ليس محمد موسى ومنجد النيل وحدهما الجاكومي وكابو ايضا (معلقين) في السيستم

صابنها
محمد عبد الماجد
ليس محمد موسى ومنجد النيل وحدهما الجاكومي وكابو ايضا (معلقين) في السيستم

• قائمة المبعدين عن كشف المريخ الرسمي ضمت كل من (منجد النيل، أمير كمال، راموس، طبنجة، محمد المصطفى “الجناح”، محمد موسى الضي، بكري المدينة، زرقه والليبيري أوتو.) وهذا تأكيد رسمي على ان المريخ كان يلعب (مؤجلاته) بكشف يتواجد فيه (41) لاعبا.
• على عينك يا تاجر.
• غير صبري محمد فضل ورجال الخطوط.
• طبعا ما قدمه رجال الخطوط للمريخ ….جمال الوالي ود الياس ما قدموه.
• في المريخ (41) لاعبا ومجلسين ولجنة (متعصب) عبدالسلام.
• هؤلاء اللاعبون الذين تم الاستغناء عنهم كانوا يشاركون مع المريخ لأخر لحظة .. شارك طبنجة ومحمد المصطفى امام كوبر قبل مباراة القمة الاخيرة.
• عادي.
• بل ان المشطوب اتو سجل في مباراة المريخ وكوبر.
• ديك المسلمية يعوعي وبصلتو في النار.
• هل يمكن ان يصل الفساد باتحاد معتصم عبدالسلام الى هذه الدرجة التى يلعب فيها المريخ بكشف يضم (41) لاعبا.
• الكلام دا غير ناس صبري محمد فضل.
• تعبتوا معانا.
• المريخ اطلق على الذين تم الاستغناء عنهم حتى لا يمنحهم حريتهم وحقوقهم المالية مقولة (معلقين) في السيستم.
• معلقين في السيستم في السخانة دي؟
• دي سخانة يعلقوا فيها لاعب في السيستم.
• بكري المدينة بعد هذا العمر اصبح (معلق في السيستم).
• اشرب.
• نحن ما رضيناها ليك يا بكري المدينة.
• خلاص كملت.
• الحكاية خلصت.
• وانتهت الحدوتة.
• محمد موسي الضي الذي تحدثوا بفرح كبير عنه وقالوا عندما سجله المريخ انه (خبطة) التسجيلات وان المريخ يوجه ضربة موجعة للهلال.
• وين محمد موسي؟
• معلق في السيستم.
• محمد موسى الضي لم نشاهده مشاركا في مباريات المريخ إلّا بعد الدقيقة 90.
• اظنه سجل هدف في ملعب جبل اولياء واكتفى بذلك.
• وتاني لا حس ولا خبر.
• محمد موسى (معلق) في السيستم.
• تستاهل يا محمد موسى الذي كان جمهور الهلال يهتف له : الضي الكي.
• محمد موسى في الهلال سجل في مرمى المريخ في قمة ابوظبي وسجل في النجم التونسي وسجل في انيمبا.
• سجل محمد موسى الضي مع الهلال اهداف حاسمة وفي مباريات كبيرة واكتفى بالتسجيل في هلال الساحل او في الخرطوم الوطني على ما اعتقد عندما انتقل للمريخ.
• وفي النهاية علقوه في السيستم.
• عليقة عدوك.
• بكري المدينة كانت نهايته او اخر مشاركاته المحلية (المشهودة) في قمة الدوري الممتاز في الموسم الماضي عندما خرج مطرودا بعد التفوه بعبارات عنصرية (بغيضة).
• نهاية مؤسفة.
• تاني ما شفناه إلّا معلق في السيستم.
• محمد مختار بشه طبعا لا في العير ولا في النفير.
• بشه قاعد ساكت.
• فريق المريخ الآن في مرحلة (تعليق) جماعي.
• الفريق كله (معلق) في السيستم.
• الامر ليس حصريا على محمد موسى الضي وبكري المدينة ومنجد النيل ومحمد مصطفى وبقية الاسماء.
• محمد سيد احمد الجاكومي ايضا (معلق) في السيستم…وكذلك هيثم كابو وبقية مجلس (حديقة الموردة).
• كابو بلسانه الطويل معلق في السيستم.
• الفيفا وكاس لم تعترف بهذا المجلس وينتظر ان يصدر القرار النهائي في يونيو القادم ليؤكد شرعية مجلس ادم سوداكال.
• يعني حازم مصطفى ذاتو (معلق) في السيستم.
• يا ريت الموضوع لو وقف عند محمد موسي الضي وهيثم كابو.
• مجلس المريخ غير معترف به.
• والاتحاد السوداني في انتظار قرار من كاس.
• وممكن تظهر على السطح في أي لحظة لجنة تطبيع لنادي المريخ.
• الزول الفرحان بحكاية (الرئيس المناوب) دا كلموه ..قولوا ليه اتقل شوية ..انت نائب رئيس (معلق) في السيستم ..ما تقعد تشاكل وتتفاصح ساكت.
• انت ما في زول معترف بيك.
• خليك مع الدعم السريع احسن ليك.
• كفاية ما فعلته في الحرية والتغيير.
• محمد سيد احمد الجاكومي الفرحان بالمناصب عمل ليه تهنئة لرئيس دولة الامارات محمد بن زايد آل نهيان بمناسبة تنصيبه من قبل المجلس الاعلي للاتحاد رئيسا لدولة الامارات العربية المتحدة خلفا للمغفور له الشيخ خليفة بن زايد آل النهيان.
• عاوز يلحق المولد.
• تتخيلوا الجاكومي عمل شنو في هذه التهنئة؟
• الجاكومي ما خلي ليه (منصب) ما مر به لم يذكره في التهنئة …اي (كرسي) مر بيه الجاكومي ادخلوا في صيغة التهنئة.
• معقولة بس يا الجاكومي.
• انت الشخص الذي قمت بتهيئته رئيسا لدولة الامارات لم تقف في مناصبه بهذا الشكل.
• الزول دا بعرض في نفسو.
• الجاكومي فرحان بهذه المناصب (الهلامية)…المناصب (الشرفية) التى تقال ولا تكتب.
• شوفوا محمد سيد احمد سرالختم قال عن نفسو شنو في التهنئة؟
• شوفوا الزول الفرحان دا دبج نفسه كيف بهذه المناصب؟
• جاء في التهنئة تعريفا لمحمد سيد احمد الجاكومي (رئيس مسار وكيان الشمال ، المنسق العام للجبهة الثورية ، عضو المجلس الرئاسي للحرية والتغيير ، مقرر المجلس القيادي لقوى نداء السودان ، عضو المجلس الاعلي للسلام ، عضو اللجنة الوطنية لسلام السودان (جوبا) ، النائب الاول لرئيس مجلس ادارة نادي المريخ.
• يا زول انت خليت شنو لي الشيخ محمد بن زايد آل نهيان رئيس دولة الامارات؟
• سبع مناصب (هلامية) ذكرها الجاكومي عن نفسه.
• الجاكومي ما فاضل ليه إلّا يقول انه كاس الفة سنة رابعة ..ورئيس اللجنة الشعبية وصاحب جمال الوالي وابن عم معتصم جعفر.
• يا زول ما كدا.
• اتقل شوية.
• الجاكومي ما فاضل ليه إلّا يقول عن نفسه ورئيس دولة الامارات.
• الطريف ان كل هذه المناصب مناصب (ورقية) ولا قيمة لها وهي مناصب (انشائية) ساكت…حتى منصب نائب رئيس مجلس المريخ منصب (معلق) وغير معتمد من الفيفا حتى الآن.
• في داعي للانبهال دا؟
• انت عاوز تمشي وين؟
• في داعي لكل هذا الفرح والاستعراض بهذه المناصب (الكرتونية).
• مناصب اثرها لا يتجاوز حد الشهادات التقديرية.
• ما في منصب في تلك المناصب (مهني) او تم الوصول اليه عبر الخبرات والأكاديميات .
• كل هذه المناصب مناصب (مجاملات) وعلاقات عامة.
• انت يا الجاكومي عاوز تضحك على منو؟
• بتغش في منو؟
• عاوز تضحك كمان على رئيس الامارات زي ما ضحكت على رئيس السودان.
• خليك مع الدعم السريع.
• قدراتك لا يمكن ان تتعدي ذلك.
• حدك صيانة استاد المريخ.
• ما اكتر من كدا.
• انت زول (معلق) في السيستم.
• انت وأخوك هيثم كابو.
• الاتنين لسانكم اطول من شارع العرضة.
متاريس
• يجب على الهلال ان يركز في القادم.
• الدوري يا هلال.
• مباراة مهمة للهلال اليوم في الطريق للاحتفاظ باللقب.
• مباراة الهلال اليوم امام الشرطة خطوة جديدة نحو اللقب.
• بالتوفيق ان شاءالله لهلال الملايين.
• روفا مكانه في التشكيلة الاساسية للهلال.
• نتمنى ان يظهر روفا في التشكيل الاساسي للهلال بصورة دائمة ومستمرة.
• عناصر الهلال التى ضمها من اندية الممتاز المدافع احمد يحي ولاعب الارتكاز محمد المنذر ربما يشاركان اليوم مع الهلال.
• الهلال عنده مشكلة في الارتكاز.
• وعنده مشكلة في الطرف اليمين.
• مشكلة الطرف اليمين مرت فترات عديدة للتسجيلات ولم تحل.
• بتعملوا في شنو ما عارف؟
• ان شاءالله التسجيلات القادمة تحلوا هذه المشاكل.
• الموسم الماضي نجحت الشرطة في عرقلة الهلال.
• يجب الانتباه لاهمية المباراة وصعوبتها.
• نتمنى ان لا يبعد الجهاز الفني للهلال كل عناصره الاساسية التى شاركت امام المريخ من مباراة اليوم.
• مباراة اليوم بثلاث نقاط ايضا.
• بالتوفيق للهلال.
• …..
• ترس اخير : زول معلق في السيستم وبتفاصح قدر دا.