*زماااان
*قلت ليكم كورتنا بتشبه عيشتنا
*اسي لو ملاحظين ترتيبنا العالمي في روليت الاصابة بكورونا عالميا
*هو نفس ترتيبنا العالمي في روليت المنتخبات
*وذلك الفضل من الله
*في ناس كانوا متخيلننا نقابل ايطاليا في نهائي كاس كورونا
*لكن النهائيات انحصرت بين الفطاحلة امريكا ايطاليا فرنسا المانيا واسبانيا
*الصين بدت كويس لكنها طارت من نهائيات الكورونا
*المهم
*كورونتنا بتشبه كورتنا والاتنين يقبعن في اواخر الروليت العالمي
*والحمد والشكر لله
*ايها الناس
*كورونا مالعب
*والهظار معاها زي محاولة داريو كان محاورة فيصل عجب
*تتذكروا لما خطفها منو وكشحها في السقف؟
*اها دي الكورونا
*اي لعب معاها بتختفها وتختها ليك في السقف
*سقف شنو
*في الحلق
*والكورونا كان مسكت الحلق قول يالطيف
*يبقي نتعامل معاها بجدية
*ونبطل استهتارنا بيها ده
*نعمل العلينا وبعد داك نتوكل علي الله
*فالفرق بين التوكل والتواكل كبير شديد
*والمتواكل عمرو مابكون متوكل
*المهم
*سمعنا بانو كوكو برضك ودانا الفيفا
*وبقولوا السبب خطأ في المخالصة
*ان صح هذا الكلام
*لينا كلام
*المهم
*الاتحاد العام جاب جواب واضح فيهو قرار الغاء الجمعية العمومية ولا لسسسسسسة؟
*غايتو من ناحية المصلحة العامة الوردت في الخطاب الفات
*انا شايف يمكن تحقيقها في اول جمعية عمومية ويتم ذلك باجازة محضر ومخرجات الاجتماع السابق
*والاجتماع السابق طبعا هو اجتماع اجازة النظام الاساسي في ١٩ اكتوبر
*ايها الناس
*اذا قمنا بتنفيذ جميع توجيهات الجهات الصحية المتعلقة بكورونا
*بنبقي ماخايفين الا من كرونة الجيش
*بالذات بعد كشف منظمة الدعوة وقانونها الخاص وحصانة منسوبيها وموظفيها
*حاجات تشيب الرأس
*والصلعة
*والولدان
*هكذا اذن لمعت اسماء وتلاشت نجوم في سماء رجال المال والاعمال
*وبين هذا وذاك ضاع وطن بقامة قارة
*المهم
*روح الانتقام عندنا لاتسيطر علي الرغبة في انتشال الوطن والمواطن من مستنقع الضياع الذي اغرقهما فيه النظام البائد
*لذا نناشد الحيكومة بان تلفت شوية لمعيشة المواطن
*وتعالج الجروح العميقة بسرعة
*فالمواطن الذي جرح في كرامته بالشحدة في مكاتب الزكاة
*والمواطن الذي جرح في مرتع صباه ليبيع دار ابيه ويرحل اطراف المدينة كي يتعيش من فرق السعر
*والمواطن الذي جرح في طموحة عندما اخرج ابنائه من المدارس لانه عاجز عن رسوم الدراسة
*والمواطن الذي جرح في حبه للحياة لدرجة ان تمني الموت
*والشهيد الذي قدم روحه الطاهره في طبق من ذهب ليعيش غيره بكرامة
*الناس ديل كلهم ياحمدوك يستحقون ان نعمل جاهدين لنرفع عنهم عناء فرضه عليهم النظام السابق
*ديل الحبوك ياحمدوك
*ديك ماحبوك
*ايها الناس
*موضوع كوكو ده مابنسكت عليهو
*ايها الناس
*ان تنصروا الله ينصركم
*اها
*نجي لي شمارات والي الخرتوم
*ان شاء الله يا والينا
*ربنا يحفظنا ويحمينا
*لاكورونة يوهان تجينا
*ولا كورونة الجيش تزاول لينا
سلك كهربا
ننساك كيف والكلب قال ولسسسسسسة
والي لقاء
سلك
