هيمنة العليقي على ملفات الهلال
هلال وظلال
عبد المنعم هلال
هيمنة العليقي على ملفات الهلال
-العليقي ماسك كل شيء والهلال واقع في حفرة القرار الفردي ..!
ـ العليقي بقى زي (وزير العريس)… ما خلى لي زول حاجة حتى أبو العريس لافي صينية..! العليقي ماسك ملف التدريب وماسك ملف تسجيلات اللاعبين الأجانب وماسك كل المفاتيح ..! وباقي الجماعة في الهلال بقوا يتونسوا ساكت لكن القرار الحقيقي طالع من مكتب واحد والتوقيع من يد واحدة.
ـ العليقي سايق (بص) الهلال ومتحكم في السرعة والوقوف والإشارات ويا السايق البوباي الإشارة جاي ولا جاي ورينا سوق جاي جاي .. ودور بينا البلد ده نحرق (الجازولين) يا الوابور جاز ..!!
ـ يعني الهلال باختصار بقى مؤسسة العليقي المحدودة لتصنيع الأحلام الزرقاء… لكن للأسف الأحلام دي قاعدة تطير في كل مشوار لدوري الأبطال.
ـ العليقي خلى فلوران قاعد تلاتة مواسم وهو لابس بدلة الهلال عشان خاطر المشروع والبطولات وفي النهاية المشروع طار كما طار الهلال من بطولة دوري الأندية الأبطال ومع ذلك فضل فلوران قاعد زي التمساح تحت الشمس ليه ..؟ لأنو العليقي شايفو أحسن من زيدان .. وفي النهاية فلوران ده كان قاعد على رأي شخصي ساكت… مش على إنجاز ..!
والجماهير الكانت بتحمل الكثير من الطموحات تململت والنتائج ما كانت بتفرح لكن العليقي كن رافع شعار (فلوران خط أحمر ..!)
ـ أجانب زي الرز.. والمحصلة لا شيء ..! ما شاء الله الهلال بقى عامل زي مكتب الأمم المتحدة… لاعبين من كل الجنسيات في الدفاع وفي الوسط وفي الهجوم وفي الكنبة ..! لكن لمن تشوف الأداء تقول ديل جايين سياحة ساي ..!
ـ اللاعب السوداني طمرناهم تحت أرجل الأجانب ..! وين أمجد قاق وين طلال عادل ..؟ وين عز العرب ..؟ وين الطيب عبد الرازق الذي يظهر ويغيب حسب مزاج فلوران ..؟ ديل لو في دولة تانية كان الجماهير بتغني ليهم في المدرجات لكن هنا قاعدين يتفرجوا في البنش.
ـ كل موسم عندنا معرض لاعبين أجانب… لكن الفريق لسه تايه ..!
ـ الهلال ما نادي تمليك فردي ..! شفتو صنداونز ..؟ شفتو الوداد المغربي..؟ شفتو الأهلي المصري ..؟ ناس بتشتغل شغل مؤسسي في لجان متخصصة وفي مشورة زفي قرار جماعي .. أما نحنا ..؟ ملف التسجيلات بجي مع قهوة العليقي الصباحية والقرارات بتطلع في نص الليل عند الاجتماعات السرية بينو وبين ضلو ..!
ـ الهلال يا العليقي ما بيتدار زي مزرعة في خلا أم درمان … دا نادي بملايين المشجعين وتاريخه أكبر من أي زول.
ـ وشوية عتاب ما كعب يا العليقي والله بنعرف إنك بتحب الهلال وعملت واجتهدت وما قصرت لكن الهلال دا ما لعبتك براااك ما معقول تكون أنت الكوتش والمدير الفني ومدير التعاقدات وسواق البص والسواقة بالخلا ما حبابا ..!
ـ فكها شوية… خلي الناس تشتغل معاك … أدينا مؤسسية بدل الفوضى وشغل العشوائية لأنو لو فضلت ماسك كل شي براك الهلال ح يظل يتفرج من بعيد على الكأسات والبطولات بينما الفرق التانية بتحتفل وبتتقدم.
الهلال دا حقنا كلنا… ما مِلك زول براهو.
ويبقى الهلال واقف زي الجبل تمر الأيام وتتبدل الوجوه وتتغير الأسامي لكنو بيظل النبض البخفق في قلوب المحبين.. الناس بتمشي وبتتبدل لكن الكيان باقي.
