معقولة بيان عشان كاتب مقال!!!!!
تغريده واتساب
بقلم: معاذ ابومؤيد✍
معقولة بيان عشان كاتب مقال!!!!!
معقولة بس مقال من كاتب يحتاج لبيان صحفي وكل هذا الضجيج والمساحات والتعقيب من الزملاء الصحفيين وعاجل وترقبوا وبعد قليل كلها مصطلحات اجتاحت مجتمع المريخ امس
غايتو انا خايف يحصلنا بيان صحفي برضو وكل كتاب المريخ يجيهم بيانات صحفية
المعلومة التي زكرها الزميل الصحفي ماتبرر او تنفى او تأكد ببيان صحفي التبرير والإيضاح من غير مستندات يضعف موقفكم
المعلومة تملك للناس بصور من المستندات والعقودات الابرمت مع شركات الاتصالات
ولاكيف
تحويل الرصيد عبر الشبكات مش من المفترض عنده عقودات موقعة وموضح فيها الليك والعليك طيب بدل بيان نزلوا صور العقود دي واقنعوا الشارع والجماهير شنو بيان انصاص الليالي وبيان صياغتو ذاتها ركيكة ما بترقى لمستوي القضية
والله لم سمعنا انه في بيان قلنا خلاص اتحلت قضية الوك وتم اصدار حكم شيبوب لكن اكتشفنا البيان بين صحفي ومجلس
مش امس قلنا المجلس دا بيودينا لقضايا انصرافية ومواضيع مابتخدم القضية
انا خايف مصعب ودامروالقائمه تطول يعملو ليهم بيان
ليه بيان لمصعب بس انا عندي احساس لو شيبوب رجع مايعاقبوه ويعاقبوا المسكين دا عشان شيبوب لو رجع ممكن يظهرهم بصورة البطل لكن حبيبنا الكاشف مصعب دا عشان اظهر فلسهم للجميع ياحليلو يشيل الطرف الشمال ومعاه يشيل مشاكل المجلس فوق كتفو
خلونا مع البيان احسن
عندكم صور عقود مع شركات الاتصالات نزلوها والكل يطلع عليها ماعندكم مافي داعي للبيان والتصريحات والخ…..
حتي شركات الاتصالات دي ماطرف الصوت وصلهاوهي طرف اساسي في المشكله وعندها دخل مباشر بالقضية
وعمود الصحفي وبيان المجلس اشارصراحة باسمها ولا الشركات سمعتها ما مهمة
طلعوا عقودكم ياناس شركات الاتصالات وابعدوا عنكم الشبهات والقيل والقال
عشان نعرف قروشنا دي ماشه كيف ونادينا الواصلو كم من مبلغ التحويل مش تخلو الناس تشيل وتحول سااااكت لو وعيتوا المشجع دا بقروشو ماكان ارحم من بيانكم
الواحد نفسو يجي يوم ويلاقي مجلسنا الهمام همه الكيان ولملمة الاوراق المبعثرة دي وامس نبهنا انو قضايا الافراد مابتهم الكيان والجماهير
الجماهير دي عايزة حاجه تبرد بطنها لأنه جوف الجماهير محروق
خلونا من الافراد وانتبهوا لما هو آت
وتصريحاتكم الكتيرة دي قللوها لانو شبعنا منها ومرات توصلو لينا احساس انو عندكم ناس بتوصل كلامكم عبر القروبات
قضايانا الكبيرة مركونة في الادراج والقضايا الانصرافية متصدرة الصفحات
تعبنا خلاااص وكل يوم نقول يايوم بكرة ماتسرع وتخفف لي نار وجدي
وشكلكم كدة حتطلعوا بزفة من النادي لأنه كلامنا شايفنو ضدكم وما مخارج معاكم وعايز اقول ليكم حاجه قله قليله حاليا تتعاطف معكم والبقيه ماهاضماكم ومامقتنعه بعملكم
وربنا يكضب الشينة
ولو لاقدر الله الفريق جا بنتيجة سلبية من نيجيريا تبريراتكم كلها ماحتنفعكم لانه وقتها سيكون الناس وصلت مرحلة اللاعودة ….
وواقرب مثال تعادل في الدوري الممتاز المدرج كله يتململ كيف الحال حيكون مع تعثر دوري الابطال لاقدر الله
وحابي انصحكم انو ثقف طموح المدرج ارتفع من العام الماضي
اللهم غد بلغت اللهم فاشهد ….
عجلوا ولاتاجلوا وجمعية عمومية الان اكرم وافيد واقيم من الانتظار
المدرج نفسه ومنى عينه يسمع خبر الرحيل
انتو ساي لمحوا بتاريخ للجمعيه وشوف الفرح في القروبات والمهرجانات حتكون اكتر من فرحتهم وقت سماع عوده الوالي
كل يوم يمر وانتم بين ظهرانينا يمر علينا كالدهر وفترة تكليفكم اجمل مافيها ورتنا الصالح من الطالح
وورتنا معدن الرجال والتفاف الشفوت حول الزعيم
وورتنا الناس الدفعو الغالي والثمين من اجل الكيان
وفي نفس الوقت ورتنا انو الفلس مامكن يدير نادي بالدين والجرورة
لكن هو فلس نصاح
فلس ومعاه تصريحات وفلاشات
ختاما
ارحمونا يرحمكم الله
الطاسة ضائعه وانتم لايمكن الوصول اليكم حاليا عندكم المسافر وعندكم الفارد عضلاتو وعندكم العاجبو صوتو
طيب نتصل علي رقم بلاغات الوزير كيف عشان يغير لينا الشريحة و الشريحة ذاتها ماعرفنها بيانات ولا اتصال ولاتحويل رصيد
ونحن علي المدرج ونتفرج ماعارفين الحول رصيد منو والسافر منو ولا القعد منو
المصاب منو والنصيح منو
ويادكتور جار النبي ادينا الزبدة ولخص لينا اصاباتنا عشان نعرف التعبان منو والمصاب منو والمتمرد ومدعي الإصابة منو اصلو تصريحات مجلسنا منصبه علي القضايا الانصرافية و الهامشية
ولو انتظرنا الشتل بيكتر ولو الشتل كتر الخلافات حتزيد ولو الخلافات زادت يبقي علي المريخ السلام
تصريحات وبيانات ومافي واحدة من التصريحات او البيانات لمست هموم وقضايا الشارع المريخي
همومنا معروف وقضيتنا معروفة
والهم الاكبر هو رحيلكم اليوم قبل الغد
لانو بصراحه فقدنا الثقه فيكم وماعجبنا مجلس الرجل الواحد الرجل الواحد دا الامر الناهي وانتو ونحن عارفنو منو
عايزنا نغني القطار دور حديدو لانو نغمة القطار ممكن تدينا احساس برحيلكم ورحيلكم غاية امنياتنا ورحيل بعض الاقلام العايشه علي اسماءها وتاريخها الاقلام البعيدة عن قضايانا
ارحلو اليوم قبل غداً
اقلام شغالة تحليل فني وتحليل احصائي وبعيدة عن قضايا الجمهور
وقاعده تكتب كلام ونسه ساااكت ماقادره تقول للاعور انت اعور في عينك
مافي شي مضيعنا غير التطبيل ودفن الروؤس في الرمال
حطمتو احلام المدرج بالكامل والناس بقت زهجانه من الحاصل
وياناس نفرات القروبات ماناسينكم ذي ناس كده لكن مجلسنا مصر يجرجرنا لقضاياه الهامشية
بنجيكم لوكو الصبر والصبركم علي ناس التسيير والاقلام الباردة واقلام التحليل الفني يصبركم علينا
ووصيه محب وعاشق ماتخلو ناس الفلاشات والنظريات يسرقو مجهودكم
الكلام واضح لانو شايف في ناس عايزين يظهرو في الصوره علي اكتافكم
ولنا عودة لناس النظريات وسارقين تعب الغلابه والمنظراتيه الظهرو في السطح الايام دي
ابعدو عن الشفوت التعبو من اجل الكيان لانو الناس الانجزت معروفين بالاسم ومعروف اسماء قروباتهم …….