للمريخاب فقط.. بالدارجي
للمريخاب فقط.. بالدارجي
أبوعاقله أماسا
* أي زول حايجي يتولى رئاسة نادي المريخ حايطلعوه فاشل.. موش عشان هو نفسو فاشل.. بس عشان كل المريخاب ما محددين رؤيتهم شنو لإدارة ناديهم… أي زول عندو حاجة في راسو مختلفة من الناس… وعشان دائماً بفكروا في الشخصية والمواصفات الخيالية.. طيب.. حنين وعاطفي.. لبسو كده… كلامو سمح.. عندو وجنات.. ليه لابس سماوي؟.. ليه لابس برموده؟.. الجلابيه ماسمحه.. حاجات كده فارغه ساي..!!، ما بنفكر في المؤسسة ذاتها بتتبني كيف ويديروها كيف؟.. وما جادين في طرح القضايا الهادفه..!!
* تنتقد سلوك إداري ينطوا ليك ألف نفر بدافعوا عن الشخص في روحو.. تقول: في أخطاء في العمل الإداري.. يقولوا ليك: فلان ده زول محترم وود ناس (ودفيع)..!!، ودي ما بتحصل في العالم إلا عندنا في المريخ..!!
* في المريخ.. فجأة تلقى الناس كلهم يمتدحوا في زول معين السبب شنو مابتعرف، وفجأة برضو كلهم تلقاهم واقعين شتيمة في زول.. الموضوع المهم والمختصر المفيد شنو؟.. مابتلقى إجابة..!
* دائماً تلقى الناس في حالة إصطفاف وتصنيف.. مدافعين ومهاجمين.. لعيبة وسط مافي.. ناس يهاجموا في الرئيس وناس يدافعوا.. لكن لو وضعنا القصة في إطار (الصاح والغلط) الناس كلها حاتسكت..!
* يتهموا المساكين بي إنهم بتاعين مصالح.. والقطط السمان لابده في الركن وزول بتكلم عنها مافي.. وأي زول تلقاه شغال شتيمة وإشانة في مجتمع النادي تلقاهو عندو دور بطريقة أو بأخرى في كل الكوارث الحاصلة..!!
* في ظروف زي دي لازم أي حاجة تكون ما مظبوطة وما في محلها.. عشان كده ضروري نتفق على الحد الأدنى من المطلوبات في رؤية إدارة نادي المريخ وبرنامج الخروج والإنعتاق من الأزمات قبل ما نفكر في الزول الحايبقى رئيس.. والمطلوب منو بالضبط شنو؟، لأنو الأسلوب الماشي ده منفر شديد وما ممكن كل مرة تجيبوا رئيس يدفع ويدفع وبدون مقدمات تقعوا فيهو شتيمة وتمشوهو وتفتشوا غيرو..!!
الاخ ابو عاقله اماسا لك مني كل تقدير ومحبه واحب كتابتك جدا ٠٠٠٠٠ بس ما معاك في النقطه دي بالذات لانو ليس كل المريخاب ينتقدون مجلس المريخ لان معظم الادارين وليس كلهم جاين يا اما تعين دوله او تعين مصلحه ووجاها ٠٠٠المريخ في السنين الفاتت لا قا ما لاقا من متاعب ليس داخل السودان فحسب بل خارجه ٠٠٠٠اىموضوع طويل لكن بمختصر مفيد علت المريخ في الاتي ٠٠اولا الهلالاب ٩٠ في الميه منهم يكرهو المريخ اكثر من حبهم للهلال ٢ الاعلام المريخي المندس ل مصالحه وهو يبدد اجتماعات اىمريخ واي كلام ينقال من اجل حفنة جنيهات معدوده ٣ استهتار بعض الادارين وجزء من ناس الاتحاد العام لا يرو ابدا شيء جميلا للمريخ من مؤتمر وطني ٠٠٠ كيزان ٠٠٠ جنجويد ٠٠كلهم جاريييييين زي الكلاب ل مصالحهم ٠٠٠٠ ولك جزيل الشكر ٠٠٠٠اخيرا اي اداره تجي المريخ لا تراعي ضميرها لانهم ليس مريخااااااااب لو ٠٠٠١٤ اداري عملو بضميرهم واخلصو في شغلهم لكان المريخ وصل العالميه في كل شيء ٠٠٠٠٠