صلاح قوش حضرها في القاهرة وجمهور الهلال حرم منها في ام درمان

صابنها
محمد عبد الماجد
صلاح قوش حضرها في القاهرة وجمهور الهلال حرم منها في ام درمان

• عندما نقول ان الهلال هو هلال الشعب وهو هلال الامة ونادي الحركة الوطنية ، ونادي الخريجين الاوائل لا نتحدث عن هذا الامر من منطلق اماني ولا نطلق الكلام على عواهنه.
• هذه الاشياء لم تأت من سدى ولم ترتبط بالهلال من فراغ.
• الموضوع دا ما عندو علاقة بهدفي السماني الصاوي…او تشكيلة جواو موتا.
• تكوين الهلال وبداية التأسيس والإنشاء قام على هذه الاهداف (الوطنية) وارتبط بها – حتى اصبح ذلك فينا من الجينات والطبيعة.
• كل شيء فينا يحكي عن هذا.
• انتوا فاكرنها كورة بس.
• لو بقت على الكورة ..كان خليناها.
• ان فتحنا هذه الملفات الوطنية التى يسمو فيها الهلال ويعلو سوف يشعر الكثيرين من الذين يناطحون الآن بغير هدى بالخجل والحياء.
• خليكم انتوا مع قوش.
• ما غريبة عليكم.
• يمكن ان يكون للمريخ مميزات اخرى … ويمكن ان يتميز في بعض الاشياء وبعض الجوانب عن الهلال ..ويتميز الهلال بأنه نادي الوطنية والخريجين الاوائل.
• نادي الشعب.
• هلال الملايين
• هو نادي الابداع والفن والعلم.
• كان من بين الذين اسسوه الشاعر والخريج والمناضل يوسف مصطفى التني الذي كتب اجمل قصائد هذا الوطن (في الفؤاد ترعاه العناية بين ضلوعي الوطن العزيز).
• اختار الهلال اللون الابيض والأزرق وهما الوان لهما علاقة بالصفاء والوطنية والسمو.
• النيل الابيض.
• والنيل الازرق.
• الحاجات دي طبيعة فينا.
• كتب على (اللوغو) الرسمي للهلال ( الله – الوطن – الهلال)…هذه اشياء نحملها في الدم والجينات ..نشربها في القهوة والشاي …ونطلع بيها في الشوارع ونحوم بيها في الامسيات.
• نكتب في الكراريس وننحتها في القلوب.
• بدروسها اطفالنا في (كتابي الاول).
• انتوا فاكرين الموضوع (كورة).
• وقون.
• وانتهت الحكاية على كدا.
• الهلال لعب له (كرومة) وشجعه محمد وردي وعثمان حسين ..تاني بعد كدا في شنو؟
• لعب للهلال الشاعر السر دوليب ومثل دائرة الثقافة فيه الشاعر الثوري ازهري محمد علي.
• هذا هو الهلال.
• اسماعيل الازهري ومبارك زروق وحمدنا الله عبدالله.
• هلال الملايين ..تحكي عنه …وتقص.
• نادي الوطنية.
• ونادي الخريجين الاوائل.
• هلال الملايين.
• هلال الشعب.
• حتى هذه المسلمات يريدوا ان يسرقوها.
• البذرة الوطنية في الهلال باقية ..هذه طبيعة في كل الهلاليين.
• لم يكن غريبا من لجنة تطبيع الهلال وهى لجنة غير منتخبة ان تمنع زيارة مدير جهاز امن ومخابرات النظام السابق صلاح قوش وان ترفض دعمها من خلال موقف يحسب لرئيس بعثة الهلال في القاهرة الاستاذ الدكتور مولانا عبدالله العاقب.
• هكذا رفضوها.
• الموضوع ليس انشاء.
• ولا كلام ساكت.
• الاحداث اثبتت ذلك.
• الصور.
• الاخبار.
• دا الزول بتاع البنت التى اخرجت من شنطتها (بندقية) وقتلت الشهيد الدكتور بابكر عبدالحميد.
• خلاص نسيتوا.
• فاكرين الثورة انتهت.
• قالوا يركبوا قطار العسكر.
• في الوقت الذي رفض فيه رئيس بعثة الهلال في القاهرة زيارة صلاح قوش ودعمه للهلال في القاهرة هلل المريخ وبعثته في القاهرة بزيارة صلاح قوش لبعثة المريخ ..الأكيد هو انه قدم دعمه للمريخ وصوره تنشر على مواقع التواصل الاجتماعي مع رئيس نادي المريخ حازم مصطفى ونائبه محمد سيد احمد الجاكومي.
• حازم مصطفى دا رايحة ليه (صورة).
• مرة مع الخطيب.
• ومرة مع قوش.
• يا زول اتقل شوية.
• انت رئيس نادي المريخ وليس مشجع.
• تخيلوا ان عضو في لجنة تطبيع الهلال – مجرد عضو ..رفض زيارة صلاح قوش لبعثة الهلال في الوقت الذي هلل فيه رئيس نادي المريخ ونائبه لزيارة صلاح قوش واتصوروا معاه كمان.
• الشيء الغريب انهم فرحانين.
• سعداء بذلك.
• كان تعملوه في السر.
• في الدس.
• الجاكومي عادي يعمل كدا.
• نحن نعرف لطبيعة العلاقة التى تجمع بين قوش والمريخ وتربط بين رئيس نادي المريخ ونائبه مع مدير جهاز الامن والمخابرات السابق.
• معروفة.
• لكن الموضوع لم يكن يحتاج لكل هذه (الصور).
• وكمان فرحانين.
• فعلا ومن (الجهل) ما قتل وليس من الحب وحده.
• انتوا ما عارفين الزول المتصورين معاه دا (متهم هارب) ومطالب من قبل السلطات السودانية عبر الانتربول.
• المصريون يمكن ان يكون لهم مصالح في حماية هذا الشخص ودعمه ..لكن انتوا في شنو؟
• احترموا مشاعر الشعب السوداني.
• احترموا الثورة.
• الغريبة ومن غير خجل ..اعلام المريخ ومن منطلق (العصبية) الضيقة ..طلع يدافع عن زيارة صلاح قوش للمريخ.
• الموضوع عندهم عادي.
• وما فيه أي مشكلة.
• ونحن عارفين كدا.
• واي زول مقتنع بهذا الكلام.
• بس وقت تعملوا هذه الاشياء ..ما تجوا تتكلموا لينا عن (الوطنية).
• الوطنية دي ما ساي.
• ما كلام.
• عاوزين تعملوا فيها نادي الشعب ..ونادي الوطنية ..وانتوا بتعلموا في حاجاتكم دي.
• على كدا فان حكاية نقل مباريات المريخ الى القاهرة ..والطعن في استقرار الوطن وأمنه ما كان من فراغ.
• اكيد الموضوع وراءه صلاح قوش.
• صلاح قوش الذي اراد ان يعود للإحداث ويرجع من تاني من خلال الهلال والمريخ.
• لكن عشان الهلال نادي الشعب ..ونادي الوطنية ..رفض الهلال زيارة قوش ودعمه بينما احتفى المريخ بزيارته.
• على العموم هذا هو صلاح قوش (متهم هارب).
• وحازم مصطفى الذي لا يستطيع ان يدخل البلاد ..عادي ان يلتقوا في تلك الصورة.
• وان يجتمعوا بهذا الشكل.
• طبيعي.
• بس ما تكلمونا عن (الوطنية).
• الموضوع دا انتوا ما بتقدروا عليه.
• خليكم مع السماني الصاوي…افرحوا ..وابتهجوا ..مبروك عليكم.
• افرحوا بالخطيب.
• امشوا ليه في البيت.
• اصلو ما عندنا مشكلة.
• اتصوروا مع صلاح قوش.
• قولوا البلاد غير مستقرة.
• الموضوع عندكم (كورة).
• من اجل المكسب ممكن تعملوا أي شيء.
• كل هذه الاشياء ..مبروك عليكم..ما غريبة عليكم.
• بس ما تكلمونا عن (الوطنية).
• موضوع (الوطنية) دا ما عندو علاقة بالحكام ..او الانتصار.
• الوطنية دي حاجة تانية خالص.
• كمان طلعوا يدافعوا عن صلاح قوش.
• زول البلد بتلاحق فيه بالانتربول …الصور معاه على شنو؟
• منحوه بطاقة للدخول للمباراة.
• تقول (اعلامي) او عضو مجلس في ادارة المريخ.
• الامر عجيب ان الاتحاد الافريقي الفاسد منع الهلال من جمهوره ..وكلنا شاهدنا جمهور الاهلي المصري والرجاء والوداد والترجي والنجم وهم بشاهدوا في مباريات انديتهم من الملعب.
• الاتحاد الافريقي منح بعض الاندية الافريقية الاذن في حضور 40 الف مشجع ..والهلال منعوه من حضور (15) الف مشجع.
• المريخ الذي يلعب برة بلده ..وفي بلد غريبة عليه منحوه فرصة حضور عدد من جماهيره.
• صلاح قوش (السياسي) والمتهم الهارب حضر مباراة القمة في القاهرة وجمهور الهلال لا.
• هل يمكن ان يكون هناك فساد اكثر من ذلك؟
• في اكتر من كدا خراب.
• الله يلعن الفاسدين ..برة البلد وجوة البلد.
• ……
متاريس
• عديلة عليك.
• الحمدلله …الهلال فاز على حي العرب في استهلالية مباريات الهلال في الدوري.
• والاستهلالية دائما فيها صعوبات.
• خاصة ان الهلال عائد من خسارة امام المريخ في البطولة الافريقية.
• الشيء الجميل ..ان اخر هدف للهلال في الدوري الممتاز الماضي سجله ياسر مزمل.
• وياسر مزمل جاء وافتتح اهداف الهلال في الدوري الممتاز لهذا الموسم.
• خيرا ان شاء الله.
• مباريات الدوري الممتاز يجب ان يلعب الهلال فيها بحذر وحرص.
• المحافظة على اللقب …امر لا بد منه.
• الهلال في كل المواسم السابقة بفقد كتير في الدورة الاولى للممتاز ويأتي يعوّض في الدورة الثانية.
• المرة دي ما عاوزين نفقد ولا نقطة في الدورة الاولى.
• ولا (كورنر) في الدورة الثانية.
• مبروك عليكم.
• …..
• ترس اخير : مباراة القمة القادمة مباراة لاعبين ..الكورة في ملعبهم ..والرد القاسي سوف يكون ان شاءالله منهم وحدهم وبعدين بيبقى لينا كلام.