مباراة عاوزة ليها (صبر) وقلاب (بندول)

صابنها

محمد عبد الماجد

مباراة عاوزة ليها (صبر) وقلاب (بندول)

· طبعا حكاية ملعب نادي (الاسرة) ، وحجمه وعدم قدرة الهلال على اللعب فيه – كلام ما فيه أي منطق…ولا عندو اساس من الصحة.

· انتوا عارفين المباراة دي مفروض كان تلعب وين؟.

· مفروض كان تلعب في ملعب (النقعة).

· يعني احمدوا الله على ملعب (الاسرة).

· الظروف جابت ليكم المباراة للخرطوم وبرضو ما قادرين تحققوا الانتصار.

· عاوزين اكتر من كدا شنو؟.

· في المواسم السابقة عندما كان يتعثر الهلال في الفاشر كانوا بقولوا لينا (النقعة).

· هسع في قلب الخرطوم بقوا يقولوا لينا ملعب (الاسرة).

· البيشوف الهلال يشكو من (الملاعب) يفتكر الهلال بيلعب في الكامب نو او في سانتياغو برنابيو او في ملعب الامارات.

· انتوا عاوزين تلعبوا وين؟.

· في حديقة (الامراء) عشان تحققوا الانتصار.

· ألعبوا كورتكم بس …واتركوا هذه الاعذار.

· البشوف الهلال يشكو من الملاعب ما يشوف ملعب استاد الهلال بقى كيف؟.

· حالة نجيلة الهلال تغني عن السؤال.

· ملعب الاسرة بالنسبة لملعب الهلال يعتبر ملعب (برج العرب).

· يا جماعة العالم اتجاوز حكاية الشكوى من ارضية الملاعب.

· الكلام دا كان زمان – ما في فريق قوي في الزمن دا بيشكو من ارضية الملعب.

· تلعبوا في أي ملعب…انتوا عندما تعاقد معكم الهلال لم تشترطوا ملاعب معينة عشان تحققوا الفوز في المباراة.

· ناس الهلال بقوا عاوزين ليهم ملعب معين وارضية خاصة وحكم عادل و(فار) وخصم على قدرو عشان يحققوا الانتصار.

· عاوزين درجة حرارة محددة…وزمن خاص عشان تفوزوا لينا.

· الحاجة التانية – انا ما عارف الفلسفة شنو عندما يكون الهلال مغلوب او متعادل ومحتاج للانتصار والزمن كل لاعبي الهلال بيرجعوا الكورة الى الخلف.

· انتوا عاوزين تغلبوا كيف؟…والمباراة كلها بترجعوا الكورة لي يونس الطيب.

· ما معقول اكتر لاعب ظاهر في الهلال يبقى يونس الطيب.

· الكلام دا في حق الهلال ما كويس.

· ارجاع الكورة للوراء طريقة (عقيمة) اذا لم تتخلصوا منها لن تحققوا البطولات.

· الفاتح النقر وضع تشكيلة غريبة …واجلس افضل عناصره في الكنبة.

· الفاتح النقر هو ذاتو كارثة.

· الفاتح النقر ممكن ينجح في الخرطوم الوطني في الاهلي شندي – لكن في الهلال لا.

· الفاتح النقر عاوز يتخندق وهو مغلوب.

· الفاتح النقر وهو في الهلال عاوز يخندق.

· كلموا لفاتح النقر قولوا ليه الهلال ما فريق بتاع (خندقة).

· عارفين فارس عبدالله وسمؤال موقوفين …ناس نزار حامد واسكندر وجمال سالم لماذا لم يشركهم الفاتح النقر من بداية المباراة.

· المباراة الماضية اكدت ان يونس الطيب بعيد وغير جاهز ..كان من المفترض ان يشارك جمال سالم في مباراة الامس.

· جمال سالم بمنح لاعبيه (الثقة)..وبرهب الخصم وفوق هذا جمال سالم الهجمة من عنده تببدأ صاح.

· الفاتح النقر مركز مع الصحفيين اكثر من تركيزه في فريقه – عليكم الله هسع لو سألنا الفاتح النقر وقلنا ليه مؤمن عصام دا ظهر فجأة كدا من وين؟.

· ح يقول شنو؟.

· مؤمن عصام كان اخطر على مرمى الهلال من سيف الدمازين …في كورة اتقطعت من مؤمن عصام وقفت قلوب الهلالاب … متل كورة يونس الطيب في مباراة الهلال والاهلي الخرطوم.

· المحترف كاديو اذا ثبت صاح بيلعب غلط …واذا ثبت غلط بطلع صاح …لكن ان يجمع بين الاثنين فهذا المستحيل نفسه.

· كاديو نص هزيمة الهلال.

· عليكم الله ما تقولوا لي كاديو لعب في خانة ما خانتو … وكتر خيرو على ما قدمه…عشان كاديو دا في أي خانة لعب فيها وقف قلوبنا.

· الزول دا لو قعد في (المقصورة) بعمل لينا مشكلة.

· كاديو لاعب بطيء …وقصير القامة ويبدو انه كبير في السن …واي كورة يستملها بيرجعها للخلف.

· الموضوع بتاع كاديو دا ما عاوز ليه محترف.

· أي محترف بيقبض بالدولار مفروض يمشي لي قدام..وما يرجع الكورة للوراء.

· سفاري قدم مستوى افضل من كاديو وافضل من عمار الدمازين الذي لا ندري ماذا يريد ان يفعل.؟..اي كورة مشتركة او تحت سيطرته بيفقدها.

· شلس الذي شطبه الهلال فعل في عمار الدمازين ما يشاء ….والدمازين يمسك ويفك ويعمل مخالفة وبرضو ما قادر يستخلص الكورة.

· نحن ما عارفين نلقاها من مؤمن عصام ولّا عمار الدمازين.

· الشغيل – كان من الافضل له ان يعلن اعتزاله قبل بداية هذا الموسم.

· الشغيل كان يفترض ان يغادر مع بشه وكاريكا – الموضوع ما محتاج لكل هذه (التعقيدات).

· الشغيل كتر خيره – لغاية هنا وكفاية.

· المشكلة ما في الشغيل …المشكلة في الفاتح النقر الذي يصر على بقاء الشغيل كل هذه المدة في الملعب.

· لو اشرك الهلال الشيخ او على كويلا …كان يمكن ان يقدموا مستوى افضل من هذا المستوى الذي يقدمه الشغيل.

· محمد موسى ..يبدو ان زيادة وزنه انستها بصورة نهائية انه كان لاعب كورة.

· الهلال ما بيلعبوا فيه بالطريقة دي.

· الزول دا نسى الكورة في فترة التوقف.

· نسى الكورة مع الكورونا.

· عبدالرؤوف هو الاخر بعيد عن مستواه – ولغاية الآن نحن ما عارفين عبدالرؤوف عاوز يعمل شنو؟.

· وليد الشعلة لو جلس في الكنبة وهو بهذا المستوى خصم على الهلال.

· الكنبة كتيرة عليه.

· الشعلة بمستواه هذا لو قعد في الكنبة خسارة على الهلال.

· موفق صديق (برة الشبكة)..موفق صديق زي (موجة) الاذاعة الطاشة.

· لخبطة …وجري في الفاضي.

· الكورة ما هرجلة.

· الكورة ما فوضى.

· الكورة بقت تخطيط وتكتيك وعقل.

· اطهر الطاهر مفروض يمشي سموحة الليلة قبل بكرة ….حافز تسجيل اطهر في سموحة يفترض ان يدفعه الهلال.

· بشه سجل هدف جميل ووقف على كدا.

· مؤمن عصام اذا شارك او لم يشارك في المباراة واحد.

· مؤمن عصام فائدته للهلال في عدم مشاركته ..وجود مؤمن عصام في تشكيلة الهلال يعني ان تقنع من نتيجة المباراة.

· نزار حامد كان افضل لاعبي الهلال في المباراة السابقة مع ذلك اشركه الفاتح النقر في اخر 13 دقيقة من عمر المباراة.

· مستوى الهلال لا يؤهله للفوز ببطولة الدوري هذا الموسم اذا استمر الوضع على ما هو عليه.

· مشكلة الهلال ليس في انه لا يملك بدلاء – مشكلة الهلال انه لا يملك (اساسيين) من الاساس.

· لا اعرف كيف سوف نصبر على الهلال حتى نهاية هذا الموسم.

· صعب ان نصبر على هذا الفريق حتى قدوم التسجيلات.

· الهلال يحتاج لأكثر من 16 لاعبا في التسجيلات القادمة – أي عدد اقل من هذا الرقم سوف نظل ندور في نفس الساقية.

· فريق عاجز من التسجيل …ولا يوجد فيه لاعب يحدث الفارق ولا تعرف عناصره ان تكسر التكتل من الصعب ان يحقق انتصارا.

· مباريات الهلال بقت عاوزة ليها صبر وقلاب (بندول).

· الواحد ينتظر مباراة الهلال العمر كله – وفي النهاية ما تقدر تكمل المباراة.

· …………

متاريس

· بكرة ان شاءالله نكتب عن الخليفة احمد حسب الرسول بدر رحمة الله عليه.

· ابقوا الى ذلك الحين.

· وكفاية كدا.

· ……

· ترس اخير : الهلال بالشكل داع اوز ليه 12 محترف – غير الجهاز الفني الاجنبي.