حرية آه…تغيير لأ

في السلك

بابكر سلك
حرية آه…تغيير لأ

*بعد طيران الهلال الاخير
*ذلك الطيران المميز
*مميز لانه تم بطائرة عسكرية
*مباراة كانت من شقين
*شق مدني وشق عسكري
*بس كانت رئاسة المدنية اول
*ثم سرعان ماوضع العسكر يدهم علي الملعب
*علي الطلاق تخريج الشرطة ماكان فيهو عساكر بالعدد ده
*لكن للضرورة احكام
*ونرفع القبعات للشرطة التي اتت بهذا الكم الهائل
*في قراءة بديعة لها للاحداث
*وللحفاظ علي السياج
*باقي ناس روشا ديل عادي بشيلوا السياج ويجروا بيهو
*لكن
*المجموعة بتاعت الزناطير في حقيقتها ومن خلال مستوياتها كلها بلاتينيوم
*فلا المصري ماشي قدام ولا التونسي ماشي قدام
*والله يجازيك ياسادومبا
*المهم
*بعد الطيران الاخير والمثير خرجت علينا الصدي بالبعير وخرج علينا روشا بعدم تعلم الحمير
*قلت لي ياروشا برغم كترت التكرار ما اتعلم الهلال؟؟؟
*دي جديدة علينا ياروشا
*نحن كنا قايلين كترت التكرار بتعلم الهلال
*لكن نقول شنو عاد
*هلالكم وبتعرفوهوا اكتر مننا كان بتعلم بكترت التكرار ولا مابتعلم
*لكن ياروشا واصلوا محاولاتكم لنيل ود الاميرة السمراء
*وعيش ياهلال لمن تقوم اقصد تنال الاميرة
*ايها الناس
* الزعيم سيد البلد وكبيرها وعمدة انديتها والمميز والمتميز والوحيد المتفرد الذي سجل اسمه علي لوح الشرف الافريقي من دون عموم اندية السودان
*وهذه الحقيقة لاينكرها راعي الضان في الخلا ولا ابلد حمار من الحمير العادية والوحشية
*اليوم نبدأ خطوات البطولة من كادوقلي الجميلة
*نتمناها بقدر جودة التسجيلات وبقدر تمام الاعداد
*نتمناها مريخية حمراء تفتح النفس
*ايها الناس
*ناس مجلس المريخ
*عيب والله ان ينسحب فريق السلة مرتين بسبب المال
*التالتة بتودي التوج وتشطب من سجلات اتحاد السلة
*ومنصرفات زي دي مادايرة سوداكال
*همتكم معانا شوية
*المهم
*كان شعارنا ولازال حرية سلام وعدالة
*واوكلنا امرنا من بعد الله للحرية والتغيير
*وجدنا الحرية ولم نلمس تغيير
*فكانت الحرية لدرجة الفوضي
*كلو زول حر في السعر الببيع بيهو
*في تعريفة المواصلات البرحل بيها
*حر حتي في مضايقتو للآخرين
*حر في سواقتو
*يدخل ليك ركشتو جوه سروالك
*ويوقف ليك عربيتو في نص راسك
*بكل حرية
*وبكل حرية
*كلو زول يقول الدايرو
*كلو زول يعمل الدايرو
*المهم اننا وجدنا الحرية
*اما التغيير فلم نجده
*ياها في المحليات نفس الحركات و الاشكال والافعال وعدم الانفعال
*ياها الشوارع وسخانة
*ياها القيادات ايها تسيطر علي الموقف
*ياهو الشو
*وياهو الهلال في صفرو
*ياها الاسعار الفاحشة
*وياها صفوف العيش والجاز والبنزين
*وياها معاناة المواطن
*مافي جديد
*مافي تغيير
*ايها الناس
*ياناس الحرية والتغيير
*قلتوا لينا حرية وتغيير
*الحرية لقيناها الا التغيير لأ
*وحتي الحرية اللقيناها ماياها الحرية الاتمنيناها
*لانو الحرية الاتمنيناها لاتعني الفوضي
*والتغيير لأ
*مالقيناهوا
*فيا حرية وتغيير زي ماقلتوا لينا
*ياحرية وتغيير زي ماقلتوا لينا
*خلاف كدة
*الله لاجاب خلاف كدة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*ياها
*حرية تغيير انتوا تقولوا لينا
*تغيير ما تدينا
*اوشيك او كاش اودين مايكفينا
سلك كهربا
ننساك كيف والكلب قال حرية آه…تغيير لأ
والي لقاء
سلك