فضيحة .. تدخل الوفد المرافق لبعثة الهلال في التشكيلة ؟؟

قزاز ورذاذ

محمد الطيب الأمين

فضيحة .. تدخل الوفد المرافق لبعثة الهلال في التشكيلة ؟؟

* من اللطائف أرسل لي صديق (اسكرين شوت) من إحدى صفحات الهلال.
* ونحن في الهلال نعرف نفسيات بعضنا البعض.
* نحن في حالة الخسارة لو (قرصتنا نملة بنقول هي سبب الخسارة).
* وهذه عادة عند معظم الهلالاب.
* بنحاول نتعلق بقشة.
* مرات بتكون في زول ما بتحبو ساكت كده ، لما تشوفو في الإستاد بتقول : خلاص الهلال اتغلب.
* بتذكر زمان كنا شغالين في جريدة.
* لما الهلال يكون لاعب بره السودان والمباراة مُتلفزة بنتجمع كلنا في مكتب رئيس التحرير لمتابعة اللقاء.
* في زميل من صحيفة تانية بحب يجي يحضر معانا المباراة في صحيفتنا.
* ونحن بنضايق جداً من جيتو.
* بنقول الزول ده كج.
* مرة جانا والمباراة مهمة جداً أول ما دخل المكتب قمنا (معطنا) سلك الديجيتال.
* طردناهو عديل بسبب أوهام في رأسنا.
* حسادة ساكت طردناهو ونحن ذاتنا ضحينا بمشاهدة المباراة.
* كنا مواهيم وغرقانين في السذاجة والعبط ، ولكن الحب ربما يبرر ذلك الشعور.
* المهم.
* صديقنا رسل الاسكرين.
* في الاسكرين تظهر صورتي مع بعض نجوم الهلال (الأخوان غير الأشقاء).
* مكتوب تحت الصورة (شربتوا الهلال) ، وبرضو صورة تانية مكتوب عليها (معسكر الهلال غير منضبط).
* قلت لهذا الصديق : أنا وبشكل شخصي بعتذر ليك ولكاتب البوست لأنني فشلت في تسجيل هدف في مرمى سانت جورج.
* حيث كنت اعاني من شد عضلي وشاركت في المباراة وأنا مطعون حُقنة.
* وقد تخلفت عن مرافقة البعثة التي وصلت الخرطوم صباح اليوم لأنني اواصل الان تمارين التأهيل مع طبيب سانت جورج وسأصل الخرطوم الجمعة بإذن الله واعدك أن اغازل مرمى سانت في مباراة الإياب.
* أما الأخوان أيمن واوهاج وبابكر فقد شاركوا في المباراة بالأحذية العادية بعد أن نسوا أحذية المطر في الفندق.
* وهذا أثر على مردودهم.
* أما بالنسبة للصور فقد تحدثت مع اللاعبين وطلبت منهم (التراخي وعدم الفوز تقديراً لعمق العلاقات بين البلدين).
* قلت ليهم نحن كسودانين أهل كرم لازم نتغلب عشان سانت جورج يفرح والحبشيات ما يزعلن.
* كل شيء ولا زعل الحبش.
* أما حكاية الإنضباط .. فإن كل الزملاء الإعلاميين مقر إقامتهم بعيد عن مقر إقامة البعثة ومقابلة البعثة عادة تكون إما أمام الفندق أو أمام الإستاد أو داخل الإستاد.
* شكرت هذا الصديق وأرسلت له مجموعة كبيرة من الصور لنشرها تباعاً خلال الأيام القادمة لأن ذلك بيدينا شهرة أكتر. رصدابوسبأ
* عموماً صحيفة (الزرقاء) مع كل سفرية للهلال سيكون لها مندوب إن شاء الله ، أما قناة (دقايق) لصاحبها العبدلله ، الحمدلله الحمدلله تستقبل الآن القناة دولارات شهرية من اليوتيوب والحمدلله، ولذلك قناة (دقايق) ستكون مع الهلال في أي مكان وزمان وتحت أي سماء وأرض.
* يعني ح تشبعوا صور جد.
* اللهم إلا يخذلنا الخوف من الطيارة.
* بعيداً عن هذا كله .. نجدد مباركتنا للهلال الترقي للمرحلة القادمة على حساب سانت جورج رغم الخسارة إن شاء الله .
* ما تسمع الجوطة دي .. عوجة ما بتجينا إن شاء الله.
* الشاف ما زي السمع.
* و.. و..
* قدام بس.