فيها ريحة السوباط ونفس الطاهر يونس
قزاز ورذاذ
محمد الطيب الأمين
فيها ريحة السوباط ونفس الطاهر يونس!!
* عندنا في السودان لو قلت لزول (شكراً ليك ما قصرت) بيقول ليك : (يقصر الملح).
* وأنا ما عارف ليه يقصر الملح؟
* ليه الملح تحديداً؟
* لشنو ما بنقول : يقصر البصل أو يقصر الشمار أو يقصر السكر؟
* ربما يكون السبب هو أن نقصان الملح أفضل من زيادته.
* عشان كده يقول ليك يقصر الملح.
* وبما أن ذلك كذلك أعتقد أن (السوباط ما قصر) ولعيبة الهلال هم (ملح ما قصر برضو)..
* ملح زايد.
* نقول للسوباط شكراً ليك ما قصرت لكن ما بنقدر نقول للعيبة الهلال (يقصر الملح).
* لجنة التطبيع وللامانة فعلت كل الممكن وبعض المستحيل وفي فترة وجيزة جدا.
* الشغل العملتو اللجنة دي في مجالس ادارات اشتغلت في الهلال دورة ودورتين ولم تتمكن من فعل ما قامت به هذه اللجنة فيما يتعلق بفريق الكرة.
* لجنة التطبيع فعلت الكثير تجاه الفريق حتى تسعد الجمهور.
* سجلت محمد عبد الرحمن في أعلى صفقة في تاريخ اللاعب السوداني.
* ومحمد اسم في الكرة السودانية كل فريق يتمناه.
* تسجيل محمد عبد الرحمن من إنجازات لجنة التطبيع الكبيرة جدا.
* ايضا تسجيل أبو عشرين لا يقل قيمة عن تسجيل محمد.
* جيسي مكسب وموهبة تحسدنا عليها أفريقيا.
* أوتارا ، ارنق ، عيد مقدم ، مؤيد ، الدالي ، مجاهد ، صلاح عادل ، وضاح ، بوغبا.
* كضاب البيقول الأسماء دي ما مكسب للهلال.
* أربع سنين والهلال جاري ورا بوغبا، لجنة التطبيع جابتو.
* كل أفريقيا جارية ورا جيسي ، لجنة التطبيع جابتو.
* نص جماهير المريخ جاهم (سكري) لما محمد عبد الرحمن رجع الهلال.
* والنص التاني جاهم (ضغط) لما أبو عشرين الشهير ب(لون الدم) سجل في كشوفاتنا.
* أفضل تسجيلات للهلال خلال عشرين سنة اتعملت في هذا العهد.
* احسبها بالورقة والقلم.
* عشان الناس ما تبقى مفترية ساكت.
* لجنة التطبيع اشتغلت وهي غير مسؤولة عن فرصة مضمونة اهدرها الغربال.
* اللجنة غير مسؤولة عن مدرب صبر على الشغيل ٩٠ دقيقة وكان يفترض يمرق من الدقيقة ٦٠.
* ده شغل فني.
* لجنة التطبيع وفرت ثلاثة خيارات للجهاز الفني في خانة الطرف اليمين (الجامايكي ومؤيد والسموال الموجود اصلا).
* اللجنة ما عندها دخل إذا الجهاز الفني اختار السموأل من بين جميع الخيارات.
* التعادلات وسوء النتائج مسؤلية اللاعبين في المقام الأول والأخير.
* السوباط ما عندو دخل في التعادلات دي.
* ولا الطاهر يونس عندو يد في جلطة عملها بوغبا.
* يكفي هذا اللجنة إنها جاءت بتركي آل الشيخ رئيسا فخريا.
* وتركي الجابتو اللجنة جاب ليك مساعد مورينهو.
* ومساعد مورينهو ده لو ما لجنة التطبيع الجابت تركي ، والله ريكاردو ده ما يجي البلد دي إلا يكون تابع لليوناميد.
* بطلوا الافتراء يا جماعة.
* لو الغربال والشغيل والسموأل وبوغبا خذلوك جوة الملعب ده ما معناها لجنة التطبيع فاشلة.
* عندك حسابات مع الناس ديل صفيها بعيد من الهلال.
* نحن عقب التعادل أمام شباب بلوزداد انتقدنا اللاعبين بقسوة لأن التقصير منهم وليس من سواهم.
* قد تكون لجنة التطبيع قد وقعت في أخطاء ولكنها أقل بكثير من النجاحات.
* أكبر خطأ وقعت فيه هو إضافة الأجانب التي لم يستفيد منها الهلال.
* هذا خطأ كبير تتحمله اللجنة دون شك.
* تعاقدت مع لاعبين أقل قامة من الهلال وعلى رأسهم السنغالي.
* ثم أننا لا نعلم هل الإضافات الأجنبية دي رشحها سعادة المستشار ام انه دفع قروشها وكان الترشيح من السمسار؟
* الاخطاء التي وقعت فيها اللجنة لا تخرج من كونها أخطاء عادية ارتكبت أكثر منها مجالس منتخبة.
* يغادر الهلال الابطال وليس في ذلك جديد ونكرر المحاولة مع السوباط وأركان حربه في الموسم القادم.
* ونرجو منه الاستفادة من السلبيات.
* الهلال يبدأ الان مع المدرب ريكاردو.
* وثمار ذلك لن تظهر الآن.
* لا تربطنا علاقة مصالح مع لجنة التطبيع ولا نعرف حتى مكاتبهم.
* ولا نريد معهم علاقات، نتابعهم من على البعد فإذا أحسنوا نالوا من (الرذاذ) وإذا فشلوا كان لهم (القزاز).
* وحتى الآن هم بخير ولا غبار عليهم.
* فقط نرجو من لعيبة الهلال أن يكونوا على قدر الرهان.
* لاعبون يرفسون النعمة.
* عندما تأهلوا للمجموعات كان حافز سعادة المستشار ٢١ مليار، فبدلاً من أن يجتهدوا حتى يكون الحافز القادم ٤٥ مليار شبكونا تعادلات في تعادلات.
* لجنة التطبيع تعمل ليكم شنو أكتر من كده.
* نسأل الله التوفيق للهلال ونتمنى أن لا يفتري جمهور الهلال على النعمة.
* و.. و..
* والله المستعان.
