عرقلة سفر الهلال وحاجات تانية حامياني!!
بالعربي الكسيح
محمد الطيب الأمين
عرقلة سفر الهلال وحاجات تانية حامياني!!
* عندنا في السودان لو (إستحميت العصُر) ممكن بعض الناس تحسدك .
* يحسدوك على (حمام العصُر) .
* لو جاك فرح في حياتك يحسدوك عليه .
* في ناس ممكن تحسدك حتى في حزنك .
* في الحزن يحسدوك .
* البحسدك على حزنك قطع شك بحقد عليك في فرحك .
* وبما أن (هذا هو هذا) فإن كثير من الناس يحسدون الهلال على (لجنة التطبيع) .
* ما دايرين الهلال ينجح ولا دايرنو يستقر .
* والناس ديل فيهم (مع الأسف) هلالاب .
* هلالاب مننا وفينا.
* وأكيد فيهم مريخاب.
* وما المريخاب إلا هم هلالاب زعلانين .
* لما يحسدونا مريخاب شوية بتكون مبلوعة لكن لما يحسدونا ناس مننا وفينا دي العوجة ذاتا.
* بالأمس مدد الإتحاد العام للجنة تطبيع الهلال.
* وهو قرار طبيعي بعد هذه الإنجازات التي حققتها اللجنة .
* أنجزت اللجنة ملف التسجيلات والعضوية والمعسكر الخارجي والجهاز الفني وديون الإستاد وتأهيله وشكاوى الفيفا وغيرها من الملفات.
* التمديد لهذه اللجنة قبل أن يكون قرار اتحاد فهو قرار جمهور .
* ولذلك نحن سعداء بهذا التمديد ، وعلى قدر سعادتنا زعلنا لأن بعض الهلال لم يعجبهم هذا التمديد.
* حسد عجيب .
* ايضاً جزء من الحسد ظهر في المحاولات الخجولة لعرقلة سفر الهلال إلي غانا .
* وإذا صح ما تم تداوله بأن أسامة عطا المنان شريك في (العرقلة) تبقى كارثة .
* البنعرفو إنو مشكلة أسامة مع الإتحاد وليس مع الهلال .
* لا أجزم بأن الرجل عرقل التأشيرات ولكن إن فعل ذلك فلا غرابة في الموضوع .
* فريق يقول أن أسامة كان (جزء من العرقلة) بعد أن طلب (٣٠٠) دولار قصاد كل رأس هلالي مسافر إلي غانا .
* في حين أن حساب الرأس بدون سمسرة (٦٠) دولار .
* أو قل (٨٥) دولار .
* والله الهلال شقاوتو شقاوة ، (أولاد الهلال دايرين يأكلو لحم الهلال والغرباء برضو دايرين يأكلوا) .
* مساكين ما عارفين لحم الهلال مُر .
* هذه المحاولات الهزيلة إن كانت من أسامة أو من خلافه تبقى (عبط) ليس إلا لأن للهلال رجالات داخل وخارج المجلس .
* السوباط والطاهر يونس واخوانهم باللجنة ما بتغلبهم حاجة .
* وما قصروا في أي حاجة .
* بدل الناس تحدر ليهم في الضلام أفضل تساعدهم بالدعوات وهذا أضعف الإيمان.
* أي شئ يمس الهلال يمس الوطن .
* الهلال وطن .. ويكفى أن الأندية الثلاثة الآخرى التي تلعب بإسم السودان (كفيلهم) الهلال .
* المريخ ذاتو الهلال (كفيلو) .
* أي أمور تتعلق بالهلال ح تلقى السودان ده كلو متحرك .
* سفير ، قنصل ، وزير ، رئيس .
* كلو يعمل من أجل كبير البلد.
* وبالتالي لا (٣٠٠) دولار ممكن تعطل تأشيرة لاعب الهلال ولا مليون دولار .
* المهم.
* سعادتنا كبيرة بالتمديد .
* ونرجو ونتمنى أن تركز اللجنة في عملها وأن لا تشغل نفسها بالأصوات التي يمكن أن تحسدك حتى على (حمام العصُر) .
* أي هلالابي الآن راضي كل الرضى عن لجنة التطبيع .
* ما عدا (هلالاب الأفراد) .
* زول بحب (الكيان) ح يحب هذه اللجنة .
* والله ناس المريخ يلقوا زي السوباط ده نوم ما ينوموا .
* لكن ناس الهلال مرات عندهم الافتراء.
* قلت ليك ناس المريخ يلقوا الطاهر يونس ده نوم ما ينوموا.
* الفرحة تكتلهم بالسهر .
* ديل كانوا فرحانين بجمال الوالي رغم فشله غير المسبوق فيما يتعلق بفريق الكرة.
* كانوا رضيانين بالوالي الذي في عهده كانت متواليات الهلال .
* وكان الطيران والمرمطة .
* بمناسبة الطيران .
* أنا في قصة بحب وبطرب جداَ لما احكيها .
* قصة بتعدل لي مزاجي .
* كل ما اكون زهجان عندي أرشيف بتاع جرايد حمراء بطلعو وبقعد أضحك.
* ومن القصص المثيرة هي قصة سفر المريخ الي الكنغو .
* احكي ليك القصة .
* قبل سنوات المريخ ماشي يقابل مازيمبي وطبعاً (نادراً المريخ يواجه الكبار) .
* بيطير قبل يصل مرحلة الكبار .
* الغريبة (ود الليدو) السنة دي ما كتلو جمب بيتو.
* اتجاوز التمهيدي السنة دي .
* المهم .
* جمال الوالي قال البعثة تمشي بطائرة خاصة .
* يا راجل لشنو التعب ده كلو ؟
* قال لا عشان الفريق يتفادى الإرهاق .
* سمح .
* جابوا الطيارة الخاصة ، والطيارة كان فيها اللاعبين والجهاز الفني وعدد عشرة (بودي قارد) وأربعة طباخين واتنين فنيين لفحص الهواء .
* هواء شنو ؟
* قالوا ديل فنيين يفحصوا هواء المُكيف لأنو احتمال مازيمبي يعمل ليهم مُخدر في المُكيف .
* هو مازيمبي ما عمل مُخدر للاهلي المصري يعمل ليك أنت؟
* قوم على حيلك .
* الطيارة الخاصة وصلت الكنغو بسلام .
* أول حاجة عملوها الكنغوليين (دقوا) البودي قاردات العشرة .
* دقوهم مبدئياً كده .
* دقوهم من باب الاحتياطي كده .
* وساماتا تم باقي الدق جوة الملعب .
* ضربهم ليك والشمس فوق .
* دقوهم وغلبوهم وجونا يبكوا .
* مالكم ؟
* قال غارزيتو باع الكورة ومحسن سيد ما بعرف يُرص العلامات .
* وأنت عرفت كيف إنو غارزيتو باع الكورة ؟
* يقول ليك : عرفت لأنو غارزيتو طاف الملعب وهو يوزع التحايا لجمهور مازيمبي.
* اها وتاني ؟
* تاني قام طلع المصري أيمن سعيد وقد كان أفضل لاعب في المباراة.
* هاك المصري ده .
* واوع تقول لي مازيمبي أداك خمسة في استادك.
* أنا أول فريق يغلب مازيمبي في بلدو.
* وتعال أناقشك.
* ما تقول لي مازيمبي أداك خمسة.
* الخمسة دي انت هلال الأبيض أداك ليها .
* أداك خمسة ولا ما أداك؟
* هلال الأبيض أداك خمسة ولا أنا ظالمك؟
* نسيت مكورو؟
* عموماً .. الهلال إلي غانا من أجل الفوز .
* ولو ما جات تأشيرة ما ح نمشي وح ننتظر الاشانتي يجي هنا نديهو تلاتة أربعة ونتاهل.
* اعتبرونا خسرانين (٢/صفر) بسبب عدم السفر .
* وتعالوا لينا هنا بنديكم تلاتة وبنتأهل ونحتفل من داخل منزل أسامة عطا المنان.
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* والله في .
هههههه هااااااي. ابدعت ياود الطيب. الليلة ابو المستعار بتجيهو تشنجات وسوف يطلق عليك المدفعية الثقيلة من خمسة جبهات. طبعا خمسة اسماء لشخص واحد. غايتو الليلة دي نار غاز عديييييل كده وليست نار قصب وربنا يستر علي ابو المستعار مايقوم يترس ويفقد عقله ويدخل التجاني الماحي. ماخليت ليهو ثغرة يرد عليك بيها. يجازي محنك🤣🤣🤣
قلت لي الجماعة عاوزين ينقلوا البلطجة لديار مازيمبي وساقوا بودي قاردات؟؟. ههههه هاااااا تحسبوا لعب؟؟. قلت لي اول حاجة البودي قاردات اخدوا علقة وبس. ؟؟؟؟انت نسيت اهم حاجة البودي قاردات اخدوا حمام بالبولينا مخلوط بالبيرة الكونغولية واظنهم بيتوهم في السهلة!!!! والله الشلاقة مصيبة جد ياود الطيب.
اولا بأي حق وبي ياتو قانون يمدد شداد للجنة تطبيع مهمتها ومدتها محددة من حق الأعضاء الاعتراض على التمديد يا بتاعين الديمقراطية
ثانيا لو عامل رايح أو ما كنت عارف أعرف السوباط كان مرشح ضمن لجنة التطبيع المريخية مريخابي يعني ذي الهلال ولدنا وكان ما عاجبك شوف ليك فريق شجعو ده التاريخ هههه
ثالثا في قصة أنا بحب أعيدها ليك لما المريخاب الزعلانين مشو في ذلك اليوم الاسود كونو حاجة اسمها الهلال زعلة منهم بس
رابعا برضو مازيمبي غلبك 5 كأكبر هزيمة من فريق خارجي وفي منافسة قارية لبي فريق سوداني داخل أرضو وبين جمهورو وفي معبرتو ومازيمبي لما غلبنو كان غالبك 5 في بلدك ولعب معاك بالصف الثالث لان المباراة غير هامة القصة انتهت
ايام جمال الوالي اللي بتقول فاشل المريخ كان بلعب الوديات والمسكرات مع ناس بايرن ميونخ وشالكه وزينيت والأهلي والأسماعيلي ومحترفينو ناس الحضري والنفطي وبن ضيف الله وباولينو وكدا وانت كان ساكت وما في زول بعرفو أصلا
هههههههه الله يشفي غليلك من الاحقاد يابو المستعار الدلقوني. مازيمبي لو بالصف التاني او العاشر مافي فريق هزمه في ملعبه غير الهلال وبعدين الحارس كديابا الانبطح في الاقوان كان من الصف الثالث؟ طبعا متعودين علي الكذب والتزوير ولازم تبخسوا انتصارات سيد البلد يابتاعين السباعيات والتسعات. طبعا السبعة والتسعة في مباراة واحدة مش زي اخصائياتك البتجمع فيها تلاتة واربعة مباريات لتكبير الكوم. 😹😹😹😹😹😹😹
هههههههه ونسة سمحة
هزيمة مازمبي من الهلال ههههههههههههه اسال منها الفاتح النقر
الفاتح – فتح الله عليه – قبل الهلال يسافر قال مازمبي حايلعب وقافي والهلال حايغلب لان مازمبي ضمن التاهل ولن يرهق لاعبيه في مبارة تحصيل حاصل هههههه
تحصيل حاصل ي ابو بنطلون ناصل
انت بتحب الارشيف قلت لي ههههه
خلاص ارجع لارشيف مباراة مازمبي
في الارشيف الشفتو مالاقاك كمال ترباس القال قبل يكمل كباية الموية الهلال اتغلب كم كدا ما عارف ههههههه
العاطل منو يا عاطل عن الفهم واللغة الرصينة
يالله اركب الدحيش وانزل في زريبة العيش