*كش ملك .. هلال اماهور هلال الفرحة والسرور
العمود الحر
عبدالعزيز المازري
*كش ملك .. هلال اماهور هلال الفرحة والسرور
*وحق علينا ان نقول هلال اماهور هلال رواندا
*فهم الفأل الحسن وو الجمال
* وكش ملك ..
*وما اروعك ياهلال
*رفعت معدل الادرينالين سعادة وحماس ولحظات ترقب تنساب ما بين أيدينا
*نخرج فندخل وصاحبي غلبوا القعاد
*انتهت ولا لسه ..هي يادووب ياحبوب بدت
*تعال يا ازرق الهلال رقد بالجماعة والقصة خلصت
*هناء وسعادة وفرحة عمت وانتشرت السعادة
* عملتها يا ريجي … كسبتها شجاعة ونجاعة
* ريجي رقد بالجماعة ..صمت واقتنص النقاط
* رقعة شطرنج نقول ايه ونخلي ايه!!
* دا هلال سطع ولمع .. أسعد وامتع
* رواندا وما جاورها .. طلابنا ومحبينا .. إلا الجماعة إياهم وناس مولودية
* ايه الجمال دا ياريجي … دا شغل معلمين .. اتاري احنا كنا مظلومين وما عارفين رقعة الشطرنج دي توزع كيف يافلوران طيب الله سيرتك
* الهلال في الجمعة الجامعة والناس السامعة كان حاضر بروح البطل وثقة مدرب منحهم الفرصة لإثبات الجودة
* فكانت الرقعة تتوزع ما بين روخين كل أخطر من الثاني
* الجان روخ تلاعب ودوخ و كوليبالي دا استثنائي
* نقول منو ونخلي منو نتحدث عن الصنديد صلاح الروح والفلاح ولا بوغبا الوزير ولا الغربال القائد المحن
* ولا الصقر الجارج ارنق ولا ايبولا ولا فريد الفريد في عصرو ولا كرشوم صخرة الدفاع والعقل المدبر
* كده كلك على بعض حلو
* ويسلم الحلو
* هلال أتى بروح تانية السنة دي … جندلة الصن داونز خلت ناس مولودية ناموا بدري
* قال ايه … نكسب الهلال ونكسب سانت لوبو ثم نموتو مع الصن وكتوموتو يا مولودية
*ماعاوز اجيب سيرة جيرانا واحبابنا وضلنا ووصيفنا المريخ ..اصلو ديل عايشين علي ماضي الذكريات
*نخليكم للغناء وماضي الذكريات ونقول علي لسانكم
وذكرياتنا مهما كانت برضو ترديده بيألم
وكيف امانينا الجميلة حلت الآهات مكانا
* أنه الهلال لا كذب … انه أسد النزال
* بالأمس الجمعة، كسر الهلال كل التوقعات وكل التكهنات
* والبالون المنفوخ كان صريعًا …
*ناس الصن الفريق الرزين برازيل افريقيا
راحت ليهم أي والله راحت ليهم
بقوا خارج النص ..والنص
*ريجيكامب دا داهية ثعلب عرف من اين تؤكل الكتوف
*والفوز علي الصن دا براهو بديك دافعية
* فهذه المرة فرحت رواندا وبكت بريتوريا بجد
* ثنائية ولا أحلى … ركلة جزاء تسبب فيها المايسترو البروف ودا رؤووفا ياجماعة
* لأن شغله براهو … خلينا براهووو
* أقدل يارؤووفا افعل ما تفعل وبالخفة تمتع … فكانت القاضية ركلة مستحقة في زمن مهم جدًا
* وكان التنفيذ من قدم لاعب واثق ورائق
* غربال ياجمال … انت كنت حاجة تانية
* قيادة ودفاع ونجاعة فكان لزامًا أن تبصم وتسجل من ركلة من ضربة
* كان ريجي واقعياً … فكسب الرهان ووضع خطة الفوز
* وبها تصدر هلال الملايين ليترك الصن ثانياً بخمسة نقاط
* لينفرد بثمانية نقاط ولا أروع
* نعم، نؤمل ونفتح براحات الأمل
* فالاداء في تصاعد، ونملك كتيبة مقاتلة حريفة
* ولنا مدرب يعرف من أين تؤكل الكتوف
* وعندما قال لا اجيد الحديث وحديثي، فقد صدق … وحوّل المباراة للهلال فقط
* إدارة الهلال، مجلسه حق علينا أن نشكر المجلس
* شكراً سوباط، شكراً شكرا، عليقي … شكراً بروف حسن علي عيسى
* ولمدير الكرة عاطف النور وكل الجهاز الفني من محلل ومساعدي مدرب … وكلهم كده أجمل ما يكون
* الهلال نوووووووووووووم افريقا كلها بفرحة
*وعشاق الأزرق قدم لهم اجمل هدية
*هكذا نقول
هلال زي دا تاني وين نلقه
**كلمات حرة:**
*الهلال كسر كبرياء صنداونز وارسل رسالة واضحة افريقيا ياهلال مش كلام شغل وبيان
*الهلال رقد بالصن ابداع ما بعده ابداع عشنا لحظات قاسية ولحظات فرحة حتي اطلق الحاكم المصري صافرته
*ارتاحت القلوب وهدأت الانفاس واشتعلت وسائل التواصل برسائل الفرح كم انت كبير ياهلال
*احلي ما في الامر واروعه ان لاعبنا السوداني بدأ يستوعب كيف هي الكرة تلعب بالإنضباط وريجي علمهم الانضباط
* فرحة الهلال اليوم فرحة شعب، فرحة وطن … ليلة تتوّج جهد كل من ساهم في هذا الانتصار
**كلمة حرة أخيرة:**
ونقول للجماعة الهلال اسكت الجميع وليكم نقول
مسكين البدأ يأمل املو يغلبو تحقيقو
الف مليون مبروك استاذ عبدالعزيز ليك ولكل الهلالاب هذا الانتصار الباهر على صنداونز. كما قلت المباراة التي قادها المدرب الداهية ريجيكامب بشجاعة كبيرة كانت ملحمة. قلت لصحفي يدعي انه هلالابي يكتب في جريدتنا الغراء “كورة سودانية” عقد مقارنة بين الهلال وصنداونز في المباراة الاولى واعتمد على إحصائيات المباراة للتقليل من الهلال بالقول “شن جاب لي جاب” وكذلك كاتب مريخي آخر يكتب ايضا في جريدتنا الغراء “كورة سودانية” لمح الى ان الهلال بعد الفرحة والاحتفالات التي عمت عقب المباراة الاولى سوف يترنح ويخسر المباراة الثانية. للإثنين كتبت معلقا ومتوعدا , قلت “انتظروا وسوف ترون الهلال ينتصر بإذن الله” وهذا ما حدث بالضبط. الهلال لم يتعادل مع صنداونز في بريتوريا لكنه اصابه بالصدمة. ذكرت في مداخلة لي مع احدهما انه لم يحدث ان رأيت فريق يلعب مع صنداونز على ارضه بهذا المستوى بل حتى ان مدرب صنداونز قال انه واجه منتخب السودان وليس مجرد فريق. اما هجوم صحفي “شن جاب لي جاب” على محمد عبدالرحمن فقد رد عليه الغربال عمليا في الملعب. الهلال وجه رسالة قوية الأن وانذار كل الفرق والشىء الوحيد الذي يمكن يعرقل مسيرة الهلال في طريقه نحو اللقب هو “اللعب خارج الملعب”. الف مبروك استاذ عبدالعزيز مجددا. لنا الحق أن نفرح فالهلال يزدان كل يوم ويزداد ألقا وجمالا , وكية للمابينا.