لي.. لي.. لي.. ليليبو

صابنها

محمد عبد الملجد

لي.. لي.. لي.. ليليبو

· عهدنا معاكم ان نكتب لكم بصدق وان ننقل لكم احساسنا كما هو من غير رتوش او (وسادة) وتفعيل خدمة (الانتظار).

· لم يسعدني انتصار للهلال في الفترة الاخيرة قدر ذلك لانتصار الذي تأهل به الهلال على حساب سانت جورج الاثيوبي لدور الـ 32 في البطولة الافريقية.

· هنالك مباريات عشنا فيها فرحة هستيرية، بلغنا بها المرحلة التى قال عنها العقاد وتغني بها الكابلي (وبي سكر تملكني…وأعجب كيف بي سُكر)؟ .. وهو التساؤل الذي طرحته ام كلثوم نفسها (هل رأى الحب سكارى..سكارى مثلنا).. لقد سكرنا بذلك الانتصار ..وخرجنا بعد المباراة من استاد الهلال عاوزين نركب مواصلات السوق العربي ركبنا مواصلات الشقلة.. عاوزين نقيف ليقنا نفسنا قاعدين.

· تلفوناتنا وقعت مننا ، رغم اننا اصلا ما شايلنها معانا.

· وقعت كيف ما عارف؟

· نعم نحن كنا في تلك الحالة (تثب الفرحة فيه قبلنا..وضحكنا ضحك طفلين معا..وعدونا فسبقنا ظلنا). كنا كذلك فعلا انقل لكم احساس حقيقي.

· ضحكنا لمن نهر النيل بقي يفيض (شربات).

· الشاي يكبوه ليك (سادة) يصلك بي (لبن).

· تضرب تلفون .. رصيدك يزيد ما ينقص.

· تضرب لي ناس البيت .. ما يقولوا ليك جيب معاك (لبن).

· دي حاجة جربتها في ليلة انتصار الهلال على سانت جورج.

· نسيت اسمي .. طلعت البطاقة من الجيب عشان (اشف) الاسم لقيت البطاقة الفي جيبي (بطاقة السكر).. ناس جارجو قلبوها (سكر).

· ما عارف الحصل شنو؟

· قلت اضرب تلفون للجريدة اعتذر عن الكتابة – فما نحن فيه احساس (مشجع) عادي لا يريد ان يفسده بإحساس (الصحفي).. لقيت نفسي برسل في العمود.

· اتكتب من متين؟

· قلت شنو؟

· ما عارف.

· ما تسألوني.

· ما تقيفوا لي في أي حاجة.

· قلت ليكم من البداية (وبي سكر تملكني…وأعجب كيف بي سُكر).. رأسي تقيل وبلف كمان!! والزول البقيف جنبي يقول يشم ليه (ريحة) فيني يقوم يشم ريحة الدقيقة 85.

· هي الدقيقة (85) عندها ريحة ؟.. عليكم الله ما تسألوني مع ناس ليليبو ديل أي حاجة جائزة.

· مباراة الهلال وسانت جورج زي الزول المشي يخطب .. قاموا عقدوا ليه.

· جاء مبسوط لي هنا.

· بدفق فرح.

· وبفتح القلب خمسة ضلف.

· طلعت من استاد الهلال من الجهة الشرقية .. لقيت نفسي بدخل تاني من الجهة الغربية.

· اكون عاوز اطلع .. ادخل.

· يا جماعة دي شنو (الشبكة) الوقعنا فيها دي؟

· قدر ما احاول اطلع من الاستاد بقلى نفسي جوة الاستاد .. قلت ليكم (هل رأى الحب سكارى..سكارى مثلنا).. قعدتوا تغالطوا فينا.

· طلبت قهوة يمكن الفرحة دي تفك شوية .. لقيت نفسي بشرب في (الشاي).. قلت ليهم يا جماعة انا موش طلبت قهوة .. قالوا لي القهوة شربتها في الدقيقة (85).

· انت نسيت.

· قلت الليلة انا مالي؟

· اصلو انا ما طبيعي.

· ليليبو.

· زول في الدقيقة (85) يشيل الكورة ويمشي على منطقة الجزاء ويضعها والاستاد فيه اكثر من (40) الف مشجع… والكورة قدر ما شاتوها في القون ما دخلت.

· والدقيقة 85.

· في زول في الوقت دا بنفذ ليه (ضربة جزاء).

· ضربة الجزاء في الوقت دا لو معاها (قطر) ما بمشي عليها.

· لي .. لي .. لي … ليليبو.

· الساعة كم ؟

· ما عارف.

· بقولوا الساعة تسعة إلّا تلت (ليلا)… لكن في استاد الهلال كانت تسعة إلا تلت (ليليبو).

· ساعة الهدف.

· الاولتراس عقدوا.

· عقدوا عديل.

· خلاص الموضوع خلص.

· لي .. لي .. لي ليليبو.

· ساعتي انا في نفس التوقيت كانت عاملة تسعة إلّا تلت صباحا… في نص الليل داك.

· الفرحة تشيل فيني وتودي.

· استاد الهلال كان (مشرق) .. جمهور الهلال كان (منور).

· لم اشاهد جمهور الهلال بهذه الروعة من قبل.

· تشجيع .. ونظام وحضور وحب .. واولتراس.

· القون جابو منو؟

· القون كتب الحكم في تقريرو جابو (الاولتراس) ما (ليليبو).

· قعدنا نتغالط في الحتة دي ساعة ونص.

· كان ليليبو وكان اولتراس .. عندنا ما فارقة.

· الاتنين واحد.

· انا ما عشت فرحة على هذا النحو.. (تثب الفرحة فيه قبلنا..وضحكنا ضحك طفلين معا.. وعدونا فسبقنا ظلنا).

· شفتوا ليكم زول بيسق ظلو.

· دا ياسر مويس.

· نحن الهلالاب عشنا فرحة مبالغ فيها بعد انتصار الهلال على ناساروا بثلاثية والتأهل بالضربات الترجيحية.

· فرحة بالجردل الكبير.

· وعشنا فرحة مبالغ فيها يوم تأهل الهلال لمرحلة المجموعات بعد هدف امبيلي في اول اغسطس من تمريرة هيثم مصطفى (الحلزونية).. توقيت الهدف في شباك اول اغسطس الانغولي كان نفس توقيت الهدف في شباك سانت جورج.

· الفرحة داك قفلت الشارع.

· الخرطوم كلها كانت برة.

· ام درمان تجري في الطرقات متل (الشافعة).

· وفرحنا .. فرحة بي (قفتها) يوم انتصرنا على الاهلي المصري بثلاثية.

· ضربنا ليكم الاهلي متل (الكوارع).

· الآن اضع فرحة الانتصار على سانت جورج بهدف ليليبو مع هذه الفرحات.

· رص الباكات رص.

· الليلة شنو؟

· الليلة ليليبو.

· عجائب الهلال وانجازاته دائما تصنع بمثل هذه الفرحات.

· وقت نتجاوز مباراة بهذه التفاصيل وتلك الفرحة دائما يحدث شيء ما.

· دائما بكون الهلال عندو كلام تاني.

· في حاجة ماشي عليكم.

· الاقدار بترتب ليكم لإحداث سعيدة.

· انا الليلة والله العظيم كنت ناوي اكتب عن الامين جارجو .. لكن لقيت نفسي بكتب عن (ليليبو)… (وبي سكر تملكني…وأعجب كيف بي سُكر).

· جماهير الهلال كانت بتهتف سا سا سا سادومبا … وهي من غير شك سوف تهتف في المباريات القادمة لي لي لي ليليبو.

· نفس النغمة.

· نفس الحركة.

· نفص الرقصة.

· جابوا لي في الفطور (عدس).. ضربتو ليك عادي بي احساس (السمك).

· المشكلة ما في الاحساس .. المشكلة في (الشوكة) الخنقتني.

· كمان العدس عمل ليه (شوك).

· مشيت اغسل ايدي … لقيت ايدي ريحتها سمك سمك.

· كمان العدس جاب ليه ريحة سمك.

· قلت ليكم (وبي سكر تملكني…وأعجب كيف بي سُكر).

· غايتو العمود البتقرأوا فيه دا لو بكرة ما قريتو .. اعرفوا طوالي اني رسلت العمود لناس الارصاد الجوي بدل ما ارسلو للجريدة.

· ناس الارصاد الجوي علاقتهم شنو بالموضوع؟

· ذنبهم شنو؟

· ناس المريخ قالوا (المغصة) عاوزة تشرطهم.

· زارف مصطفى قالوا تاني (زرف الدموع) بعد تأهل الهلال.

· قلنا ليهم ليه؟

· وعشان شنو؟

· قالوا عشان المريخ غلط بدل ما يعمل (توأمة) مع (الحكم) الصومالي مع توأمة مع (سانت جورج) الاثيوبي.

· دي مشكلتكم.

· غلطتكم.

· لن زارف مصطفى قالوا ليك بعد هدف ليليبو زرف جنس دموع.

· الزول دا ح يعملها ليهم كلها (زرف دموع).

· بي طرقيتكم.

· ……………

متاريس

· لسه الوعد بينا قائم .. جارجو عندو عمود براهو.

· الزول دا لغاية الآن ما عارف ابدأ ليه من وين؟

· غايتو امس في مدافعين في سانت جورج لو جابوا ليهم (سد النهضة) قدامهم ما بمشوا عليه.

· جارجو طرشهم سد النهضة لتر لتر.

· قطرة قطرة.

· الغربال قدم مباراة العمر.

· نجم المباراة كان ياسر مزمل.

· ما تقولوا لي ياسر ما شارك في المباراة عشان قلت ليكم من البداية (وبي سكر تملكني…وأعجب كيف بي سُكر).

· موضوع (التلفزة) برجع ليه لو في وقت… عندنا كلام مهم عن هذا الموضوع .. الناس ما تقعد تتكلم ساكت.

· ما خفي كان اعظم.

· المهم هو تأهل الهلال وقد تأهل الهلال.

· مباراة الهلال امام الشباب التنزاني عاوزة اعداد خاص… وبرضو ممكن تكون بدون تلفزة .. اذا كان التأهل يحتاج لمثل هذا الحضور والدعم.

· انتهينا من الجهاد الاصغر وداخلين على الجهاد الاكبر.

· التأهل على حساب الشباب يعني ان الهلال قادر ان شاءالله يحقق البطولة هذا العام.

· تجاوز سانت جورج .. وتجاوز الشباب من بعده يعني ان ابواب اللقب اصبحت فتوحة للهلال.

· المباراة القادمة صعبة.

· ومن هسع عاوزين شغل.

· ونمشي نحو اللقب مباراة مباراة.

· خطوة خطوة.

· اندهشت من الذين قالوا ان الهلال لم يقدم مباراة جيدة امام سانت جورج.

· المباراة كانت رائعة.

· والدليل على ذلك ان الجمهور ظل يشجع طول زمن المباراة.

· ما في جمهور بشجع بدون ما يكون هناك اداء مقنع ورائع من الفريق.

· كما ان التسجيل في الدقيقة 85 يعني ان الهلال لعب مباراة وشكل ضغط دائم على الفريق الاثيوبي.

· سانت جورج استفاد من المريخ في فترة الاعداد .. وبصمة المريخ في سانت جورج ظهرت.

· سانت جورج عمل نفس حركات المريخ.

· وفي النهاية طلعوا من التمهيدي زي طلوع المريخ في السنوات السابقة.

· ….

· ترس اخير : و(هل رأى الحب سكارى..سكارى مثلنا).