دايرين عمودية ونظارة

في السلك

بابكر سلك

دايرين عمودية ونظارة

*في البلد دي أي شي بنعملوا سااااي
*بدون دراسة
*بدون تخطيط
*وبدون استراتيجية
*بس خلق الله خلقهم وحايمين
*نعمل الزلط السبت
*الأحد نحفرو عشان نمد توصيلات الكهربا
*بنشتغل سااااي
*نبل الآبري
*نبل الكركدي
*نبل التبلدي
*نبل الهلال
*بل ساااااي
*نسافر بره البلد
*مسافرين لي شنو ما عارفين
*نسافر ساااااي
*شافعنا يمرق الشارع
*مرقت لي شنو؟
*يقول ليك مرقت ساااي
*الشافع خليهو
*الزول الكبير
*بمرق سااااي
*مارق لي شنو هو ذاتو ما عارف
*مارق ساااااي
*شغلنا كلو ساااي
*كورتنا ذاتها ساي
*الهلال جايب خمسطاشر محترف أجنبي
*والمريخ جايب تمنيه
*غير اللافين في الممتاز والجايين ساي
*المحترفين الأجانب ديل تجنوا على خانات الوطنيين
*وكتروا
*يعني لو عملوا ليهم حلة وسموها شلعوها المحترفيناب
*ما تستبعد لو طالبوا بعمودية ونظارة ورقم وطني
*ويطالبوا بتضمينهم بالوثيقة الدستورية
*وإشراكهم في صناعة الدستور
*وتخصيص أربعين مقعد في البرلمان وتلاتة مقاعد في السيادي
*وممكن يعملوا الحرية والتغيير خمسة
*والتسعات الطويلات يزيدن
*لأنو المحترفين الأجانب ديل بجيبوهم سماسرة
*وطبعا تسعة أطول من السماسرة مافي
*لكن
*الناس ديل لو طالبوا بنظارة من حقهم
*ولو طالبوا بعمودية
*برضو من حقهم
*نعمّدهم إلى أن نجد لهم أطيان
*فكم عمدة تم تعميده وهو خالي أطيان في هذا البلد؟!!
*وكم عمدة أدوهو أطيان الناس؟!!
*وكم أجنبي دخل البلد دي ساااااااي
*وبقى وزير كمان
*بس ما ساي
*فوق راي
*وده الراي النكّس راية الوطن العزيز الذي كان في الفؤاد ترعاه العناية
*بس ما سلم وطني العزيز
*المهم
*تم إعلان القرعة
*وفرح الأهلة ب”كي إم كي إم” الزنزباري
*ولكنهم ما دروا فرحة كي ام كي بملاقاة الهلال
*وفرح أهل المريخ بجيبوتي
*استخفافا بها
*ونسوا أن الفريق الموريتاني كورتو الدقت في حديدتنا لو ما الحديدة كان اتشربت مديدتنا
*نحن ندير الكرة بتخلف
*ونستعد بتخلف
*وفكرتنا عن الآخرين مستمدة من ماضيهم
*ولا نهتم بمعرفة كيف أصبح حاضرهم
*اللهم أيّد الإسلام وانصر المسلمين في مشارق الأرض ومغاربها
*هم المسلمين ديل مشاكلهم من مشارق الأرض لي مغاربها؟؟؟
*ده كلام شنو ده؟؟
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*ناس شلعوها المحترفيناب قالوا دايرين عمودية بي طينا
*شفت الفوضى شن جابت لينا يا والينا؟؟؟

سلك كهربا

ننساك كيف والكلب قال تلقطوا بس تلقطوا لما يوم تلقطوا لينا قليلة
وإلى لقاء