كل تاجر زاد سعر (سلعتو) ما عدا مازدا !!
بالعربي الكسيح
محمد الطيب الأمين
كل تاجر زاد سعر (سلعتو) ما عدا مازدا !!
* الأسوأ من رفع الأسعار هو الإستغلال في بيع السلع..
* هنالك إستغلال بشع جداً حدث خلال الفترة الأخيرة ..
* إستغلال وشبهات ربا وقع فيها بعض من التجار ربما عن قصد وربما دون قصد ..
* بيع البضاعة القديمة بالأسعار الجديدة هو أبشع أنواع الإستغلال ..
* زيادة الأسعار شملت كل شئ في السودان ..
* الرغيف ، البصل ، السكر ، البارد ، القهوة ، الزنك ، الدكوة ، الملابس ، العجور ، المُوس ، الإبريق ، لبن البدرة ، الدواء ، العربيات ، السيخ ، البطاطس ، وكل شئ ..
* زيادة الأسعار لم يسلم منها حتى (سم الفأر) ..
* سم الفأر بقي بالشئ الفلاني ..
* ولذلك (الفأر) في بيوتنا أصبح (يمد لنا لسانه) وهو يعلم أن (عيوننا بصيرة وأيادينا قصيرة) ..
* حتى (الفأر) يعلم إننا لن نتمكن من شراء (السم) ولذلك هو يطلع من المطبخ ويدخل الدولاب في حرية وحركة منسابة وسلسة جداً..
* المهم ..
* وسط كل هذه الزيادات الكبيرة والمبالغ فيها هنالك (سلعتين) اثنتين لم يزد سعرهما ..
* السلعتين هما : (الملح) و(مازدا) ..
* (كيس الملح) سعرو ما زاد لكن نقصو حجمو ..
* ومازدا ما زاد سعر (الهزيمة) ولكنه حافظ عليها ..
* ولذلك نحن في غاية السعادة أن نجد (سعلة ثابتة) في هذا التوقيت الصعب ..
* نحن سعداء بما حققه مازدا وهو يحافظ على (ماركته المحببة) في زمن زاد فيه كل شئ ..
* حتى (الضل) زاد ..
* زمان تقيف بتشوف (ضلك قدرك) ..
* هسه تقيف بتشوف (ضلك) أطول منك بمراحل ..
* الآن علينا أن لا ننظر للنصف الفارغ من كوب هزيمة المريخ بالأمس ..
* نصف الكوب الفارغ هو أن نتحدث عن الخسارة ..
* علينا أن ننظر للنصف المليان من الكوب في هذه الخسارة ..
* النصف المليان هو محافظة مازدا على هذه (الماركة) ..
* دي حاجة كويسة جدا ..
* علينا أن نتحدث عن هذه الإيجابية الكبيرة التي حققها المريخ بالأمس ..
* كونو بعد الحالة دي كلها يجي زول يحافظ على (سلعتو) قطع شك ده زول ما ساهل ..
* التحية لمازدا هذا (الرجل الوفي) الذي لم يخن (تلاتته) كما أن (التلاتة) لم تخنه ..
* لا مازدا خان التلاتة ولا التلاتة خانت مازدا ..
* وحقيقة أكتر حاجة بتزعل وبتبكي هي أن الفريق البتسواني (ما عندو علاقة بالكرة) ..
* لما تخسر بالتلاتة أو بالسبعة أمام فريق بيلعب كورة (ما فيها مشكلة) ..
* عادي.. المريخ ده قبل كده خسر بالسبعة أمام فريق الوحدات الأردني وما أدراك ما شلباية ..
* خسر بالسبعة ونحن لم نتوقف كثيراً عند تلك السبعة لأن الوحدات في النهاية لعب كورة ..
* لكن تخسر بالتلاتة أمام فريق ما عندو علاقة بالكورة ؟؟ دي كارثة ..
* كل لعيبة المريخ الشاركوا أمبارح ديل يفترض يشوفوا ليهم شغلانية تانية غير الكورة ..
* واضح إنو ما عندهم قسمة مع القصة دي ..
* كل لاعب مريخي شارك بالامس مطالب بأن يفتش نفسه عسى ولعل أن يجد موهبة أخرى بخلاف كرة القدم ..
* وأنا والله قدر ما حاولت أعرف مازدا لاعب كيف ولا بياتو تنظيم ما عرفت ..
* مرة جاني إحساس إنو مازدا لاعب بتنظيم (2-1-3-1-0-4) ..
* ومرة جاني إحساس إنو لاعب بتنيظم (4-00- 3-0-4) ..
* لا بتعرفو مدافع ولا بتعرفو مهاجم ..
* ولا بتحس يوم بجراحي ولا بتقول (آه) من نواحي ..
* حداشر لاعب فكاهم في النجيلة وقال ليهم ألعبوا ..
* لا ظهر معسكر محلي ولا معسكر أديس ..
* كلو عند العرب صابون ..
* والمريخ طار قبل ما يبدأ وهو أصلاً زبون ..
* وغايتو السنة دي بالذات يا متنا من الضحك ويا كمان الضحك كتلنا ..
* المهم ..
* اليوم يبدأ كبير البلد الهلال رحلة البحث عن الأميرة السمراء ..
* ومشوار الميل ببدأ بالخطوة ..
* نخلص من مباراة الذهاب ثم نفكر في مباراة الأياب، ونمضي مع أحلامنا مرحلة مرحلة ..
* والهلال الذي عانى من (نقص) في إعداده لن يجد خياراً أفضل من تحقيق الفوز اليوم وذلك لدواعي تتعلق بـ(الكبير كبير) ..
* الكبير لا يهاب اللقاءات الصغيرة سواء أن كانت داخل الأرض أو خارجها ..
* بالأمس الفريق البتسواني لما عرف إن المريخ على (النعسان) تعامل مع المريخ بإعتباره نادي صغير ..
* ومجريات اللقاء أثبتت أن المريخ صغير جداً وهو يظهر بذلك الشكل الشاحب ..
* اليوم بطل ليبيريا يدخل اللقاء وهو يعلم حجم الهلال ومكانته الكبيرة ..
* والهلال مطالب بأن يثبت ذلك داخل أرض الملعب ومنذ الربع ساعة الأولى ..
* شخصية الهلال لو ظهرت في الربع ساعة الأولى نستطيع أن نحسم التأهل من ليبيريا بإذن الله ..
* التركيز واللعب القوي والقتال يجب أن يكون شعار الهلال ..
* الهلال يجب أن يواكب موضة الزيادات ..
* كل حاجة في البلد زادت ولذلك نتمنى أن يزيد الهلال (حلا وإنتصارات) ..
* ناس المريخ (كبرو وكبرت أحزانهم) ونحن بإذن الله (سنكبر ونزيد حلا) ..
* بمناسبة حلا ..
* عندي إقتراح صغير جداً ..
* بقترح إنو ناس المريخ يلعبوا مباراة الأياب في بتسوانا ..
* ألعبها هناك تطبيقاً لمقولة (الشر بره وبعيد) ..
* بعيد بـ(الناء) ؟؟
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (بتسوانية) وأصلو الزول بيموت والذكرى تفضل حية ..
* و..و..
* وانا في شخصك بحترم …. مازدا و(البلابل) كذلك ..
