح من خلال وقفات احتجاجية سلمية دافعها الأول والأخير هو الحب ..
* وقبل أن استرسل في الحديث عن (جمعة الهلال) لابد من تعريج خفيف ..
* لا ينكر أحد أن واحدة من أهم أسباب نجاح الثورة السودانية هي تلك الاستفزازت التي بدرت من أهل النظام ..
* وهي استفزازات البعض منها مقصود والبعض الآخر غير مقصود وفي كلا الحالتين تعتبر استفزازت غبية للحد البعيد ..
*وأبرز هذه الاستفزازات ما قاله الرئيس المخلوع : (ناس الواتساب والفيس بوك ما بسقطوا الحكومة) ..
* ثم قال نافع علي نافع : (قالوا طالعين ضد الحكومة ومرقنا الشارع شفنا تلاتة أطفال حرقوا لستكين) ..
* وقال الفاتح عز الدين : (أدونا أسبوع وخلي تاني راجل يمرق الشارع عشان نقطع رأسه) ..
* وقال علي عثمان : (هنالك كتائب ظل يعرفونها جيداً ستحمي هذا النظام بالروح والعون) ..
* وقال أحدهم : (قرنق والحركات المسلحة ما سقطوا الحكومة ولذلك لن يسقطها المساطيل المفلفلين شعرهم واللابسين برمودات) ..
* بعد كل هذه الفصاحة والاستعراض سقطت الحكومة بعد أربعة أشهر ..
* سقطت بعد (120) يوماً فقط ..
* سقطت رغم أنها استعانت بالدوشكا والأربجي والكلاش والطبنجة والسوط والعصا والبمبان والاعتقال والتعذيب والموت ..
* هي الإرادة ..
* هي الشخصية السودانية وكفى ..
* ولذلك مهم جداً أن يعرف جمهور الهلال حجم المتاريس التي تنتظره في سبيل التغيير الذي ينشده بنادي الهلال ..
* أتوقعوا أن يسخروا منكم ويقللوا من حجمكم زي ما كان بيعمل نافع علي نافع ..
* أتوقعوا أن تكون في ثورة مضادة من بعض المنتفعين والمطبلين ..
* ولكن في النهاية البيواصل مشي بيصل ..
* بكرة الجمعة لو حضروا (20) نفراً وعملوا وقفة احتجاجية مؤكد الجمعة الجاية العدد ح يكون أكبر ..
* الثورة السودانية بدت بمشاركة ضعيفة ومواكب عادية ولكن مع مرور الأيام خرج كل الشعب للشوارع واتحدى الموت عند المحن ..
* ما في خوف ..
* لا في زول خايف من موت ولا اعتقال ولا رصاص ..
* الناس دي بعد الثورة بقت ما في حاجة فارقة معاها ..
* وجماهير الهلال المليونية كانت (رأس الحربة) في عملية إسقاط النظام السابق ..
* والكل يذكر ذلك الموكب العنيف الذي خرج من إستاد الهلال عقب إحدى المباريات ووصل حتى السلاح الطبي قبل أن تتم مواجهته بالقوة ..
* فعلت جماهير الهلال ذلك تجاه الوطن الكبير والآن تقوم بواجبها تجاه الوطن الصغير ..
* نقف غداً عشان نقول إغلاق النادي لخمس سنوات غلط ..
* نقف ونطالب بفتح أبواب النادي عشان الهلال ما حق زول ..
* نقف عشان الكل يعرف إن الهلال (ما هامل ساكت) ..
* نقف وقفة حضارية وسلمية دون أن نقفل شارع ودون أن نعترض أحد ..
* نرفع لافتاتنا ونوصل صوتنا القوي بكل احترام وأدب وذوق ..
* لا بنحتك مع زول ولا زول يحتك بينا ..
* نقيف وقفتنا ونمشي ..
* وبعد نمشي بنصبر أسبوع عشان نشوف نتائج وقفتنا ..
* الوقفة الأولى ما جابت نتيجة سنقف مرة أخرى ومن بعد ذلك ستتعدد الوقفات والتكتيكات ..
* وكلو سيكون في منتهى السلمية والذوق ..
* تاني استهبال وكضب ما في ..
* والله لو شفنا لون النجيلة ما عجبنا ح نعمل وقفة احتجاجية ..
* لو تم التعاقد مع محترف متواضع ح نعمل وقفة ..
* طالما خمس سنين، الكاردينال ما عايز يتعلم ولا عايز يحفظ هيبة الهلال يبقى الجمهور قاعد ..
* بالسلمية سنحفظ قدر الهلال ..
* بالسلمية سنعالج كل غلط ..
* أيضاً من خلال وقفة الغد نلفت نظر المجلس السيادي وحمدوك وكل الجهات المسؤولة نلفت نظرهم بأن ما تقوم به جماهير الهلال الآن هو عمل راقي وسلوك حضاري يصب في مصلحة الوطن ..
* ونقول لهم الهلال في الفترة الأخيرة لا بيشرِّف أهلو ولا بيشرِّف الوطن ..
* نتعهد للأجهزة الأمنية والشرطية والدعم السريع بأن (وقفاتنا الاحتجاجية) ستكون سلمية مية في المية ..
* وأي زول مننا يحاول الخروج من هذه السلمية سيقوم الجمهور بتسليمه لكم ..
* نبقى كتار ونحافظ على تماسكنا ونبعد المندسين عشان نفتح نادينا ..
* نقيف وقفة سلمية راقية دون أن نعيق حركة المرور ودون أن نسيئ لأحد ..
* حتى رئيس الهلال الكاردينال هو محل احترام وتقدير ..
* الكاردينال هلالابي دفع والجوهرة خير شاهد ..
* يشكر على الجوهرة وعلى حبه الكبير ..
* وما في زول عندو مشكلة شخصية مع الكاردينال ..
* اجتمعنا في الهلال وخلافنا خلاف في الهلال ..
* الغلط غلط والصاح صاح ..
* والهلال خط أحمر ..
* والجمهور هو (العين الساهرة) وكل طلباته أوامر ..
* تفتح النادي وتعمل فريق كورة زي الناس والله لو قعدت مية سنة ما عندنا بيك شغلة ..
* لكن الدغمسة والاستهبال ما بنقبلو في الهلال ..
* ونركب صافنات ونجيبه (سودانية) وأصلو الزول بموت والذكرى تفضل حية ..
* و..و..
* وشفنا هلال بنريدو غير (علة) أهلاً بيهو الهلال هلا .
