* (التلتلة) هي الأخت غير الشقيقة لـ(البشتنة) ..
* وتعريف (التلتلة) في اللغة هو: (أن تذهب من الحاج يوسف إلى أمبدة من أجل تغيير كفر للموبايل وعندما تصل تجد أن المحلية قد أزالت الكشك الخاص بصاحب الموبايلات) ..
* تكون (إتلتلت) ساكت ..
* أما تعريف (التلتلة) إصطلاحاً هو : (وصول اتنين من البرازيل للتوقيع في صفوف المريخ ثم العودة إلي البرازيل بدون توقيع ولا يحزنون) ..
* الثنائي البرازيلي وصل السودان بطلب من المريخ قبل خمسة شهور ففشل (المدفور) في تسجيلهما ..
* الآن الثنائي البرازيلي وصل السودان قبل أسبوع للمرة الثانية وفشل (المدفور) أيضاً في تسجيلهما ..
* أنا والله ما بلوم (المدفور) لكن اللوم كل اللوم على البرازيليين (الهاملين ديل) ..
* زول لو ما هامل ما بباري (المدفور) الزمن ده كلو ..
* والله صحي ..
* يجيبوهم ويرجعوهم ..
* الواحد طلع من بيتو في البرازيل وقال لناس البيت ولخطيبتو أنا ماشي أحترف وألعب كورة في السودان ..
* والأهل يفرحوا ويكلموا القريب والبعيد ..
* ويعملوا (كرامة) على حس إنو (ولدهم) ماشي يحترف ..
* وبعد أسبوعين فجأة يجي راجع ..
* مالك ؟؟ لا توجد إجابة طبعاً ..
* ما في هملة أكتر من كده ..
* الحقيقة أن البباري (المدفور) بوديهو (الخور) ..
* وغايتو جنس غايتو ..
* مشكلة الهلال مع المحترفين الأجانب في عهد الكاردينال هي من المشاكل التى تحتاج لدراسة بالفعل ..
* دراسة يجب أن يقوم بها الكاردينال نفسه ..
* الهلال قبل حلول التسجيلات يتحدث عن محترف معين وأثناء التسجيلات يتحدث عن محترف غير المحترف الذي كان الحديث عنه قبل التسجيلات ..
* وقبل يومين من نهاية التسجيلات يضم الهلال محترف غير المحترف الذي تحدث عنه قبل التسجيلات وغير المحترف الذي تحدث عنه أثناء التسجيلات ..
* وفي الغالب بيكون محترف فاشل ..
* المؤسف إنو الموضوع ده كلو ستة شهور ..
* كل تسجيلات إحنا في الحالة دي ..
* طبعاً مع مراعاة إننا (القوة المالية الضاربة في البلد دي) ..
* حاجة تحير والله ..
* المهم ..
* الخبر هو ليس : (المريخ يشكو الهلال في جمال سالم) ..
* هذا ليس خبراً ..
* الخبر هو : (الكتب الشكوى للمريخ منو) ؟؟
* الزول الكتب الشكوى أهم من (خبر شكوى) ..
* ولذلك أعتقد إنو صحف المريخ يجب أن تحتفى بـ(كاتب الشكوى) لأن (الكتبها) أحق بالاحتفاء حتى من الشكوى نفسها ..
* نادي ما بيعرف يشتكي (محليا) فكيف له أن يشتكي (دولياً) ؟؟
* عموماً .. الشكوى لغير الله مذلة ..
* إذا لم يقم الهلال بتسجيل (سليم عطبرة) في ظل غياب المريخ عن سوق التسجيلات فان هذا يعتبر مجرد مكابرة وعجز ..
* فنياً وإدارياً وجماهيرياً الهلال محتاج لسليم الفنان ..
* وسبب واحد بيخلي سليم عطبرة بره كشف الهلال والطاهر سادومبا جوة كشف الهلال ما في ..
* ما في سبب منطقي في الحتة دي ..
* اللهم إلا تكون مكابرة وعناد من المجلس ..
* سليم فيهو خير للهلال ودخوله الكشف سيمنح الأزرق مزيداً من الألق ويكفي القول: (سليم من مشتقات مهند الطاهر وما أدراك ما مهند الطاهر) ..
* سليم ونزار والثعلب ودراج وبشة الصغير وشيبوب وأبوعاقلة وبشة الكبير والشغيل.. (ديل خط وسطين) وكل وسط فيهم أخطر من التاني ..
* خط وسط بـ(قطع غيارو) ..
* وطالما مدرب الهلال السنغالي من أنصار (المداورة) فان ضالته في هذه المواهب وهذه الزحمة الحميدة ..
* نتمنى أن نشاهد سليم بشعار الهلال ..
* من الأخبار السعيدة أن المريخ أقنع النعسان بالتجديد ..
* إتخيل عليك الله !!
* يعني النعسان كان رافض التجديد والمريخ أقنعو ..
* المريخ أصبح يحتاج لجلسة وجلسة وجلسة من أجل إقناع النعسان بالتجديد ..
* معناها الهلال لو كان (كشكر) للنعسان كان جانا جاري ..
* النعسان لو جاهو مسكول من الهلال ممكن يتصل ..
* كل لعيبة المريخ قاعدين على الهبشة ومنتظرين الهلال ..
* وهذا ليس بسبب فلس المريخ وإنما بسبب (الفوارق) بين الفريقين ..
* لاعب المريخ يعلم أن الهلال ما زي المريخ ..
* وهذا قاله علاء الدين يوسف وبدر الدين قلق قبل فترة ..
* دائماً بتحس إنو لاعب الهلال مقيم ..
* بتحس بهيبة كده ..
* لاعب الهلال ما بتمنى يمشي المريخ إلا بعد الشطب (وهذا نادر) ولكن لاعب المريخ وهو جوة كشف المريخ بتمنى يمشي الهلال ..
* وهذا هو الفرق بين الأصل والصورة ..
* وغياتو الله يكفينا شر (المصدي) اللمعتو الأيام ..
* ونركب صافنات ونجيبة (هلالابية) وأصلو الزول بيموت والذكرى تفضل حية ..
* و..و..
* وبشكيك لرب الكون الفي العيون أبدع ..
