ناس المريخ تاني القاهرة شهر عسل ما بمشوا عليها!!

قزاز ورذاذ

محمد الطيب الأمين

ناس المريخ تاني القاهرة شهر عسل ما بمشوا عليها!!

* نحن وأولاد حلتنا من عشاق القاهرة.
* واصلا القاهرة كثيرة العشاق.
* محبتنا للقاهرة كانت (ليلى علوي) سبباً مباشراً فيها.
* أنا واحد من الناس كنت بشيل صورة ليلى علوي في الجزلان وفي الدولاب وفي الخاطر والقلب.
* وجات سمية الخشاب خلتنا نحب مصر أكتر من (القروش البنلقاها واقعة) .
* وزاد عشقنا لمصر بعد ظهور حنان ترك ومنى زكي ومنة شلبي وباقي الطيبات.
* عندي صديق مصري امبارح اتصلت عليهو النهار.
* قلت ليهو درجة الحرارة كم في القاهرة؟ قال لي : ١٨ درجة.
* قلت ليهو ما في أمل درجة الحرارة دي تبقي (8) لحدي المساء كده؟ قال لي وارد لكن انت بتسأل لشنو ح تنزل مصر ولا ايه ؟
* قلت ليهو : لا ابدا بس المريخ في القاهرة.
* قال لي المريخ منو؟
* قلت ليهو المريخ السوداني فريق معروف ومسجل في لوح الشرف الأفريقي.
* قال لي مسجل في لوح الشرف يعني قبل كده شال كأس أفريقيا زي الأهلي ؟
* قلت ليهو : أبدا والله ، شال كأس دورة مانديلا وهي دورة شبه رمضانية كده.
* قال لي : كيف شبه رمضانية؟ قلت ليهو دورة مانديلا دي لا شارك فيها الهلال السوداني ولا الأهلي ولا الترجي ولا الزمالك ولا الرجاء ولا الوداد ولا الإسماعيلي ولا مازيمبي ولا النجم ولا الصفاقسي ولا اتحاد العاصمة ولا الموردة.
* قال لي طيب وعلاقة المريخ بدرجة الحرارة شنو؟
* قلت ليهو : اصلو بعيد عنك المريخ ما بعرف يلعب في البرد.
* من الله خلقهم كده .
* إرادة ربنا عاد.
* المهم .. المساء مشيت النادي.
* الشوط الأول انتهى تعادل، طوالي اتصلت على صديقي المصري.
* قلت ليهو : شنو يا عم الدنيا عندكم سخنت ولا ايه؟
* قال لي لا (دي الوقت درجة الحرارة ١٠).
* وقد كان.
* في الشوط التاني البرد جا والأهداف جات.
* ونحن متنا من الضحك والضحك كتلنا.
* الجماعة لما الشوط الأولى انتهى بالتعادل طوالي فكروا في دوري الثمانية.
* والله صحي.
* فكروا في التأهل.
* مساكين ما عارفين حاجة.
* ما عندهم خبرة في المجموعات.
* التمهيدي خرب طبعهم.
* في الشوط الثاني حاولوا يعملوا حركة بحركتين.
* نظام بعتمدوا على المرتدات وكده.
* مرقوا مع الهجمة قام افشة هبشهم بالأول.
* مش المفروض يحمدوا الله ويواصلوا في الخندقة؟
* لا .. تاني ومن باب الرشاقة عملوا ليهم هجمة نظام دايرين يعادلوا النتيجة وكده .
* قام كهربا ضربهم بالسلك العريان.
* مش المفروض يحمدوا الله على الاتنين دي يواصلوا في الخندقة؟
* لا .. تاني قاموا يتراشقوا ويهبشو.
* جاهم أبو ضفيرة داك بالتالت.
* وكان المفروض تصل ٧.
* وتعال اناقشك.
* والله العظيم لو ما الاهلي كان مرهق وفتران السبعة ما تحلكم.
* لقيتوا الاهلي مرهق.
* ومن هسه اتحداك الاهلي المصري ده في أم درمان هنا بيديك التلاتة.
* انت الاهلي بتعرف ليهو شنو؟
* أنا لما كنت بلعب مع الاهلي وبغلبو في القاهرة الزمن داك انت ما فاضي لي من سيكافا والقطن التشادي والمحلب اليوغندي.
* قوم على حيلك.
* عامل ليك إعداد عشرة أيام في دار الرياضة وداير تتفاصح.
* هو أنا عملت ٢١ يوم في الدفاع الجوي بالقاهرة وبعد ده بقول يا الله.
* اعدادكم العملتو جمب الدايات ده ما باكلكم عيش.
* واوع تجي تقولي لي وطنية وبطيخ.
* نحن وطنيتنا مختصرة في المنتخب فقط.
* تكتر كلامك طوالي بنقفل استادنا وما ح تلعب فيهو.
* تقول لي مازيمبي وخمسة، بقول ليك الخمسة انت اخدتها من هلال الأبيض.
* هلال الأبيض أداك خمسة ولا أنا ظالمك؟
* أداك صاح؟
* المهم.
* ده تمهيد للكتابة عن خسارة المريخ المستحقة.
* بكرة ح نكتب عن الشوالي القال المريخ رضيان بالتلاتة.
* هو راضي وانا مابي وبعدو إن شاء الله أنال مرادي.
* سنكتب عن رضا المحلل المصري وهو يسخر بطريقة مؤلمة من المريخ.
* ونركب صافنات ونجيبة (مصرية) واصلو الزول بموت والذكرى تفضل حية.
* و.. و..
* وشكلك ده بادي الريد جديد تلعب معاي انا يا حلو؟