جيسي ومجنون مدني!!
قزاز ورذاذ
محمد الطيب الأمين
جيسي ومجنون مدني!!
* الناس في الخرطوم يتحدثون هذه الأيام عن (٧) حاجات ، (5) هي :
السخانة
الموية
والكهرباء.
* والناس في الهلال يتحدثون عن (٥) حاجات ، (٣) هي :
جيسي
وفيني.
* الثنائي الأجنبي (قعد) في الشقة بعد الشطب من الهلال اكثر من (القعاد) في كشف الهلال.
* ما حدث في موضوع جيسي وفيني (عيب كبير والله).
* لا يعقل أن تنهي عقد لاعب أجنبي وتسجنه داخل شقة لفترة شهرين.
* الكلام ده شين في حق الهلال.
* بهذا التصرف الغريب (أحرج) الهلال النجم الخلوق سادومبا الذي لم يقصر معنا وكان له دور كبير في إتمام صفقة جيسي.
* مثل هذه التصرفات تخصم من الهلال كثيراً.
* ومؤكد إنها خصمت من لجنة التطبيع التي تحركت أخيراً وأجرت المخالصة نهار أمس.
* تحركت اللجنة بعد تصريحات جيسي للصحف الإلكترونية.
* بعد تناول القضية حتى تحرك رئيس الهلال.
* ولعل هذه يشبه لحد كبير تفاعل الشعب السوداني مع (مجنون مدني) بعد أن تداول رواد مواقع التواصل صور له.
* يبدو أن القضايا في هذه البلاد لا يتم حلها إلا بعد أن تصبح (قضية رأي عام).
* عموماً نأمل أن ينتبه السوباط لمثل هذه الأمور حتى لا يخسر شعبيته الجماهيرية.
* في المريخ يتحدث الناس عن أربعة حاجات ، تلاتة هي :
النجيلة
والنجيلة.
* المريخاب ما صدقوا إنو نجيلتهم قامت.
* بقوا يمشوا يتصوروا سيلفي مع النجيلة.
* ٢٤ شهر والمريخ مشرد ما بين إستاد الهلال والخرطوم ودار الرياضة.
* طبعاً نجيلة إستاد المريخ عمرها في الغالب شهر.
* بعد شهر بيكون الملعب غير صالح (للمشي).
* سيقوم مجلس الإدارة بقفله لمدة سنتين.
*بعد داك تقوم النجيلة وتاني تحرق بعد شهر.
* هكذا هم.
* لا أعرف لماذا لا يلجأ المريخ للنجيل الصناعي؟
* ليه ما دايرين تقتنعوا إنو الله ما قسم ليكم النجيلة.
* الشغلانية دي قسمة ونصيب.
* والنجيلة ما مقسومة ليكم.
* شوفوا النجيل الصناعي.
* معقولة حكومة الإنقاذ تعمل ليكم إستاد وانتو يغلبكم تعملوا نجيلة؟
* إستاد الهلال من الصعب تاني يتحمل الضغط.
* عندك إستاد حاول شوف ليهو حل لانو نحن ما ناقصين.
* المهم.
* تعتبر مباراة الهلال اليوم أمام أهلي مروي من المباريات الصعبة فعلا.
* لن يكون الطريق ممهدا أمام الهلال وهذا ما يلزم بذل الجهد والتركيز.
* اهلي مروي مهتم جدا بعرقلة الهلال.
* سيلعب الأهلي بقوة مضاعفة حتى يحقق مطلبه.
* يجب أن يكون الهلال حاسماً في لقاء اليوم.
* نرفع شعار الفوز في جميع المباريات القادمة .
* ما في نادي في البلد دي جاهز أكتر من الهلال.
* لا شئ ينقص الهلال.
* ولذلك نلعب للفوز والعرض.
* الاتنين سوا.
* المانع شنو؟
* نثق في أنفسنا وكل لاعب يقدم أفضل ما عنده.
* البداية كانت أمام حي العرب ويجب أن تتواصل اليوم وصولاً إلى اللقب بإذن الله.
* ونركب صافنات ونجيبة (كباشية) واصلو الزول بيموت والذكرى تفضل حية.
* و.. و..
* إذا كان دي شمس الدنيا فكيف هي نار جهنم .. اللهم باعد بيننا وبينها.
ثمانية ملاحظات على كلامك أقصد (مقالك) وهي غي الحقيقة خمسة :-
اولا بركة الظهرت ياااااخ … وحمدا لله على السلامة بس باقي لسه اثار تيري ظاهرة
ثانيا كلامك صاح فضحتونا مع الأجانب ناس جيسي (الفلته ههه) اللي المفروض حسب كلامك أحسن محترف مر على البلد دي هههه..انسترو
ثالثا استاد المريخ ده مش ياهو الكان مفخرة البلد وياما لعبتو فيه وبالليل كمان تحت الاضواء الكاشفة مش في العصر ولا في الظلام
رابعا بطلو بيع الوهم وما أضر بالهلال اكتر منكم وكشفه ملئي بأنصاف المواهب وأشباه اللاعبين والمواسير 20 بوصة ( عدا أولادنا أبوعشرين والغربال يخربكم ) ولا أدل على ذلك مثل لهثكم خلف نجوم المريخ قلت لي شنو ( ما في فريق جاهز اكثر من الهلال ولاعبي الهلال)
خامسا مافي خامسا ذاتو رايك شنو هههههاي