مات إثر عِلة امهلته وما قصرت !!

قزاز ورذاذ
محمد الطيب الأمين
مات إثر عِلة امهلته وما قصرت !!

* الفرق بين سنة (٢٠٢١) و(٢٠٢٢) و(٢٠١٩) هو نفس الفرق بين قميصي المُخطط (الشالتو المكوة) وقميصي السادة الذي (بهت من الشمس) ، وجلابيتي التي لا تستحمل (اللبس مرتين) . * الأعوام عندنا تتبدل مثل (ملابس البيت) .
* لا الملابس مظبوطة على أجسامنا ولا نحن مظبوطين على ملابسنا .
* نلبس (٢٠١٩) ثم نخلعها ونلبس (٢٠٢٠) ونخلعها .
* هي (أرقام) مثلها ومثل (الهُدوم) .
* هُدوم البيت التي لا تصلح للمرقة.
* دم ودموع .. جوع ومرض .. سوء تعليم وضيق أخلاق ..
* جشع واستغلال.
* وطن طالت إقامته في (العناية والإنعاش) بينما الساسة والعسكر يريدون (الورثة) قبل موته .
* يبيعون الوطن وخيراته ويقتلون رأس المال (البشر) .
* مِسخت عليّ الدنيا وتلك المرأة تسألني : عليك الله يا ولدي ما بتعرف ليك (سيد مطعم) ؟
* قلت ليها بعرف وفي الحقيقة أنا ما بعرف .
* قالت لي : كلمو لي يدينا باقي الأكل.
* ما كنت عارف وياريتني كنت عارف.
* وبعد عِرفت .. لا الطيبة نفعت ولا دمعتي .
* وهي دعوة لكل الأصدقاء (العارف ليهو سيد مطعم يكلمو لهذا المرأة).
* ابقى لينا (واسطة) عشان (أم هؤلاء الأطفال) تأكل باقي أكل المطعم.
* والعنوان بطرفنا.
* فنحن الآن نشارك الكلاب والكدايس (قمامة المطاعم البلدية ونصف الفاخرة) .
* الزواج ليس من أحلامنا ولأ العمارات السوامق ولأ العربيات المكيفة ولأ (التحلية) البتجي في صينية قدر صينية الوجبة.
* طالما (الحليب) حلم طفل ظل يشكو والدته للجيران بسبب (الشاي الأحمر) الذي أرهق معدته عند كل صباح.
* طالما (الأم) بتلقط (شيلة) إبنها الصباح من سوق ليبيا وبعد المغرب بجيبوهو ليها (ميت) بطلقة في الرأس.
* الأحلام عندنا هي أحلام وطن مسحور مسروق مشلول.
* وطن لا (عاقل) فيه ، كل الذين عرفوا قدر الوطن ماتوا ، وبقينا نحن لا قدر لنا وننتظر الناعي ليقول : (كان سلة غذاء العالم ومات إثر علة امهلته طوييييييلا) .
* و… و…
* والله في.