دوري وكأس .. وردي وعثمان حسين!!
صابنها
محمد عبد الماجد
دوري وكأس .. وردي وعثمان حسين!!
• السنة دي الهلال عملها – جمع بين الدوري والكأس… عملها الزعيم (وردي وعثمان حسين).
• احلى حاجة في كرة القدم – الجمع بين الدوري والكأس – عندما يحدث ذلك بتخلي خشم الاندية المنافسة ملح – ملح.
• ما عاوز اتكلم عن المريخ.
• لأن وصيف الهلال في الكأس هو الاهلي الخرطوم.
• والوصيف في الدوري على ما يبدو انه سوف يكون فريق حي العرب – المتصدر حتى مواجهة الهلال في الاسبوع القادم.
• اشرح ليكم الموضوع.
• عشان بعدين ما تقولوا لي علاقة دا بي دا شنو؟
• الهلال سنة 2022م وهي سنة (بيضاء) معنا كان هو الفريق (ابوكأسين).
• دوري وكأس.
• وردي وعثمان حسين.
• وقعت ليكم وإلّا لسه؟
• الهلال (ابوكأسين) – والمريخ (ابوجيبين).
• احرجتونا مع الجماعة.
• إلّا يقولها ليكم عديل كدا.
• شغل الضرا ما بنفع معاكم.
• الجماعة ديل بتحسسوا.
• بقوا يتعقدوا.
• ناس المريخ (الكأس) ما بشيلوه إلّا يمشوا ليه (كأس).
• والهلال ما شاءالله.
• من الجوهرة.
• من بربر.
• من عطبرة.
• الفاشر.
• في اي حتة بشيل (الكأس).
• دوري وكأس.
• وردي وعثمان حسين.
• نحن عشان نثبت ليهم انو اي حاجة عندنا بي نظام.
• اول ربع ساعة من عمر المباراة .. الهلال ما سجل.
• نصف الساعة الاولى من عمر المباراة الهلال ما سجل.
• الشوط الاول انتهى من غير اهداف.
• ناس المريخ شغلوا (الخدمة).
• ودخلوا الفيس.
• والكلام بدأ.
• اول ربع ساعة من الشوط التاني الهلال ما سجل.
• ناس الاهلي عشموا في (الكأس).
• صدقوا روحهم.
• الدقيقة (70) من عمر المباراة والنتيجة 0 / 0 وحكم المباراة تقول تجميع (الرد كاسل).
• الدقيقة (80) وناس الاهلي الخرطوم شغالين (تقفيل).
• انتوا يا ناس الاهلي لو بتقفلوا كدا في اي مباراة كان شلتوا (الكونفدرالية).
• الدقيقة (90) والهلال ما سجل.
• المريخاب دخلوا (الواتس).
• والرسائل دورت.
• المريخ بقى عشمان في (الكأس) للاهلي اكتر من عشم الاهلي في الكأس.
• ديل يقولوا فيهم شنو؟
• الموضوع دا عاوز ليه (عدس).
• عليكم الله علاقة العدس بالموضوع دا شنو؟
• ما تلخبط لينا الكلام وما تدخل لينا (العدس) في الموضوع.
• نحن العدس في الغدا .. ما بنرتاح ليه .. عاوز تدخلوا لينا في الكأس.
• الزمن البدل الضائع الحكم حسبه (5) دقائق …والحكم فرحان اكتر من صلاح نور الدين.
• تقول الحكم ح يأخذ حافز الكأس هو وليس صلاح نور الدين مدرب فريق الاهلي الخرطوم.
• المباراة انتهت.
• المريخاب دوروا في (القروبات).
• انتوا ما عارفين نحن الموضوع دا قاصدنه.
• نحن وصلنا للضربات الترجيحية قصد.
• عشان تفهموا حاجة.
• عشان نوريكم شيء.
• نحن اي حاجة عندنا بي نظام.
• عاوزين نوريكم الاهلي الخرطوم الذي فاز على المريخ في نفس البطولة بالضربات الترجيحية .. نحن بنفوز عليه بنفس الوسيلة.
• بالضربات الترجيحية.
• بعدين كونه نخليكم تجددوا الخدمة وتخشوا النت دي ذاتها بالدنيا.
• ناس الاهلي الخرطوم قفلوها اكتر من العساكر.
• تقول قالوا ليهم في (مليونية).
• الغريبة ام درمان كلها (بمبان).
• المباراة من الناحية (التكتيكية) كانت عالية الجودة – الاهلي قفل صاح وقدم خدمة كبيرة للهلال.
• في بعض المباريات عندما يغيب (التوفيق) يبقى التسجيل مستحيل.
• قدر ما تعمل .. قدر ما تحاول وتجتهد ما تسجل.
• في كرة القدم تحدث مثل هذه الامور.
• بعدين مباريات الكأس في العالم كله ما فيها ضمان.
• بطولة الكأس بطولة (مفاجأت).
• هي بطولة تلعب على (المفاجأت).
• لذلك كان يمكن ان يخسر الهلال (الكأس).
• الكورة ما فيها كبير.
• وكان نحن ما ح نعرف نودي وشنا وين؟
• الله شافنا.
• لينا (6) شهور بنتكلم عن النهائي وبنطالب ببرمجة المباراة.
• اتخيلوا بعد التعب دا يأتي الاهلي الخرطوم ويحقق البطولة.
• الهلال غاب عنه التوفيق في المباراة – لكن التوفيق في الضربات الترجيحية كان حليفه.
• اضاع السمؤال ميرغني اول ضربة ترجيحية للاهلي بعد ان اصتطدمت كرته بالقائم.
• الغريبة السمؤال اضاع اول ضربة ترجيحية امام المريخ ايضا ولم يسجل.
• مهند الطاهر سجل بطريقته الخاصة في الحتة الصعبة.
• اضاع الاهلي الخرطوم اول ضربة ترجيحية .. واضاع اخر ضربة ترجيحية.
• شفتوا النظام دا كيف؟
• وردي وعثمان حسين.
• المفاجأة ان اقمار الهلال سجلوا ضرباتهم الترجيحية بمعلمة.
• سجل اولا والي الدين خضر بهدوء وبرود.
• وسجل بعده ايمورو.. ضربة يفترض ان تلحقه بمنتخب غانا في قطر.
• ثم سجل عبدالرؤوف ..المعلم الكبير.
• واختتم اطهر الطاهر .. ولم تكن هنالك حاجة لليليبو لتسجيل الضربة الخامسة.
• لأن الموضوع اتحسم.
• الموضوع انتهى.
• نعمل ليكم اكتر من كدا شنو؟
• انتوا يا ناس الاهلي الخرطوم تقفلوا فيها كدا وتضيعوا في الزمن وتقعوا وما تقوموا .. فاكرين المباراة لو وصلت للضربات الترجيحية يمكن ان تفوزوا بالكأس.
• وصلنا بيكم للمنطقة التى خططوا ان تصلوا اليها.
• وفزنا بعد ذلك.
• طبعا التعامل مع الاهلي الخرطوم في نهائي كأس السودان .. كان امر صعب .. لأن الاهلي الخرطوم يمتلك عناصر جاءت للفريق من الهلال والمريخ .. وبعضهم جاء من الاهلي شندي والخرطوم الوطني وهلال الابيض.
• الاهلي الخرطوم كان عبارة عن تجميع للاعبي اندية الممتاز.
• عناصر تمتلك الخبرة وتعرف تتعامل مع النهائيات بصورة ممتازة.
• قاد الاهلي الخرطوم في حراسة المرمى الحارس احمد عبدالعظيم الذي اكتسب خبرات كبيرة مع هلال الابيض ولعب في فريق المريخ.
• الاهلي لعب له عمار سفاري وسمؤال ميرغني ونزار حامد ومهند الطاهر الذين سبق لهم ان لعبوا في الهلال.
• من المريخ شارك مع الاهلي الخرطوم خالد النعسان اضافة لأحمد عبدالعظيم.
• كما لعب امام الهلال امس نجوم وضعت بصماتها في الدوري الممتاز امثال ايمن عبدالرحمن ومصعب جلنجات ومعاذ القوز.
• حقيقة كل العناصر التى مثلت الاهلي امس امام الهلال عناصر تمتلك خبرات كبيرة في الدوري الممتاز وتعرف كيف تلعب في النهائي وكيف تخرج بالنتيجة التى خططوا لها.
• فريق الاهلي يمكن ان تواجهه في الدوري الممتاز وتفوز عليه بسهولة .. ولكن مباراة النهائي تبقى مباراة لها دوافع كبيرة وحسابات خاصة .. ويمكن في النهائي ان تتساوى كفة الفريقين في الدوافع والحماس – خاصة اذا كان المنافس يمتلك عناصر تمتلك الخبرات مثل العناصر التى تلعب للاهلي الخرطوم.
• مدرب الهلال كان (موفق) في الضربات الترجيحية – هنالك مدربين يتفوقوا في ضربات الحظ .. واضح ان فلوران (حظه) ممتاز في ضربات الحظ وقد سبق ان فاز بالسوبر المغربي مع نهضة بركان على حساب فريق الوداد الفائز ببطولة دوري ابطال افريقيا.
• هذه نظرة (تحليلية) للمباراة التى تسيدها الهلال .. وكان يمكن للهلال ان يحسمها رغم (التكتل) الذي لعب به فريق الاهلي الخرطوم ونجح فيه.
• المباراة تجربة ممتازة للهلال .. وهي مباراة اظنها قدمت خدمة كبيرة للمدير الفني للهلال .. في الدوري السوداني يمكن ان يواجه الهلال اندية تلعب بهذا الاسلوب.
• لا بد من فلوران ان يعمل حساب لمثل هذه الدفاعات والتكتلات مستقبلا .. ولا بد كذلك من ان يحسّن من القدرات الهجومية لفريق الهلال.
• نحن سعداء بهذا الانتصار .. يمكن لو لم نفز بهذه الصورة لما فرحنا لهذه الدرجة .. المباراة لو انتهت بصورة تقليدية وفاز الهلال في الوقت الرسمي للمباراة الموضوع كان سوف يكون عادي.
• الضربات الترجيحية اعطت للمباراة نكهة ومنحت الكأس الاثارة .. وخلت ناس المريخ يعشموا.
• مبروك للهلال.
• مبروك الجمع بين الدوري والكأس.
• وردي وعثمان حسين.
• السنة دي الهلال شنو؟
• السنة دي الهلال وردي وعثمان حسين.
• ……………
متاريس
• ما عاوزين نتكلم كثير عن حكم المباراة .. لكن الحكم صرف ضربة جزاء للهلال وكان متسامح مع لاعبي الاهلي الخرطوم اكثر من الفاتح التوم نفسه.
• الاهلي الخرطوم قدم مباراة كبيرة ونجح (تكتيكيا) فيما فشل فيه الهلال.
• الاهلي الخرطوم لعب في البطولة الكونفدرالية وهو يمتلك خامة ممتازة من اللاعبين طبيعي ان يدخل الهلال في ورطة.
• نحمد الله اننا ضحكنا اخيرا.
• ومن يضحك اخيرا .. يضحك كثيرا … خاصة لو تحقق (الكأس) عن طريق الضربات الترجيحية التى فشل فيها المريخ.
• دا نظام عجيب.
• الانتصار الحقيقي يتمثل في التزام الاتحاد بقيام النهائي في هذا التوقيت.
• هذا امر يحسب لاتحاد الكورة.
• اتخيلوا بعد التعب دا يخسر الهلال (الكأس).
• الحمدلله.
• بكرة نرجع بفرحة اكبر.
• ……….
• ترس اخير : ناس المريخ فكروا في الانسحاب .. قلت ليهم انتوا تنسحبوا من شنو؟ انتوا طرتوا عديل من دور الثمانية
بداء الهلال في التراجع من الاسجام في خط المقدمة والوسط المتقدم فقد نفذ الهلال جمل اوصلته للمرمي عدة مرات وكان الطبيعي لدى الهلال عندما يلعب الكرة خلف المدافعين ان بلعب لنثلث الهجوم الكرة عكس تحرك المدافعين والتي اجاد منها مهاجمي الهلال احراز الاهداف بالاقدام وحتي الراس فقد احرز جميع المهامين باجادة نلك الجملة فاحرز محمد عبد الرجمن واحرز وليد واحرز ياسر واحرز عبد الرؤف واحرز اجاجون ولالامس صنع اللاعب الفاتة الامين نفس ااجمل خلف المدافعين لم يحسن تنفيذ جملتها مرتين ومرة اخري من ابراهيما ايضا خلف المدافعين ولكن تعثر الفريق في الجملة التي يجيدونها لسؤ الانسجام بين اللعيبة برغم انها جمل راسية ولكنخا لنفس طريقة التعامل في احسان نهاية الهجمة وطبقوها في المباراة السابقة بتمريرة صلاح عادل لمحمد عبد الرحمن الاسد الطائر كما وصفها المتابعين فلماذا لا تهالج مسألة الانسجام من تلطرف الايسر الهلال حتي لا تكون التمرؤرات محرجة او غير موجودة او مهدرة للانانية كتبنا هذا لك لمعرفة حرصكم علي تقدم الهلال بالتهاون واحترام الجهاز الفني وانهم يقدرون ملاحظاتكم لعلمهم بحرصكم
مبروك استاذ محمد ومبروك لكل الهلالاب. نحن ما بنحب نتكلم عن التحكيم. وصحيح كان في ضربة جزاء اوضح من الشمس لو الحكم ما شافها رجل الخط بيكون شافها لكن دة ما المهم. المهم انه الحكم تساهل مع لاعبي الاهلي الخرطوم وهم يضيعوا في الزمن لفترات طويلة من المباراة وفي واحدة من اللقطات اللافتة ردة فعل احد لاعبي الاهلي على قرار الحكم بشوف الكورة بطريقة غير مقبولة الى خارج الملعب في حالة سوء سلوك كانت تتطلب كرت اصفر على الاقل. وكما ذكرت استاذ محمد التوفيق جانب الهلال. اكثر من ثلاثة فرص مضمونة كانت واحدة فيهم كفيلة بإنهاء المولد لانه بعدها الاهلي كان سيحاول التعويض ويترك الخندقة وبكدة ياكل هواء.
في النهاية لا يصح الا الصحيح. الاهلي لم يشكل خطورة بالمطلق ولا يستطيع مريخابي واحد القول بإنه الاهلي كان يستحق الفوز. هم خططوا للوصول الى ضربات الجزاء وكما قلت لصديق لو وصلت المباراة لضربات الجزاء فسوف يخسر الاهلي. وهذا ما حصل. وكل كأس وانت بخير استاذنا محمد وهلالنا بخير وكل هلالابنا بخير. وسوف نظل دائما “هلالاب لمن غلط”.
مبروك لزعيم كتاب الأعمدة الرياضية، فارس زعيم الأندية السودانية الهلال سيد البلد أبزرد، ومبروك للسادة الهلالاب في كل مكان !!
عمود ما خليت فيه طريقة لصاحب المستعارات الخفيف الصبي العجوز مستعارخي عشان يتراشق، عمود ذي الحنضل بيحرق الفشفاش ويطمم البطن، واصل في البل يا ود عبد الماجد، وياريت لو هبشت لينا كمان موضوع شاكوش الجاكومي…..
غايتو الحاجة الوحيدة البتشابهوا فيها ناس أهلي الخرطوم مع الحلامبشة، هي عملية الترقد والتبطح وإهدار الوقت، غير كدة مستوى أهلي الخرطوم الفني أفضل بمراحل من مدعوم إتحاد اللقيمات الخرخار…..