حقنا في الهلال
نبض الصفوة
امير عوض
حقنا في الهلال
تداعيات ذهاب كردنة من الهلال كانت الأقوي..
امكن لانه المرة دي شداد حشر نفسه فيها..
زمان لما كان رئيس يستقيل أو يغادر.. الحكومة بتكون مجلسها خلال ساعات..
هسه شداد دخل الاتحاد تحت دعاوي انو القمة أعضاء من مكونات الاتحاد..
الحكومة الآن بتتفرج في شداد..
و شداد ما اختار الا واحد مريخابي..
السوباط مريخابي.. دي ما بتغالطوا فيها اثنان..
ولدنا..
و مننا و فينا..
قصة انه يحكم الهلال مريخابي دي ما غريبة..
الهلال ذاتو طلع من ضلع المريخ..
شوية مريخاب زعلانين عملوا الهلال..
يعني الهلال ذاتو ولدنا..
فما غريبة ولدنا.. يحكم ولدنا..
ما هو قبل كم شهر كان بتنا حاكمة ولدنا..
ماف زول يعمل فيها ما عارف منو بتنا..
بتنا الصرحت في السوبر بأنها لا تحب المطبخ و تعشق المريخ..
ستة سنة حكمت الهلال..
و هسه ولدنا حيحكم الباقي..
المهم في القصة..
ما عارف الذكرني الفيلم العربي (عايز حقي) شنو؟!!
في رابط بين الفيلم العربي و بين البحصل في الهلال..
فجأة كده اتذكرنا انه ابو الهل ده عبارة عن مكون مريخابي صرف..
حاجة كده عملوها اولادنا المريخاب الزعلانين..
صحيح انه ما رضيناهم وقتها..
لكن ده ما بنف انو الهلال ده كله علي بعضه بتاعنا..
نحن المريخاب اسياد البلد..
اسياد الهلال ده اول حاجة..
خليكم من قصة انه عصمت مالك الشعار..
نحن الهلال ده كله حقنا..
بكردنة.. و بالجوهرة و بالبرير و الكوارتي..
كلهم كده ملك مورث لينا من جدود الجدود..
يعني اي مريخابي تاني يعرف انه الجوهرة دي حقتو..
و الفندق..
و حتي قصر الكاردينال الاتبني بسيخنا.. برضو حقنا..
ياخ.. غرفة المخدرات ذاتها حقتنا..
الفي شنو و المافي شنو..
هلالنا.. نحن اسياد البلد..
طيب.. انا شايف انو نتصرف في املاكنا دي..
الهلال ده 90 سنة ما جاب بطولة خارجية..
يعني مشروع فاشل..
بدل نتعب ولدنا السوباط في الفشل ده..
انا شايف نحن نوزع الورث علينا..
علينا كمريخاب اسياد الهلال..
في ناس عندهم افكار استثمارية انه نبيعه للصينين..
و في ناس عايزة نبيع الاصول و نوزع الميراث..
المهم.. نتصرف في ملكنا..
عن نفسي عايز نصيبي يكون المولد الكهربائي..
البلد سخانة و الكهرباء كرهتنا..
ادوني مولدي استفيد منه بدل قاعد ساكت..
العايز الكشافات منو؟
المساطب دي نبيعها كيف يا رب؟
نقطعها و نبيعها بالكيلو..
مساطب قدر ظروفك..
90 سنة مهملين ميراثنا..
الليلة الا نبيعوا..
نشوف كوارتي ده عايز يسجل التش وين؟
نلم اللعيبة كلهم في فريق واحد..
نشارك في الابطال و الكونفيدرالية سوا..
المريخ (أ) و المريخ (ب)..
عصمت يشيل شعاره..
حيشيل اسم ما عنده وجود..
زمان قلنا ليه بيعه رفض..
اها خم و صرّ..
حيكون اول شعار لحاجة مافي..
الناس تصبح الصباح ما تلقي هلال..
تمشي سوق العيش تلقي اسياد البلد قاعدين في حقهم..
اصحاب ملك و كده..
الشايل ليه بلاطة..
و القالع ليه كشافة..
و الخامش ليه كرسي..
ارض الاستاد دي نحن ما حنبيعها..
عايزين نخليها فاضية كده بس..
نعملها حوش..
كل يوم نشيل الخرطوش نرشها و نتونس قدامها..
حوش المريخ..
حوش سيد البلد..
اسم سيد البلد ده دكتور امير سيد ختاهو في الحفظ و الصون..
في صحيفة.. امير جهجه باكاتها..
اول يوم صدرت بإسم سيد البلد..
امير رفع الكرت الاحمر..
الجماعة استخدموا الساتر..
غيرو الترويسة بهدوء..
تاني بتجو..
نحن بعد العمله امير ده عايزين نقلع هلالنا..
كله علي بعضه..
أو اقول ليكم..
نخليه يديروا سوباطنا..
و التعليمات تطلع ليه من عندنا..
المنسقة معاش قالت السوباط متحكم فيه مزمل..
اها.. و تيب..
مزمل مريخابي و انت مريخابية..
يعني ما جديد علينا نتحكم في الهلال..
نحن الجبنا الهلال و نحن المتحكمين فيه..
الزعل في شنو؟
*نبضة أخيرة*
ولدنا في ملكنا.. المحروق يروق.
احلم الحلم بقروش احلم انك هلالابي انتم الواحد بنوم وبصحي انه اكون هلالابي جاتكم فرصة بالعلن وفكرتوا بحق انكم هلالاب يا اختشوا مريخكم ما عاجبكم
هههههه هااااااا. شر البلية مايضحك. لو حقكم ليه قاعدين بدون رئيس منذ ذهاب الوالي الرئيس طوالي. حكاية المريخ يحكموه هلالاب دي عادية واعظم رئيس ليكم ابو العائلة ولدنا. اما فرية الهلال يحكمه مربخابي دي مستحيلة يامندلة.
هههه صحفيين سايقهم مزمل ذي القطيع معلومه مغلوطه كتبها ابو القنابل بانو السوباط مريخابي عشان يقطع الطريق للهلال استلمها كورال الاعلام الدلقوني ياخي ابتكرو يااعلام القطيع عايزين تردو رئاسه الهلالاب لدلقون العرضه بقياده الهلالاب ابو العائله والوالي الغالي لكن هيهات يا اعلام الدلقون
السوباط اعطي الدلاقين درسًا لن ينسوه قريبا قال ليهم لو انا مريخابي ذي ما بتقولو عميان من المريخ ده المريخ قاعد في السهله وعدمان الكوادر وليهو ٨ سنين بفتش في رئيس غايتو بالجد الدلاقين غلابه هههههه
يا أمير الحسن وريهم الحقيقة الضايعة بين سوق العيش وتيم عباس وان أكاذيب مؤتمر الخارجين عفوا الخريجين أسطورة تدحضها نشأة ابوالهل في عام ١٩٣٠ والمؤتمر سابق الأوان وسالف الازمان وقتها كان ابوالهل تيم المريخ ب وانسوا كتابات ناس السيدة وناس احييا متين اشوف الخرطوم لانهم كانوا مع التميع والنتيف… طبعا ابوالهل كتاب المشجعين لا يرتقون الى مصاف الصفوة مريخ وتاريخ كن ١٩٠٨م هاؤم اقرأوا كتابيا… اما حكاية الكورال والمرشد طبعا دا عدم احترام الآخر وفاقد الشي لا يعطيعه… اصلا ما في مقارنة إطلاقا بين اهل المعبرة ومريح المفخرة موتوا بغيظكم… نحن اسياد الكورة في السودان والبقية عربات تتبع القاطرة ودونكم الصفر المعمر دوليا.. قريب بنطبق ليكم الجنة والعريس يسير ….
نوع السجاره الشاربه دي من وين؟
دي مبالغ فيها يا امير ياعوض منك لله
انت لما تشرب الهباب دا اخد ليك نومه اول بعد تعال اكتب يا خي كنا مرتاحين منك قلنا اخدتك كرونا ولا شالك سيل ولا رحت في حرب قبليه
تباً لكم انت وامثالك
عليك ياامير عوض
ويجيك واحد ناطى ويدافع عن الصحافة الرياضية…
أعوذ بالله..
اللهم لا تمحنا ولا تبلينا !! أبو الهول المندلاوي رجع تاني لمرضه وحركاته ، كل مازاد عمره زادتهرطقته !! يكتب العمود ويجي يسخنه براهو……..حالة صعبة ومتأخرة جدا !!
مقدار الكراهية البتكرهها للهلال سيد البلد دي لو إستفدت منها كان مفروض تكون بروفيسور في الذرة، بس نقول شنو عاد، قرعوبة كبيرة وفاضية ساي هههههههه
الهلال يا كايدهم وحارق حشاهم
مشتاقين ياابو صلاح. وين الغيبة الطويلة. ابو المستعار المندلاوي لا يزال في غيه يسرح ويمرح🤣🤣🤣
حبيبنا هجام، ليك وحشة وشوقنا بالأكتر والله
جنس الثعابين دي يعملوا ليها شنو، بلغت من الكبر عتيا ولسه في غيها هههههههه
بس الراجل معذور، طيران الكيزان من تمهيدي الثورة جننهم هو ومرشدهم جن شديد، الحفرة بقي لا فيها كركدي لا حتة يتبطحوا فيها هههههههه
👍👍👍صدقت ياابو صلاح. الناس ديل الكبر بزيدهم احقاد وجنون.